రూ. 10 వేల సిప్‌తో చేతికి రూ. 14 కోట్లు..ఎస్బీఐ స్కీమ్ మ్యాజిక్

మ్యూచువల్ ఫండ్స్‌లో దీర్ఘకాలంలో బంపర్ రిటర్న్స్ వస్తుంటాయని నిపుణులు చెబుతుంటారు. వీటిల్లో కొన్ని స్కీమ్స్.. కాంపౌండింగ్ ఎఫెక్ట్‌ కారణంగా మ్యాజిక్ చేస్తుంటాయి. కొన్నేళ్లలోనే సంపదను భారీగా పెంచుతుంటాయి. అలాంటి ఒక స్కీమ్ గురించి తెలుసుకుందాం. భారతదేశంలోనే అత్యంత పాత ఈక్విటీ లింక్డ్ సేవింగ్స్ స్కీమ్‌గా పేరొందిన ఎస్‌బీఐ లాంగ్ టర్మ్ ఈక్విటీ ఫండ్ తన 32 ఏళ్ల ప్రస్థానాన్ని పూర్తి చేసుకుంది. ఈ ఫండ్, 1993, మార్చి 31న ప్రారంభమైనప్పటి నుంచి పెట్టుబడిదారులకు అద్భుతమైన రాబడిని అందించింది. ఒక నెలకు రూ. 10,000.. సిస్టమాటిక్ ఇన్వెస్ట్‌మెంట్ ప్లాన్ ద్వారా పెట్టుబడి పెట్టిన వారికి, ఈ ఏడాది మార్చి 28 నాటికి ఆ మొత్తం దాదాపు రూ.14.44 కోట్ల వరకు పెరిగింది. ఇక్కడ సంవత్సరానికి 17.94 శాతం ఎక్స్‌టెండెడ్ ఇంటర్నల్ రేట్ ఆఫ్ రిటర్న్స్ ఇచ్చింది.

ఈ ఫండ్‌లో మొత్తం 32 ఏళ్ల కాలానికి గానూ పెట్టుబడి మొత్తం రూ. 38.5 లక్షలుగా ఉండగా.. ఇది కోట్లుగా మారడం విశేషం. దీర్ఘకాలిక పెట్టుబడి శక్తి, కాంపౌండింగ్ ఎఫెక్ట్ కారణంగానే ఇలా పెరిగిందని చెప్పొచ్చు. ఈ ఫండ్ ప్రారంభమైనప్పటి నుంచి సంవత్సరానికి 13.33 శాతం సగటు రాబడిని అందించింది. గత 5 ఏళ్లలో ఇది 19.15 శాతం, పదేళ్లలో 15.57 శాతం రాబడిని సాధించింది. ఈ ఫండ్ నికర ఆస్తుల విలువ ప్రస్తుతం రూ. 27,730.33 కోట్లుగా ఉంది. ఈ ఫండ్‌ను దినేష్ బాలచంద్రన్ నిర్వహిస్తున్నారు.

ఎస్‌బీఐ లాంగ్ టర్మ్ ఈక్విటీ ఫండ్ ఒక ఓపెన్-ఎండెడ్ ఈక్విటీ స్కీమ్. ఇది లార్జ్ క్యాప్ అండ్ మిడ్ క్యాప్ స్టాక్స్‌లో పెట్టుబడి పెడుతుంది. ఇది 3 సంవత్సరాల లాక్-ఇన్ పీరియడ్‌తో వస్తుంది, దీని వల్ల పెట్టుబడిదారులు ఆదాయపు పన్ను చట్టంలోని సెక్షన్ 80సీ కింద ఆర్థిక సంవత్సరంలో గరిష్టంగా రూ. 1.5 లక్షల వరకు పన్ను మినహాయింపు పొందవచ్చు. ఈ ఫండ్ దీర్ఘకాలిక సంపద సృష్టి కోసం ఉద్దేశించింది. గత మూడు సంవత్సరాల్లో (2022, 2023, 2024) సానుకూల రాబడిని అందించిన ఈ ఫండ్, 2025లో ఇప్పటివరకు 2.86 శాతం నష్టాన్ని చవిచూసినప్పటికీ, దీర్ఘకాలంలో దాని పనితీరు అద్భుతంగా ఉంది.

నిపుణులు ఏమంటున్నారు?

ఆర్థిక నిపుణులు ఈ ఫండ్‌ను దీర్ఘకాలిక లక్ష్యాలు కలిగిన పెట్టుబడిదారులకు సిఫారసు చేస్తున్నారు. "సిస్టమాటిక్ ఇన్వెస్ట్‌మెంట్ ప్లాన్  ద్వారా క్రమశిక్షణతో పెట్టుబడి పెట్టడం వల్ల మంచి ఫలితాలు సాధ్యమవుతాయి. ఈ ఫండ్ దానికి ఒక ఉత్తమ ఉదాహరణ" అని ప్రముఖ సలహాదారులు చెబుతన్నారు. ఈక్విటీ మార్కెట్‌లో ఒడుదొడుకులు సహజమని, కనీసం 5-10 ఏళ్ల పాటు పెట్టుబడి కొనసాగించాలని వారు సూచిస్తున్నారు.