తెలంగాణ ప్రజలకు బిగ్ రిలీఫ్.. ఈ 10 రోజులు నో టెన్షన్

తెలంగాణలో గతకొద్ది రోజులుగా భిన్న వాతావరణం నెలకొని ఉంది. గత నాలుగైదు రోజులుగా రాష్ట్రంలో అక్కడక్కడ వర్షాలు కురుస్తున్నాయి. అయితే మే మెుదటి వారంలో భానుడు తన ప్రతాపాన్ని చూపించాడు. రికార్డు స్థాయి ఉష్ణోగ్రతలతో ప్రజలు అల్లాడిపోయారు. తీవ్రమైన ఎండలతో పాటు ఉక్కపోతతో ఉక్కిరిబిక్కిరి అయ్యారు. ఎండ వేడిమి తట్టుకోలేక ప్రజలు ఫ్యాన్లు, కూలర్లు, ఏసీలను ఆశ్రయించారు. అయినా రాత్రి పూట ఉక్కపోత ప్రజలను ఇబ్బంది పెట్టింది. గాలిలో తేమశాతం తగ్గటంతోనే వేడి తీవ్రత పెరిగిందని వాతావరణశాఖ అధికారులు తెలిపారు.

కాగా.. తెలంగాణ ప్రజలకు బిగ్ రిలీఫ్ ఇస్తూ వాతావరణశాఖ గుడ్‌న్యూస్ చెప్పింది. వచ్చే పది రోజుల పాటు రాష్ట్రంపై వడగాల్పుల ప్రభావం ఉండదని చెప్పింది. అంటే మే 22 వరకు రాష్ట్రంలో వడగాల్పులు ఉండవు. మే 22 తర్వాత మరో పది రోజులు గడిస్తే జూన్ ఎంటర్ అవుతుంది. ఈశాన్య రుతుపవనాల రాకతో వెదర్ కూల్‌గా మారుతుంది. వాతావరణశాఖ ప్రకటనతో ప్రజలు ఖుషీ అవుతున్నారు. ఏప్రిల్ చివరి వారం, మే మెుదటి వారం తీవ్ర ఎండలు, వడగాల్పులు చూసిన ప్రజలకు ఇది నిజంగా ఊరటనిచ్చే అంశమే.

ఇక రానున్న మూడ్రోజులు రాష్ట్రంలో వర్షాలు కురుస్తాయని వాతావరణశాఖ అధికారులు వెల్లడించారు. ఉపరితల ఆవర్తనం మధ్యప్రదేశ్‌ రాష్ట్రంతో పాటు దాని పరిసర ప్రాంతాల్లో సముద్ర మట్టానికి 1.5 కి.మీటర్ల ఎత్తులో కొనసాగుతోందని చెప్పారు. ఇది కర్ణాటక, కేరళ మీదుగా మహారాష్ట్ర నుంచి సముద్ర మట్టానికి 0.9 కి.మీటర్ల ఎత్తులో ద్రోణి కొనసాగుతోందని వెల్లడించారు. దీని ప్రభావంతో తెలంగాణలో వచ్చే మూడ్రోజులు తేలికపాటి నుంచి ఓ మోస్తరు వర్షాలు కురిసే ఛాన్స్ ఉందని చెప్పారు. కొన్ని జిల్లాల్లో ఉరుములు, మెరుపులతో పాటు గంటకు 30 - 40 కి.మీటర్ల వేగంతో ఈదురుగాలులు వీస్తాయని వాతావరణ కేంద్రం స్పష్టం చేసింది.