తెలంగాణకు రెయిన్ అలర్ట్.. ఈ జిల్లాల్లో వర్షాలు, ఎల్లో అలర్ట్ జారీ

సాధారణంగా మే నెలలో ఎండలు దంచికొడతాయి. రికార్డు స్థాయి ఉష్ణోగ్రతలు నమోదవుతాయి. రోహిణి కార్తెలో రోకళ్లు పగిలే ఎండలు ఉంటాయని.. గ్రామాల్లోని ప్రజలు అంటుంటారు. అయితే ప్రస్తుతం భిన్న వాతావరణం నెలకొని ఉంది. ఏప్రిల్ చివరి వారం, మే మెుదటి వారం ఎండలు దంచికొట్టగా.. ఆ తర్వాత గత 10 రోజుల నుంచి తెలంగాణలో వాతావరణం చల్లబడింది. ఇది వర్షాకాలమా అన్నట్లుగా వర్షాలు కురుస్తున్నాయి. హైదరాబాద్‌లో శనివారం సాయంత్రం కూడా భారీ వర్షం కురిసింది. పలు లోతట్టు ప్రాంతాలు జలమయమయ్యాయి. రహదారిపై భారీగా నీరు చేరటంతో వాహనదారులు ఇబ్బందులు పడ్డారు. పలు జిల్లాల్లోనూ వర్షాలు కురిశాయి.

తాజాగా.. హైదరాబాద్ వాతావరణ కేంద్రం అధికారులు మరోసారి రెయిన్ అలర్ట్ జారీ చేశారు. నేడు కూడా రాష్ట్రంలో భారీ వర్షాలు కురుస్తాయని చెప్పారు. కొన్ని చోట్ల తేలికపాటి నుంచి ఓ మోస్తరు వర్షాలు కురుస్తాయని అంటున్నారు. గాలి వేగం గంటకు 30 నుంచి 40 కిలోమీటర్లుగా ఉంటుందని అన్నారు. భారీ వర్షాల నేపథ్యంలో పలు జిల్లాలకు ఎల్లో అలర్ట్ జారీ చేశారు. ముఖ్యంగా జయశంకర్ భూపాలపల్లి, ములుగు, భద్రాద్రి కొత్తగూడెం, ఖమ్మం, నల్గొండ, సూర్యాపేట, మహబూబాబాద్, రంగారెడ్డి, నాగర్కర్నూల్, వనపర్తి, జోగులాంబ గద్వాల, జనగామ, యాదాద్రి భువనగిరి, వరంగల్, హనుమకొండ, నారాయణపేట, మంచిర్యాల, పెద్దపల్లి, కరీంనగర్ జిల్లాల్లో ఓ మోస్తరు నుంచి భారీ వర్షాలు కురిసే అవకాశం ఉందని వెల్లడించారు.

హైదరాబాద్ నగరంలోనూ మోస్తరు వర్షాలు పడే అవకాశమున్నట్లు అధికారులు తెలిపారు. ఉదయం కాస్త ఎండకాసినా.. సాయంత్రానికి వర్షాలు పడతాయన్నారు. ఇదిలా ఉండగా.. నైరుతి రుతుపవనాలు మరో 36 గంటల్లో.. అండమాన్ నికోబార్ దీవులు, ఆగ్నేయ బంగాళాఖాతాన్ని చేరతాయని వాతావరణశాఖ అధికారులు వెల్లడించారు.