రేవంత్ రెడ్డి సోదరుని కంపెనీతో ఢీల్‌పై ఈడీకి,,,, ఫిర్యాదు చేసిన క్రిశాంక్

అమెరికా పర్యటనలో భాగంగా.. స్వచ్ఛ బయో సంస్థతో తెలంగాణ ప్రభుత్వం 1000 కోట్ల పెట్టుబడుల ఒప్పందం కుదుర్చుకున్న విషయం తెలిసిందే. దీనిపై బీఆర్ఎస్ పార్టీ సంచలన ఆరోపణలు చేస్తోంది. స్వచ్ఛ బయో అనే సంస్థ.. సీఎం రేవంత్ రెడ్డి సోదరుడు జగదీశ్వర్ రెడ్డికి సంబంధించిందేనని.. ఆ కంపెనీ రిజిస్టర్ అయిన 15 రోజులకే 1000 కోట్ల ఒప్పందం కుదుర్చుకున్నారంటూ బీఆర్ఎస్ సోషల్ మీడియా ఇంఛార్జ్ మన్నె క్రిశాంక్.. ఆధారాలతో సహా ఆరోపిస్తున్నారు. స్వచ్ఛ బయో కంపెనీకి రేవంత్ రెడ్డి జగదీశ్వర్ రెడ్డి డైరెక్టర్‌గా ఉన్నారని.. ఆయనకు లాభం చేకూర్చేందుకే ఈ డీల్ కుదుర్చుకున్నారంటూ ఆరోపించారు. అందుకు సంబంధించిన ఆధారాలు కూడా బయటపెట్టారు. కాగా.. ఇప్పుడు ఏకంగా ఢిల్లీలోనే ఎన్‌ఫోర్స్ మెంట్ డైరెక్టరేట్‌ కేంద్ర కార్యాలయంలో ఫిర్యాదు చేశారు క్రిశాంక్ రెడ్డి.

స్వచ్ఛ బయోకు సంబంధించిన ఒప్పందంపై సమగ్ర విచారణ చేయాలంటూ ఈడీకి క్రిశాంక్ ఫిర్యాదు చేశారు. అన్ని ఆధారాలను ఈడీ అధికారులకు సమర్పించినట్టు క్రిశాంక్ తెలిపారు. స్వచ్ఛ్ బయో సంస్థకు జగదీశ్వర్ రెడ్డి డైరెక్టర్‌గా ఉన్నట్టుగా ఆధారాలు కూడా సమర్పించినట్టు తెలిపారు. తన ఫిర్యాదును స్వీకరించిన ఈడీ అధికారులు సమగ్ర విచారణ జరుపుతామంటూ ధ్రువీకరణ పత్రం ఇచ్చినట్టు పేర్కొన్నారు. స్వచ్ఛ్ బయో కంపెనీతో డీల్‌ చేసుకోవటంలో తప్పేముందంటూ మంత్రి శ్రీధర్ బాబు అన్నారని.. అందుకే పూర్తి ఆధారాలతో ఢిల్లీలోని ఈడీ కేంద్ర కార్యాలయంలో ఫిర్యాదు చేసి.. సమగ్ర విచారణ జరిపాలని డిమాండ్ చేసినట్టు క్రిశాంక్ తెలిపారు.

ఇదిలా ఉంటే.. స్వచ్ఛ్ బయో కంపెనీతో చేసుకున్న డీల్ గురించి మంత్రి శ్రీధర్ రెడ్డి ఇప్పటికే క్లారిటీ ఇచ్చే ప్రయత్నం చేశారు. స్వచ్ఛ్ బయో సంస్థకు ప్రయోజనం కల్పించే ఎలాంటి హామీని తాము ఇవ్వలేదని మంత్రి శ్రీధర్‌ బాబు స్పష్టం చేశారు. తాము సంతకం చేసింది కేవలం.. జెనరిక్‌ ఎంవోయూ మాత్రమేనని వివరించారు. స్వచ్ఛ్ బయో సంస్థ ఇటీవల ఏర్పడి ఉండొచ్చు కానీ అది సుగనిత్‌ రెన్యూవబుల్స్‌తో అధికారిక భాగస్వామ్యంలోకి ప్రవేశించిందని మంత్రి పేర్కొన్నారు. కాగా.. ఇప్పుడు ఈ డీల్ మీద ఏకంగా ఢిల్లీలోని ఈడీ కేంద్ర కార్యాలయంలో ఫిర్యాదు చేయటం ద్వారా.. రేవంత్ రెడ్డి ప్రభుత్వాన్ని ఇరుకున పెట్టాలని బీఆర్ఎస్ ప్రభుత్వం భావిస్తున్నట్టు తెలుస్తోంది.