హైదరాబాద్ దగ్గర్లో సరికొత్త జల పర్యాటకం.. అబ్బురపరిచే దృశ్యాలెన్నో

వీకెండ్ వచ్చిందంటే చాలా మంది కుటుంబంతో సరదాగా గడిపేందుకు టూర్లకు ఫ్లాన్ చేసుకుంటారు. అందుకు వివిధ ప్రాంతాలను అన్వేషిస్తుంటారు. జర్నీ రిస్క్ లేకుండా హైదరాబాద్ దగ్గర్లో మంచి టూరిస్ట్ ఫ్లేస్ ఉంటే బాగుండు అని అనుకుంటారు. అలా హైదరాబాద్ నగరానికి సమీపంలో టూరిస్ట్ ప్లేస్ వెతికేవారికి గుడ్‌న్యూస్. వివిధ రకాల పక్షులు, వన్యమృగాలతో జీవ వైవిధ్యానికి నెలవుగా ఉన్న నల్లమల ఫారెస్ట్‌లో సరికొత్త జల పర్యాటకం అందుబాటులోకి వచ్చింది.

హైదరాబాద్ నగరానికి కేవలం 180 కి.మీ దూరంలోని నాగర్‌కర్నూల్‌ జిల్లా సోమశిల నుంచి ఏపీలోని శ్రీశైలం వరకు క్రూయిజ్‌ షిప్‌లు అందుబాటులోకి వచ్చాయి. వీటిని ఏడాది పొడవునా అందుబాటులోకి తీసుకొచ్చేందుకు తెలంగాణ టూరిజం డిపార్ట్‌మెంట్ కసరత్తు చేస్తోంది. మరో వైపు కేరళలోని అలప్పుజ, జమ్మూకశ్మీర్‌ శ్రీనగర్‌లోని దాల్‌ లేక్‌లో మాదిరి స్పీడ్‌ బోట్లు, హౌస్‌బోట్ల సౌకర్యాన్ని అందుబాటులోకి తెచ్చేందుకు సైతం ప్రణాళికలు రచిస్తోంది. ప్రస్తుతం కృష్ణానదిలో సమృద్ధిగా నీరు ఉండటంతో సోమశిల నుంచి శ్రీశైలం వరకు.. నాగార్జునసాగర్‌ నుంచి శ్రీశైలం వరకు క్రూయిజ్‌ షిప్‌ టూర్‌ని రెండ్రోజుల క్రితం ప్రారంభించారు. సోమశిల- శ్రీశైలం 120 కి.మీ. దూరం కాగా 6.30 గంటల్లో నది అందాలను చూస్తూ జర్నీ చేయవచ్చు.

ఈ లాంచీ ప్రయాణంలో అబ్బురపరిచే దృశ్యాలెన్నో పర్యాటకులను కనువిందు చేస్తాయి. నాగార్జున సాగర్ నుంచి నందికొండ మీదుగా ఏలేశ్వరం, సలేశ్వరం, తూర్పు కనుమలు, నల్లమల అటవీప్రాంత అందాలను వీక్షించొచ్చు. నదికి ఓ వైపు తెలంగాణలో అమ్రాబాద్‌ పెద్దపులుల అభయారణ్యం ఉండగా.. మరోవైపు ఆంధ్రప్రదేశ్‌లోని నాగార్జునసాగర్‌ టైగర్‌ రిజర్వు ఉంది. ఈ అడవుల్లో ఉండే పెద్దపులులు ఈదుతూ కృష్ణా నదిని దాటతాయి. నీటి మట్టం అధికంగా ఉన్నప్పుడు తప్పితే మిగతా సమయాల్లో పెద్దపులులు నది మీదుగా నిత్యం రాకపోకలు సాగిస్తుంటాయి.

త్వరలో హైదరాబాద్‌ నుంచి రోడ్డుమార్గంలో సోమశిల, నాగార్జునసాగర్‌ టూర్లను అధికారులు ఫ్లా్న్ చేస్తున్నారు. తిరుగు ప్రయాణంలో శ్రీశైలం నుంచి తీసుకురావడంతో పాటు అక్కడ బోర్డింగ్ వంటి సౌకర్యాల్ని కల్పించనున్నారు. సోమశిల నుంచి శ్రీశైలం వరకు నలుగురు ప్రయాణించేలా స్పీడ్‌ బోట్ల కొనుగోలుకు టూరిజం డిపార్ట్‌మెంట్ రెడీ అవుతోంది. 20 సీట్లతో డీలక్స్‌ బోట్‌ను కొనుగోలు చేయనుంది. ఇవి అందుబాటులోకి వస్తే. బోటు ప్రయాణాన్ని పర్యాటకురాలు ఆస్వాదించొచ్చు.

ఇక నవంబర్ 2న ప్రారంభమైన క్రూయిజ్‌ షిప్‌ల ప్రత్యేక ప్యాకేజీ విషయానికొస్తే.. సింగిల్ వే పెద్దలకు రూ.2 వేలు, పిల్లలకు రూ.1,600గా నిర్ణయించారు. రౌండప్ టూర్ ప్యాకేజీ అయితే.. పెద్దలకు రూ. 3000, పిల్లలకు రూ. 2,400గా డిసైడ్ చేశారు. సోమశిల-శ్రీశైలం, నాగార్జున సాగర్- శ్రీశైలం ఈ రెండు టూర్లకు ఇదే ప్యాకేజీ వర్తించనుంది. ఈ ప్యాకేజీని https://tourism.telangana.gov.in/ వెబ్‌సైట్ ద్వారా బుక్ చేసుకోవచ్చు. లేదా 9848540371 లేదా 9848306435ను సంప్రదించొచ్చు.