మహారాష్ట్ర ఎన్డీయేలో విభేదాలు.. బీజేపీ, అజిత్ పవార్ మధ్య చిచ్చురేపిన ‘యోగి నినాదం’

మరో నాలుగు రోజుల్లో మహారాష్ట్ర అసెంబ్లీ ఎన్నికల పోలింగ్ జరగనుండగా.. అధికార మహాయుతిలో విభేదాలు భగ్గుమన్నాయి. ఇటీవల హర్యానా ఎన్నికల ప్రచారంలో ఉత్తరప్రదేశ్‌ సీఎం యోగి ఆధిత్యనాథ్‌ ‘బాటేంగే తో కటేంగే’ (విడిపోతే పడిపోతాం) అనే నినాదం వినిపించారు. ఆ నినాదం బీజేపీకి బాగానే కలిసొచ్చింది. అయితే, ఇప్పుడు అదే నినాదాన్ని మహరాష్ట్ర ఎన్నికల ప్రచారంలో మహాయుతి కూటమి వినిపించడాన్ని డిప్యూటీ సీఎం అజిత్‌ పవార్‌ తీవ్రంగా వ్యతిరేకించారు. ఉత్తర్ ప్రదేశ్‌, ఝార్ఘండ్‌లలో ఈ నినాదం పనిచేస్తుందేమో కానీ.. ఇక్కడ పనిచేయదని వ్యాఖ్యానించారు. దీనిపై దేవేంద్ర ఫడ్నవీస్ స్పందిస్తూ.. దీనిని పవార్ అర్ధం చేసుకోవాలని సూచించారు.

‘అజిత్ పవార్ దశాబ్దాలుగా లౌకిక, హిందూ వ్యతిరేక సిద్ధాంతాలతోనే ఉన్నారు... సెక్యులరిస్టులుగా చెప్పుకునే వారిలో అసలు సెక్యులరిజం లేదు. హిందుత్వను వ్యతిరేకించడమే లౌకికవాదమని భావించే వ్యక్తులతో ఆయన కొనసాగుతూ వచ్చారు. ప్రజల మానసిక స్థితిని అర్థం చేసుకోవడానికి కొంత సమయం పడుతుంది’ అని ఫడ్నవీస్ పేర్కొన్నారు. గతంలో మాతో కలిసున్నవారు (ఉద్ధవ్ ఠాక్రే వర్గాన్ని ఉద్దేశించి) దీనిని అర్ధం చేసుకోలేరని విమర్శించారు. ‘ఈ వ్యక్తులు ప్రజల మనోభావాలను అర్థం చేసుకోలేరు లేదా ఈ నినాదం అర్థం చేసుకోలేరు లేదా మాట్లాడేటప్పుడు వారు వేరే ఏదైనా చెప్పాలనుకుంటున్నారు’ అని మండిపడ్డారు.

ఇదే సమయంలో గురువారం నాటి మోదీ ఎన్నికల ప్రచారానికి అజిత్‌ పవార్‌ దూరంగా ఉండటం మహ రాజకీయాల్లో చర్చశనీయాంశంగా మారింది. మోదీ సభలో అజిత్ లేకపోవడాన్ని ప్రతిపక్షాలు అస్త్రంగా చేసుకోనున్నాయి. తమ ఎన్నికల ప్రచారంలో ఇదే అంశాన్ని లేవనెత్తనున్నట్లు తెలుస్తోంది. అలాగే, బీజేపీ నినాదంలో మతపరమైన విద్వేషాలు ఉన్నాయని ప్రతిపక్షం ఆరోపించింది. దీంతో మోదీ ఈ నినాదాన్ని ‘ఏక్ హై తో సేఫ్ హై’గా మార్చారు. ఈ నినాదంపై మహారాష్ట్రలోని ఓ వర్గానికి చెందిన బీజేపీ నేతలు, మిత్రపక్షాలు తీవ్రంగా విభేధిస్తున్నాయి.

బీజేపీ కీలక నేతలు పంకజా ముండే, అశోక్ చవాన్‌లు కూడా ఈ నినాదాన్ని వ్యతిరేకించారు. దివంగత కేంద్ర మంత్రి గోపీనాథ్ ముండే కుమార్తె అయిన పంకజా.. నా రాజకీయాలు భిన్నమైనవి.. నేను దీనికి మద్దతు ఇవ్వను అన్నారు. ‘ఈ భూమిపై జీవించి ఉన్న ప్రతి ఒక్కరినీ స్వంతం చేసుకోవడమే నాయకుడి పని, కాబట్టి, మేము మహారాష్ట్రకు అలాంటి అంశాన్ని తీసుకురావాల్సిన అవసరం లేదు’ అని చెప్పారు. మాజీ సీఎం అశోక్ చవాన్ సైతం ‘దీనిని ప్రజలు అభినందిస్తారని అనుకోను.. వ్యక్తిగతంగా నేను ఈ నినాదాన్ని సమర్దించను’ అని అన్నారు.