వరుస పశువుల మరణాలు.. భయంతో వణికిపోయిన ఊరి జనం

ఆంధ్రప్రదేశ్‌లోని నంద్యాల జిల్లా డోన్ మండలంలోని కమలాపురం అనే గ్రామం. ఎక్కువ మందికి వ్యవసాయమే ఆధారం. పొలం పనులు చేసుకుంటూ జీవించే ఊరది. అయితే ఈ ఊర్లో గడిచిన కొన్నేళ్లుగా అనూహ్య ఘటనలు జరుగుతున్నాయి. గత నాలుగేళ్ల నుంచి ఈ ఊరులోని 80 మూగజీవాలు చనిపోయాయి. పశువులు చనిపోవటం అనేది సాధారణమైనప్పటికీ.. ఇంత కొద్ది కాలంలో, ఈ సంఖ్యలో మూగజీవాలు ప్రాణాలు కోల్పోవటమనేది ఆ ఊరి జనాన్ని భయపెట్టింది. ఒకటీ రెండు కాదు ఏకంగా 80 వరకూ పశువులు చనిపోవటంతో వారిలో కలవరం మొదలైంది. ముఖ్యంగా రైతన్నలకు తమ ఇంట్లో పిల్లల మాదిరిగా చూసుకున్న కాడెద్దులు చనిపోవటం ఎంతో వేదనను కలిగించింది.

దీంతో తమ ఊరికి ఏదో కీడు జరిగిందని వారంతా భయపడిపోయారు. ఊరికి పట్టిన కీడు పోయేందుకు శాంతి చేయాలని నిర్ణయించుకున్నారు. అందుకు ఏర్పాట్లు కూడా మొదలెట్టారు. కానీ అంతలోనే ఊహించకుండా జరిగిన ఓ ఘటన.. వారిలో అగ్రహావేశాలకు కారణమైంది. ఇన్ని రోజులు తమ పశువులు ఎలా చనిపోయాయో, ఎందుకు చనిపోయాయనే దానిపై అసలు నిజం బయటపడింది. అది తెలిసిన కమలాపురం గ్రామస్థులు మండిపోయారు. అయితే ఊహించని విధంగా ఈ చేదు వాస్తవం వెలుగులోకి వచ్చింది. ఓ వ్యక్తి దుర్బుద్ధి 80 మూగజీవాల మృతికి కారణమని తెలిసింది.

స్థానికులు తెలిపిన వివరాల ప్రకారం.. కమలాపురంలో శంకరాచారి అనే వ్యక్తి వడ్రంగి పని చేస్తూ జీవిస్తుంటారు. అలాగే తనకున్న పొలంలో ఎద్దులతో వ్యవసాయం కూడా చేసేవారు. ఇక ఊర్లోని రైతుల ఎడ్లబండ్లకు కూడా వడ్రంగి పని మనోడిదే. అయితే ఇప్పుడు వస్తున్న దానికన్నా ఇంకా ఎక్కువ సంపాదించాలనే దుర్బుద్ధి శంకరాచారిలో మొదలైంది. ఈ దురాశ ఓ దారుణమైన దురాగతానికి పురిగొల్పింది. ఊర్లోని రైతుల వద్ద ఉన్న ఎద్దులను లేకుండా చేస్తే అందరూ తన వద్దకే బాడుగకు వస్తారని భావించిన శంకరాచారి.. గ్రామంలోని ఎద్దులకు విషం పెట్టడం ప్రారంభించాడు. రాత్రి పూట విషపు గుళికలు పెడుతూ వచ్చాడు. ఈ క్రమంలోనే గడిచిన నాలుగేళ్ల కాలంలో 80 వరకూ మూగజీవాలు బలయ్యాయి.

అయితే సీసీటీవీ శంకరాచారి బాగోతాన్ని బయటపెట్టింది. నవంబర్ 11న కమలాపురం గ్రామంలోని ఓ వ్యక్తి ఇంట్లో ఉన్న కోడె దూడకు విషపు గుళికలు పెట్టేందుకు శంకరాచారి గోడ దూకి వెళ్లాడు. విషపు గుళికలు అక్కడ ఉంచి గోడదూకి పారిపోయాడు. అయితే ఎవరూ చూడలేదనుకుంటే.. ఆ ఇంటి మందు ఏర్పాటు చేసిన సీసీటీవీ నిందితుణ్ని పట్టేసింది. శంకరాచారి వచ్చి వెళ్లిన దృశ్యాలన్నీ సీసీటీవీ ఫుటేజీలో రికార్డయ్యాయి. ఇవి చూసిన ఇంటి యజమాని ఊరి జనానికి అసలు విషయం చెప్పారు. దీంతో గ్రామస్థులు తమ పశువుల మృతికి శంకరాచారే కారణమంటూ డోన్ గ్రామీణ పోలీస్ స్టేషన్‌లో ఫిర్యాదు చేశారు. దీంతో పోలీసులు శంకరాచారిని అదుపులోకి తీసుకుని విచారిస్తే అసలు నిజాలు బయటపడ్డాయి. గ్రామంలో ఎద్దులనేవే లేకుండా ఉంటే.. అందరూ తన వద్దకే బాడుగకు వస్తారని అలా చేసినట్లు అంగీకరించినట్లు తెలిసింది. దీంతో కమలాపురం గ్రామస్థులు డోన్ పోలీస్ స్టేషన్ వద్ద ఆందోళనకు దిగారు. నిందితుడిని కఠినంగా శిక్షించాలని డిమాండ్ చేశారు.