పవన్‌కు కళ్యాణ్‌కు బొత్స పలకరింపు, ఆలింగనం.. ఏపీ అసెంబ్లీలో ఆసక్తికర సీన్

ఆంధ్రప్రదేశ్ అసెంబ్లీ ఆవరణలో ఆసక్తికర సన్నివేశం కనిపించింది. డిప్యూటీ సీఎం పవన్‌ కళ్యాణ్‌ను వైఎస్సార్‌సీపీ ఎమ్మెల్సీ బొత్స సత్యనారాయణ ఆలింగనం చేసుకున్నారు. పవన్ కళ్యాణ్ అసెంబ్లీ బయటకు వచ్చి కారెక్కేందుకు వస్తుండటాన్ని చూసి.. వైఎస్సార్‌సీపీకి చెందిన ఎమ్మెల్యే పెద్దిరెడ్డి రామచంద్రారెడ్డి, ఎమ్మెల్సీలు పక్కకు వెళ్లిపోయారు. అదే సమయంలో అటుగా వచ్చిన బొత్స సత్యనారాయణ ఎదురుగా నిలబడి పవన్ కళ్యాణ్‌కు నమస్కారం పెట్టారు. బొత్స స్పందన చూసిన పవన్ కళ్యాణ్ ఆయనకు ఎదురుగా వెళ్లారు. దీంతో బొత్స కూడా వెళ్లి పవన్ కళ్యాణ్‌ను ఆలింగనం చేసుకున్నారు. పవన్‌ బొత్స భుజంపై తట్టి మర్యాదపూర్వకంగా కరచాలనం చేశారు. పవన్ కళ్యాణ్ కారులో వెళ్లిపోగా.. బొత్స అసెంబ్లీ లోపలికి వెళ్లిపోయారు. ఈ వీడియో బాగా వైరల్ అవుతోంది.

గత ప్రభుత్వ హయాంలో ఉపాధి పథకం నిధులు రూ.13వేల కోట్లు మళ్లించారని.. అలాగే జాబ్ కార్డుల్లో జరిగిన అవకతవకలపై విచారణ చేస్తున్నామన్నారు డిప్యూటీ సీఎం పవన్ కళ్యాణ్. గత ప్రభుత్వం అన్ని వ్యవస్థలను నాశనం చేసిందన్నారు. శాసనసభలో ప్రశ్నోత్తరాలలో సభ్యులు అడిగిన ప్రశ్నలకు ఆయన సమాధానం ఇచ్చారు. అంతేకాదు జాతీయ ఉపాధి హామీ పథకం ద్వారా రూ.4,500 కోట్లతో 30 వేల పనులు చేపట్టినట్లు అసెంబ్లీలో తెలిపారు.. వీటిని సంక్రాంతి లోపు పూర్తి చేస్తామన్నారు. సాగు పనులను ఉపాధి హామీకి అనుసంధానంపై ప్రతిపాదనల్ని పరిశీలిస్తామని చెప్పారు డిప్యూటీ సీఎం. ఉపాధి హామీ కింద కాలువల్లో పూడిక, గుర్రపుడెక్క తొలగింపు పనులు చేయొచ్చని ప్రకటించారు. అలాగే శ్మశానాల ప్రహరీ గోడల నిర్మాణం చేపట్టవచ్చన్నారు.

ఈ జాతీయ ఉపాధి హామీ పథకం డిమాండ్ ఆధారిత పథకమని చెప్పారు పవన్ కళ్యాణ్. నైపుణ్యం లేని మ్యానువల్ పనిని చేయడానికి వయోజనులకు 100 రోజలు పనిని కల్పిస్తున్నామని చెప్పారు. కేంద్రం ఆమోదంతో ఈ పనులు చేపడుతున్నట్లు ప్రకటించారు. కొత్తగా ఎన్ఆర్ఈజీఎస్‌లో పనికోసం నమోదు చేసుకున్న వారికి జాబ్ కార్డులు 15 రోజుల్లోగా ఇస్తామన్నారు.. ఐదు కిలోమీటర్లలోపు పనిని కల్పిస్తున్నామని చెప్పారు డిప్యూటీ సీఎం పవన్ కళ్యాణ్.