లగ్జరీ రైలు.. 7 స్టార్ హోటల్‌ సౌకర్యాలు, టికెట్ ధర చూస్తే కళ్లు తిరగాల్సిందే

భారతీయ రైల్వే శాఖ.. రైలు ప్రయాణికుల కోసం రకరకాల రైళ్లను ప్రవేశపెడుతూ వస్తోంది. సామాన్యులకు అందుబాటులో ఉండే లోకల్ ట్రైన్స్ దగ్గరి నుంచి మొదలుపెడితే వందే భారత్, వందే భారత్ మెట్రో రైళ్ల వరకు ప్రస్తుతం పట్టాలపై పరుగులు పెడుతున్నాయి. త్వరలోనే వందే భారత్ స్లీపర్ రైళ్లు, హైడ్రోజన్ రైళ్లు, బుల్లెట్ రైళ్లు కూడా అందుబాటులోకి రానున్నాయి. అయితే తాజాగా భారతీయ రైల్వేల్లోనే అత్యంత లగ్జరీ రైలు పట్టాలపైకి ఎక్కేందుకు సిద్ధం అయింది. 6 రోజులు, 5 రాత్రుల పాటు నడిచే ఈ రైలులో అన్ని సదుపాయాలు, సౌకర్యాలు ఉంటాయి. ప్రయాణికులకు మంచి అనుభూతిని అందించేందుకు ఇందులో అనేక రకమైన విలాసవంతమైన సౌకర్యాలు ఉంటాయి.

భారతీయ రైల్వే, ఐఆర్‌సీటీసీ లగ్జరీ రైళ్లలో ఒకటైన గోల్డెన్ చారియట్ లగ్జరీ రైలు మరోసారి పట్టాలపైకి ఎక్కనుంది. కర్ణాటక రాష్ట్ర గొప్ప సాంస్కృతిక వారసత్వాన్ని ప్రదర్శించే ఈ గోల్డెన్ చారియట్ లగ్జరీ టూరిస్ట్ రైలు ఈసారి డిసెంబర్ 14వ తేదీన బయలుదేరుతుందని సంబంధిత వర్గాలు పేర్కొన్నాయి. ఈ గోల్డెన్ చారియట్ లగ్జరీ రైలులో 13 డబుల్ బెడ్ క్యాబిన్‌లు, 26 ట్విన్ బెడ్ క్యాబిన్‌లు, వికలాంగుల కోసం ఒక క్యాబిన్ ఉంటాయి. మొత్తం 40 క్యాబిన్లతో కూడిన ఈ రైలులో కేవలం 80 మంది ప్రయాణికులు మాత్రమే ప్రయాణించవచ్చు. ఇందులో విలాసవంతమైన క్యాబిన్‌లు, ఎయిర్ కండిషనర్లు, వైఫై వంటి సౌకర్యాలు ఉంటాయి. అన్ని క్యాబిన్లలో కుషన్డ్ ఫర్నిచర్, లగ్జరీ బాత్రూమ్‌లు, సౌకర్యవంతమైన బెడ్‌లు, పెద్ద పెద్ద టీవీలు ఉన్నాయి. ఇక్కడ అనేక ఓటీటీలు కూడా చూసేందుకు వీలు ఉంటుంది. రైలులో సెలూన్ కోసం ప్రత్యేక ఏర్పాట్లు కూడా చేశారు.

ఇక ఈ గోల్డెన్ చారియట్ లగ్జరీ రైలులో ఫుడ్ విషయానికి వస్తే.. దేశ, విదేశీ వంటకాలు తయారు చేస్తారు. రుచి, నలపాక్ పేరుతో రెండు లగ్జరీ రెస్టారెంట్లు ఉన్నాయి. ఈ రెస్టారెంట్లలో అంతర్జాతీయ బ్రాండ్‌ల వెజ్, నాన్ వెజ్ వంటకాలను ప్రయాణికులకు అందిస్తారు. వీటితోపాటు ఖరీదైన మద్యం కూడా లభిస్తుంది. ఇక ప్రయాణికుల హెల్త్ కోసం ఈ గోల్డెన్ చారియట్ రైలులో హెల్త్ స్పా కూడా అందుబాటులో ఉంటుంది. ఇందులో స్పా థెరపీతో సహా అనేక స్పాలను ప్రయాణికులకు అందిస్తారు. ఈ రైలులో ఒక హైటెక్ జిమ్ కూడా ఉంది. ఎక్సర్‌సైజ్ చేసుకోవడానికి అత్యాధునిక జిమ్ పరికరాలు కూడా ఉంటాయి. ప్రయాణికుల భద్రత కోసం ఈ గోల్డెన్ చారియట్ రైలులో మొత్తం సీసీటీవీ కెమెరాలు, ఫైర్ అలారం సిస్టమ్‌ను ఏర్పాటు చేశారు.

ఈ గోల్డెన్ చారియట్ లగ్జరీ రైలులో 7 స్టార్ హోటల్ కంటే తక్కువేమి సౌకర్యాలు ఉండవు. ఈ లగ్జరీ రైలులో 5 రాత్రులు, 6 పగళ్లు ప్రయాణించడానికి టికెట్ ధరను భారీగా నిర్ణయించారు. ఇందులో ప్రయాణించడానికి టికెట్ ధర రూ. 4 లక్షలు కాగా దానికి 5 శాతం జీఎస్టీ అదనంగా చెల్లించాలని పేర్కొన్నారు. ఈ రైలులో వసతి, ఆహారం, మద్యం, గైడ్ సదుపాయులు ఉంటాయి.

ప్రైడ్ ఆఫ్ కర్నాటక(2024 డిసెంబర్ 14)– బెంగళూరు, బందీపూర్, మైసూర్, హళేబీడు, చిక్కమగళూరు, హంపి, గోవా వరకు వెళ్లి తిరిగి బెంగుళూరుకు చేరుకుంటుంది. ఆ తర్వాత ప్రైడ్ ఆఫ్ కర్ణాటక.. 2025 జనవరి 4, ఫిబ్రవరి 1, మార్చి 1వ తేదీల్లో కూడా 5 రాత్రులు, 6 రోజుల పాటు ప్రయాణించనుంది. జెమ్స్ ఆఫ్ ది సౌత్ (2024 డిసెంబర్ 21)– బెంగళూరు నుంచి మైసూర్, కాంచీపురం, మహాబలిపురం, తంజావూరు, చెట్టినాడ్, కొచ్చిన్, చేర్తాల నుంచి తిరిగి బెంగళూరుకు చేరుకుంటుంది. ఇక మరో జెమ్స్ ఆఫ్ ది సౌత్ గోల్డెన్ చారియట్ లగ్జరీ రైలు ఫిబ్రవరి 15వ తేదీన బయల్దేరనుంది.