రిసార్ట్‌లు బుక్, ఫ్లైట్‌లు రెడీ.. ఎమ్మెల్యేలను కాపాడుకునేందుకు కాంగ్రెస్ ప్లాన్

దేశం మొత్తం దృష్టిని ఆకర్షించిన మహారాష్ట్ర అసెంబ్లీ ఎన్నికల ఫలితాలు మరికొన్ని గంటల్లో వెలువడనున్నాయి. దీనికి సంబంధించి ఇప్పటికే ఎన్నికల సంఘం అధికారులు అన్ని ఏర్పాట్లు చేశారు. శనివారం ఉదయం కౌంటింగ్ ప్రారంభం కానుండగా.. మధ్యాహ్నం వరకు ఏ కూటమి గెలుస్తుంది అనేది ఒక క్లారిటీ రానుంది. ఈ నేపథ్యంలోనే అధికార మహాయుతి.. ప్రతిపక్ష మహా వికాస్ ఆఘాఢీ కూటములు తమదే విజయం అని ధైర్యంగా చెబుతున్నాయి. మెజార్టీ ఎగ్జిట్ పోల్స్ విజయం మహాయుతి కూటమిదేనని పేర్కొనగా.. అవన్నీ తప్పేనని మహా వికాస్ ఆఘాఢీ తేల్చి చెబుతోంది. ఈ క్రమంలోనే అన్ని పార్టీలు.. తమ పార్టీ ఎమ్మెల్యేలు జారిపోకుండా ఉండేందుకు చర్యలు తీసుకుంటున్నాయి. అయితే ఇందులో కాంగ్రెస్ పార్టీ మరో అడుగు ముందుకు వేసింది.

ఇక మహా వికాస్ ఆఘాఢీ కూటమి తమ పార్టీ ఎమ్మె్ల్యేలను పొరుగు రాష్ట్రాలైన కర్ణాటక, తెలంగాణలకు తరలించే అవకాశం ఉన్నట్లు తెలుస్తోంది. ఈ రెండు రాష్ట్రాల్లో కాంగ్రెస్ పార్టీ అధికారంలో ఉండగా.. వారిని ఇక్కడికి తరలించడమే సురక్షితం అని భావిస్తోంది. అందుకే తెలంగాణ, కర్ణాటకలోని ఫైవ్‌ స్టార్‌ హోటళ్లలో కాంగ్రెస్‌ పార్టీ తన పార్టీ ఎమ్మెల్యేలతోపాటు ఇతర పార్టీల ఎమ్మెల్యేలను ఉంచే అవకాశాలు ఉన్నట్లు తెలుస్తోంది. ఇందుకోసం ఇప్పటికే హైదరాబాద్, బెంగళూరు నగరాల్లో కాంగ్రెస్ పార్టీ పావులు కదుపుతున్నట్లు సమాచారం. ఇక ఎమ్మెల్యేలను తరలించేందుకు విమనాలు కూడా సిద్ధం చేసినట్లు సంబంధిత వర్గాల ద్వారా తెలుస్తోంది.

  ఇక మహాయుతి కూటమి ఎమ్మెల్యేలను.. బీజేపీ అధికారంలో ఉన్న గుజరాత్‌కు తీసుకెళ్లే అవకాశాలు ఉన్నట్లు తెలుస్తోంది. మరోవైపు.. మహారాష్ట్రలో మహాయుతి, మహా వికాస్ ఆఘాఢీ కూటముల మధ్య స్వల్ప తేడా వచ్చి.. స్వతంత్ర ఎమ్మె్ల్యేల మద్దతు అవసరమయ్యే అవకాశాలు ఉంటాయని ముందుగానే భావిస్తున్న ఇరు కూటములు.. ఇండిపెండెంట్ అభ్యర్థులపైనే నిఘా వేసి ఉంచుతున్నాయి. ఇప్పటికే అలాంటి వారితో సంప్రదింపులు జరుపుతున్నాయి.

మహారాష్ట్ర అసెంబ్లీ ఎన్నికల ఫలితాలు వెలువడనున్న నేపథ్యంలోనే మహా వికాస్ అఘాడీ కూటమి తరఫున గెలిచిన ఎమ్మెల్యేలంతా ముంబైలోనే ఉంటారని శివసేన ఉద్ధవ్ ఠాక్రే పార్టీ నేత సంజయ్ రౌత్ వెల్లడించారు. మహారాష్ట్రలోని మొత్తం 288 స్థానాల్లో మహా వికాస్ ఆఘాఢీ కూటమి 160 సీట్లను గెలుచుకుంటుందని ఆయన ధీమా వ్యక్తం చేశారు. ఈ క్రమంలోనే గెలిచే అవకాశాలున్న ఇండిపెండెంట్ ఎమ్మెల్యే అభ్యర్థులు కూడా మహా వికాస్ ఆఘాఢీ కూటమికే మద్దతు ఇస్తామని చెబుతున్నట్లు వెల్లడించారు. ఇక మహా వికాస్ ఆఘాఢీ కూటమి అధికారంలోకి వస్తే.. ముఖ్యమంత్రి పీఠం కోసం ప్రస్తుతం ఎలాంటి ఫార్ములాను అనుసరించడం లేదని.. ప్రతి ఒక్కరూ కలిసి తమ ప్రభుత్వ అధినేతను ఎన్నుకుంటారని స్పష్టం చేశారు.