ఢిల్లీ లిక్కర్ కేసులో కేజ్రీవాల్‌కు మరో షాక్.. అసెంబ్లీ ఎన్నికల ముందు కీలక పరిణామం

మరికొన్ని నెలల్లో ఢిల్లీ అసెంబ్లీ ఎన్నికలు జరగనున్న వేళ.. మరోసారి ఢిల్లీ లిక్కర్ పాలసీ కేసు బయటికి వచ్చింది. ఈ ఢిల్లీ మద్యం పాలసీ కేసుకు సంబంధించి.. ఢిల్లీ మాజీ సీఎం, ఆమ్ ఆద్మీ పార్టీ నేషనల్ కన్వీనర్ అరవింద్ కేజ్రీవాల్‌కు ఢిల్లీ హైకోర్టులో ఎదురుదెబ్బ తగిలింది. మద్యం పాలసీ కేసులో ట్రయల్ కోర్టు విచారణపై స్టే విధించాలని కోరుతూ ఢిల్లీ హైకోర్టులో కేజ్రీవాల్ పిటిషన్ దాఖలు చేయగా.. ఆ పిటిషన్‌ను ఢిల్లీ హైకోర్టు తిరస్కరించింది. ఈడీ తరఫున హాజరైన సొలిసిటర్‌ జనరల్‌ తుషార్‌ మెహతా వాదనలు వినిపిస్తూ.. కేజ్రీవాల్‌ను విచారించేందుకు అనుమతి లభించిందని.. సంబంధిత అఫిడవిట్‌ సమర్పిస్తామని కోర్టుకు తెలిపారు.

తనపై జరుగుతున్న విచారణను నిలిపివేయాలంటూ కేజ్రీవాల్‌ దాఖలు చేసిన పిటిషన్‌పై జస్టిస్ మనోజ్ కుమార్ ఓహ్రీ నేతృత్వంలోని ఢిల్లీ హైకోర్టు గురువారం విచారణ జరిపింది. మద్యం పాలసీ కేసు సంబంధించి ట్రయల్‌ కోర్టు ప్రొసీడింగ్స్‌ను నిలిపివేయాలని తన పిటిషన్‌లో కేజ్రీవాల్ పేర్కొన్నారు. దీనిపై విచారణ చేపట్టిన హైకోర్టు కేజ్రీవాల్‌ పిటిషన్‌ను కొట్టి వేసింది. అయితే ఇదే ఢిల్లీ మద్యం పాలసీ కేసులో కేజ్రీవాల్‌పై దాఖలు చేసిన ఛార్జ్‌షీట్‌పై స్పందించాలని ఎన్‌ఫోర్స్‌మెంట్ డైరెక్టరేట్ ఈడీని కోరింది.

మరోవైపు.. ఢిల్లీ లిక్కర్ పాలసీ కేసులో తాజాగా ఈడీ మరిన్ని ఆధారాలను సేకరించింది. ఆ ఆధారాలకు అనుగుణంగా కేజ్రీవాల్‌ను విచారణ చేపట్టాలని కోరుతూ ట్రయల్‌ కోర్టులో ఛార్జ్‌షీట్‌ను కూడా ఈడీ దాఖలు చేసింది. ఈ నేపథ్యంలోనే ఈడీ దాఖలు చేసిన ఛార్జ్‌షీట్‌ను ట్రయల్‌ కోర్టు పరిశీలించి.. కేజ్రీవాల్‌పై తదుపరి చర్యలు తీసుకునేందుకు ఈడీకి అనుమతులు ఇచ్చింది. ట్రయల్ కోర్టు అనుమతులు ఇచ్చిన తర్వాత కేజ్రీవాల్‌కు ఈడీ సమన్లు జారీ చేసింది. ఈ క్రమంలోనే ఢిల్లీ మద్యం కేసులో ట్రయల్‌ కోర్టులో విచారణకు కేజ్రీవాల్‌ హాజరు కావాలని ఆ సమన్లలో స్పష్టం చేసింది. అయితే పలుమార్లు ఈడీ అధికారులు సమన్లు జారీచేసినా కేజ్రీవాల్‌ మాత్రం స్పందించలేదు.

ఇదే సమయంలో ట్రయల్‌ కోర్టు విచారణపై స్టే విధించాలని కోరుతూ కేజ్రీవాల్‌.. ఢిల్లీ హైకోర్టును ఆశ్రయించగా.. దానిపే గురువారం విచారణ చేపట్టిన హైకోర్టు.. ట్రయల్‌ కోర్టు విచారణపై స్టే విధించలేమని తేల్చి చెప్పింది. ఈ పిటిషన్‌పై తదుపరి విచారణను డిసెంబర్‌ 20వ తేదీకి వాయిదా వేసింది.