గౌతమ్ అదానీ కేసుపై తొలిసారి స్పందించిన వైట్‌హౌస్.. కీలక వ్యాఖ్యలు

భారత రెండో అత్యంత ధనవంతుడు, అదానీ గ్రూప్ ఛైర్మన్ గౌతమ్‌ అదానీపై అగ్రరాజ్యం అమెరికాలో లంచం, మోసం అభియోగాలు నమోదవడం సంచలనంగా మారింది. సోలార్ పవర్ ప్రాజెక్ట్‌ల ఒప్పందాల కోసం రూ.2,029 కోట్ల లంచాలు ఇచ్చారని, ఇందుకోసం తప్పుడు సమాచారం ఇచ్చి అమెరికాలో నిధులు సేకరించారని గౌతమ్ అదానీ, ఆయన మేనల్లుడు సాగర్ అదానీ సహా 8 మందిపై న్యూయార్క్‌లో కేసు నమోదైన విషయం తెలిసిందే. తాజాగా, ఈ వ్యవహారంపై అమెరికా అధ్యక్ష భవనం శ్వేతసౌధం స్పందించింది. ఈ సంక్షోభాన్ని ఇరు దేశాలు అధిగమించగలవని విశ్వాసం వ్యక్తం చేసింది.

 వైట్‌హౌస్ మీడియా సెక్రెటరీ కరీన్‌ జీన్‌ పియర్‌ తన రోజువారీ మీడియా సమావేశంలో మాట్లాడుతూ.. అదానీ గ్రూప్‌ (Adani Group) వ్యవహారంపై స్పందించారు. ‘అదానీపై కేసు నమోదైన విషయం మా దృష్టికి వచ్చింది... ఈ ఆరోపణలపై సెక్యూరిటీస్‌ అండ్‌ ఎక్స్ఛేంజ్‌ కమిషన్‌, న్యాయశాఖలు సరైన సమాచారం ఇవ్వగలవు... భారత్‌-అమెరికా మధ్య సంబంధాలు (India US Relation) ఎప్పటిలాగే బలంగా ఉన్నాయి.. అనేక అంశాలపై పరస్పరం సహకరించుకుంటున్నాయి.. మిగతా సమస్యల మాదిరిగానే ప్రస్తుత ఈ సంక్షోభాన్ని కూడా ఇరుదేశాలు అధిగమించగలవు... అమెరికా-భారత్ మధ్య బంధం బలమైన పునాదిపై నిలబడింది’ అని జీన్ పియర్ విశ్వాసం వ్యక్తం చేశారు.

లంచాల సొమ్ము కోసం తప్పుడు సమాచారమిచ్చి అమెరికాలో నిధులు సేకరించారనే ఆరోపణలపై గౌతమ్ అదానీతోపాటు సాగర్‌ అదానీ సహా 8 మందిపై అభియోగాలు నమోదయ్యాయి.ఈ వ్యవహారంలో గౌతమ్ అదానీ, సాగర్ అదానీ, వినీత్‌ ఎస్‌.జైన్, అజూర్‌ పవర్‌ సీఈఓ రంజిత్‌ గుప్తాలపై కీలక సూత్రధారులని పేర్కొంది. విదేశీ అవినీతి నిరోధక చట్టం (ఎఫ్‌సీపీఏ) కింద వీరికి సహకరించిన మరో ఐదుగురిపైనా కేసులు నమోదు చేసింది. ఈ కేసులో గౌతమ్‌ అదానీ, ఆయన మేనల్లుడు సాగర్‌‌పైనా అమెరికాలో అరెస్ట్‌ వారంట్లు జారీ అయినట్లు కొన్ని మీడియా కథనాలు వెల్లడించాయి.