గూగుల్ సీఈఓ సుందర్ పిచాయ్‌కి షాక్.. ముంబయి కోర్టు నోటీసులు

దిగ్గజ సంస్థ గూగుల్ సీఈవో సుందర్ పిచాయ్‌‌కి.. ముంబయి న్యాయస్థానం ధిక్కార నోటీసులు జారీ చేసింది. ‘పఖండి బాబా కి కర్తుట్’ అనే వీడియోను తొలగించాలని గతంలో కోర్టు ఇచ్చిన ఆదేశాలను యూట్యూబ్ ధిక్కరించింది. ఆ వీడియో తన ప్లాట్‌ఫామ్ నుంచి తొలగించకపోవడంపై దాని మాతృ సంస్థ గూగుల్ సీఈవో సుందర్ పిచాయ్‌కి సోమవారం నాడు ముంబయి కోర్టు ధిక్కార నోటీసులు ఇచ్చింది. జంతు సంరక్షణ సంస్థ ధ్యాన్ ఫౌండేషన్, దాని వ్యవస్థాపకుడు యోగి అశ్వినిని లక్ష్యంగా చేసుకుని యూట్యూబ్‌లో Pakhandi Baba ki Kartut’ అనే పేరుతో ఓ వీడియోను పోస్ట్ చేశారు. అయితే, తన పరువుకు భంగం కలిగించేలా ఉన్న ఈ వీడియోను తొలగించేలా ఆదేశాలు ఇవ్వాలని కోరుతూ యోగి అశ్విని ముంబయి కోర్టును 2022 అక్టోబరులో ఆశ్రయించారు.

 దీనిపై విచారణ చేపట్టిన బల్లార్డ్ పీర్‌లోని అడిషినల్ చీఫ్ జ్యుడీషియల్ మేజిస్ట్రేట్ కోర్టు.. ధ్యాన్ ఫౌండేషన్‌, దాని వ్యవస్థాపకుడు యోగి అశ్వినిని టార్గెట్ చేస్తూ పోస్ట్ అయిన వీడియోను తొలగించాలని నవంబర్ 21న ఆదేశించింది. ఈ ఏడాది మార్చి 31న బాంబే హైకోర్టు సూచనలతో దిగువ కోర్టు నోటీసులు జారీ చేసింది. కానీ కోర్టు ఉత్తర్వులు జారీచేసినా వీడియోను తొలగించకపోవడంతో పిటిషనర్ కోర్టు ధిక్కార కింద మళ్లీ కేసు వేశారు. దీనిపై విచారణ చేపట్టిన కోర్టు అందుకు బాధ్యులుగా భావిస్తూ సుందర్ పిచాయ్‌కి నోటీసులు జారీ చేసింది.

ఇక, యూట్యూబ్‌లో పోస్ట్ చేసిన వీడియో తమ సంస్థ ప్రతిష్టతో పాటు వ్యవస్థాపకులు యోగి అశ్వినికి పరువు నష్టం కలిగించేలా ఉందని ఆరోపించింది. చాలా అభ్యంతరకరమైన అంశాలున్న ఆ వీడియోను తొలగించేలా ఆదేశాలు ఇవ్వాలని కోర్టుకు కోరారు. విదేశాలలో ఆ వీడియో ఇంకా ఉందని, 2023 అక్టోబర్‌లో కోర్టు ఇచ్చిన ఉత్తర్వులను గూగుల్ ఉద్దేశపూర్వకంగా విస్మరించిందని ధ్యాన్ ఫౌండేషన్ పేర్కొంది.. ఏ కారణాలు లేకున్నా కోర్టు తీర్పును గూగుల్ ధిక్కరించిందని ఎన్జీవో తరఫు లాయర్ రాజు గుప్తా వాదనలు వినిపించారు.

మరోవైపు, దీనిపై స్పందించిన యూట్యూబ్.. ఐటీ చట్టం 2023లోని సెక్షన్ 69-A కింద బ్లాక్ చేయగల కంటెంట్ పరువు నష్టం కిందకి రాదని వివరణ ఇచ్చింది. ఈ వివరణతో ఏకీభవించని కోర్టు... ఇటువంటి కేసుల్లో క్రిమినల్ కోర్టులు జోక్యం చేసుకోకుండా ఐటీ చట్టం నిరోధించలేదని పేర్కొంది. తదుపరి విచారణను జనవరి 3, 2025కి వాయిదా వేసింది. కోర్టు ధిక్కారణ నోటీసులు.. గూగుల్‌‌కు సంస్థకు భారత్‌లో ఇబ్బందికరంగా మారే అవకాశం ఉంది. ఇప్పటికే గేమింగ్ సంస్థ విన్‌జో ఫిర్యాదుతో కాంపిటేషన్ కమిషన్ ఆఫ్ ఇండియా విచారణను ఎదుర్కొంటోంది.