మాజీ మంత్రి రోజా కుమార్తెకు అరుదైన గౌరవం.. గ్లోబల్ అవార్డు దక్కించుకున్న అన్షు

మాజీ మంత్రి, వైసీపీ నేత రోజా సెల్వమణి కుమార్తె అన్షు మాలిక అరుదైన గౌరవం దక్కించుకున్నారు. సామాజిక కార్యక్రమాల్లో ముందుండే అన్షు మాలికకు సోషల్ ఇంపాక్ట్ గ్లోబల్ ఎంటర్‌ప్రెన్యూర్ అవార్డు వరించింది. నైజీరియాలోని లాగోస్‌లో ఇటీవల జరిగిన గ్లోబల్ ఎంటర్‌ప్రెన్యూర్‌షిప్ ఈవెంట్‌లో అన్షు మాలిక ఈ అవార్డు అందుకున్నారు. ఈ విషయాన్ని మాజీ మంత్రి ఆర్కే రోజా ఎక్స్ వేదికగా వెల్లడించారు. సోషల్ ఇంపాక్ట్ గ్లోబల్ ఎంటర్‌ప్రెన్యూర్ అవార్డు అందుకున్న అన్షు మాలికకి అభినందనలంటూ మాజీ మంత్రి ఆర్కే రోజా ట్వీట్ చేశారు. తమ కృషి పట్టుదల ఫలించాయని సంతోషం వ్యక్తం చేశారు. దీంతో నెటిజనం నుంచి అన్షు మాలికపై అభినందనలు వెల్లువెత్తుతున్నాయి.

నైజీరియాలోని లాగోస్‌లో గ్లోబల్ ఎంటర్‌ప్రెన్యూయర్‌షిప్ ఫెస్టివల్ జరిగింది. ఈ కార్యక్రమంలో సోషల్ ఇంపాక్ట్ కేటగిరీలో అన్షు మాలికకు గ్లోబల్ ఎంటర్‌ప్రెన్యూయర్స్ అవార్డు దక్కింది. అన్షు మాలిక రచయితగా, కోడర్, మారథాన్ రన్నర్, సోషల్ ఎంటర్‌ప్రెన్యూయర్‌గా ఇలా పలు విభాగాల్లో గుర్తింపు సంపాదించుకున్నారు. ఏడేళ్ల వయసులో కోడింగ్ మొదలెట్టిన అన్షు మాలిక.. 17 ఏళ్ల వయసు వచ్చేనాటికి ఫేస్ రికగ్నిషన్ బాట్ యూజింగ్ డీప్ లెర్ని్ంగ్ అనే అంశం మీద రీసెర్చ్ పేపర్ రాశారు. ఈ రీసెర్చ్ పేపర్ ఇంటర్నేషనల్ జర్నల్ ఆఫ్ రీసెర్చ్‌లో ప్రచురితమైంది. అలాగే బ్లూమింగ్‌టన్‌లోని ఇండియానా యూనివర్సిటీలో కంప్యూటర్ సైన్స్ చదివారు. అలాగే ద ఫ్లేమ్ ఇన్ మై హార్ట్ పేరిట కవితలు, కథానికలు రాశారు.

ఇక మహిళా సాధికారత కోసం అన్షు మాలిక కృషిని గుర్తించి.. ఆజ్ కీ ఉమానియా అవార్డు కూడా వరించింది. తాజాగా సోషల్ ఇంపాక్ట్ కేటగిరిలో గ్లోబర్ ఎంటర్‌ప్రెన్యూయర్ అవార్డు దక్కింది. ఇన్నోవేషన్, ఇంపాక్ట్, సస్టైనబులిటీ, స్కేలబులిటీ వంటి అంశాల ఆధారంగా ఈ గ్లోబల్ ఎంటర్‌ప్రెన్యూయర్‌షిప్ అవార్డులు అందిస్తారు. అలాంటి అవార్డును మాజీ మంత్రి రోజా కుమార్తె అన్షు మాలిక దక్కించుకోవటంపై నెట్టింట అభినందనలు వెల్లువెత్తుతున్నాయి. అమ్మకు తగ్గ కూతురు అంటూ వైసీపీ శ్రేణులు షేర్ చేస్తున్నాయి.