క్యాబ్ డ్రైవర్‌కే డ్రైవర్‌గా మారిన బిజినెస్ మేన్

క్యాబ్ బుక్ చేసుకున్న ప్రతీ ఒక్కరూ ఏదో ఒక సమయంలో ఏదో రకమైన సమస్యను ఎదుర్కునే ఉంటారు. ముఖ్యంగా అత్యవసర సమయాల్లో రైడ్ బుక్ కాకపోవడం, అయినా క్యాబ్ ఆలస్యంగా రావడం, దానికోసం గంటల తరబడి వేచి చూడడం.. ఆపై అవి వచ్చాక ఎక్కువ మంది జనాలను ఎక్కించుకోమని కొందరి, డబ్బు ఎక్కువ కావాలంటూ మరికొందరు గొడవ పడడం మనం తరచుగా చూస్తుంటూం. కానీ మనం ఇప్పుడు చూడబోయే వ్యక్తికి మాత్రం.. క్యాబ్ డ్రైవర్‌తో వింత అనుభవం ఎదురైంది. బిజినెస్ మేన్ అయిన అతడు క్యాబ్ డ్రైవర్‌కే డ్రైవర్‌గా మారాల్సి వచ్చింది. ఆ కథేంటో మనం ఇప్పుడు తెలుసుకుందాం.

బెంగళూరుకు చెందిన మిళింద్ చాంద్వానీ ఓ స్టార్టప్ సంస్థ వ్యవస్థాపకుడు. అయితే పని నిమిత్తం వేరే ప్రదేశానికి వెళ్లిన అతడు విమానం ద్వారా బెంగళూరుకు చేరుకున్నాడు. అక్కడి నుంచి ఇంటికి వెళ్లేందుకు అర్థరాత్రి 3 గంటలకు క్యాబ్ బుక్ చేసుకున్నాడు. వెంటనే క్యాబ్ తన ముందుకు వచ్చింది. అది ఎక్కిన కాసేపటికే.. డ్రైవర్‌కు నిద్ర బాగా వస్తున్నట్లు గమనించాడు. అయినా సరే అలాగే కూర్చోగా... డ్రైవర్ కునికిపాట్లు పడుతూ.. నిద్ర నుంచి మేల్కోవడానికి అనేక రకాల ప్రయత్నాలు చేస్తున్నాడు. మధ్యలో ఓ చోట కారు ఆపి మరీ ఛాయ్ తాగాడు. అలాగే సిగరెట్ కూడా కాల్చాడు. ఆపై మళ్లీ ప్రయాణం ప్రారంభించాడు. అయినా సరే అతడికి నిద్ర ఆగట్లేదు.

దీంతో విషయం గుర్తించిన మిళింద్ చాంద్వానీ.. నేను కారు నడపాలా అని అడగ్గానే డ్రైవర్ చేతిలో తాళాలు పెట్టి వెళ్లి పక్క సీట్లో కూర్చున్నాడు. కూర్చోవడం కాదు హాయిగా పడుకున్నాడు. అయితే గూగుల్ మ్యాప్స్ ఆన్ చేసుకుని మరీ మిళింద్ చాంద్వానీ తన ఇంటికి చేరుకున్నాడు. అయితే ఇంటికి చేరడానికి 5 నిమిషాల ముందే నిద్ర లేచిన డ్రైవర్.. ఆయన బాస్‌తో ఫోన్ మాట్లాడాడు. తాను నైట్ షిఫ్టులు చేయలేకపోతున్నానని.. డే షిఫ్టు అయితే బాగుంటుందని కోరాడు. అదంతా చూసిన మిళింద్.. తాను కారు నడపడంతో పాటు డ్రైవర్ పడుకొని ఉండడాన్ని వీడియోగా తీసి సోషల్ మీడియాలో పెట్టాడు. ముఖ్యంగా మీ క్యాబ్ డ్రైవర్‌కు అర్ధరాత్రి 3 గంటలకు ఓ డ్రైవర్ కావాల్సి వస్తే ఎలా అంటూ వీడియో మీద రాసుకొచ్చాడు.

అంతేకాకుండా తనపై నమ్మకం ఉంచి డ్రైవింగ్ ఇచ్చినందుకు సంతోషంగా అనిపించినా.. డ్రైవర్ ఇంత కష్టపడుతుంటే మాత్రం బాధగా అనిపించిందని మిళింద్ చాంద్వానీ చెప్పుకొచ్చాడు. ప్రతీ ఒక్కరూ డ్రైవింగ్ నేర్చుకోవాలని.. ఎప్పుడు ఎలా నడపాల్సి వస్తుందో ఎవరికీ తెలియదు కదా అంటూ రాసుకొచ్చారు. ప్రస్తుతం నెట్టింట ఈ వీడియో వైరల్‌గా మారింది. చూసిన ప్రతీ ఒక్కరూ పాజిటివ్‌గా స్పందిస్తున్నారు. మీలాంటోళ్లు ఉండాలి సామీ అని కొందరు.. క్యాబ్ డ్రైవర్‌కే డ్రైవర్‌గా మారిన బిజినెస్ మేన్ అంటూ మరికొందరు కామెంట్లు చేస్తున్నారు. ఏది ఏమైనా పక్కనున్న వాడి బాధను అర్థం చేసుకుని.. సాయం చేసినందుకు మిళింద్ చాంద్వానీని నెటిజెన్లు పెద్ద ఎత్తున ప్రశంసిస్తున్నారు.