అప్పుడు చంద్రయాన్, ఇప్పుడు స్పెడెక్స్.. స్పేస్‌లో ట్రాఫిక్ జామ్‌తో ఇస్రో ప్రయోగం ఆలస్యం

అంతరిక్షంలో ఏర్పడిన ట్రాఫిక్‌ జామ్‌ కారణంగా.. స్పెడెక్స్‌ ప్రయోగం కొంత ఆలస్యం జరుగుతోందని భారత అంతరిక్ష పరిశోధన సంస్థ - ఇస్రో చీఫ్ ఎస్ సోమనాథ్ వెల్లడించారు. ఇవాళ సాయంత్రం నింగిలోకి దూసుకెళ్లనున్న స్పెడెక్స్ ప్రయోగం ఆలస్యానికి గల కారణాన్ని తాజాగా ఇస్రో ఛైర్మన్ వివరించారు. అంతరిక్షంలో పెరిగిన ట్రాఫిక్‌ జామ్‌ వల్లే ఇలా జరిగిందని స్పష్టం చేశారు. ఇక ఈ ఏడాది ఇస్రో చేపట్టే చివరి ప్రయోగం ఇదే కావడం గమనార్హం. స్పేస్‌లో ట్రాఫిక్‌ జామ్‌ వల్లే అనుకున్న సమయానికి ప్రయోగాన్ని నిర్వహించలేకపోతున్నట్లు తెలిపారు. స్పెడెక్స్ ప్రయోగాన్ని ప్రవేశపెట్టే కక్ష్యలో ఇతర ఉపగ్రహాలు తిరుగుతుండటంతో.. ఈ ప్రయోగాన్ని 2 నిమిషాలు ఆలస్యంగా ప్రయోగించనున్నట్లు వివరించారు.

మొదట ఈ స్పెడెక్స్ ప్రయోగాన్ని సోమవారం రాత్రి 9.58 గంటలకు నింగిలోకి పంపించాలని ఇస్రో నిర్ణయించింది. అయితే అంతరిక్షంలో ట్రాఫిక్‌ జామ్‌ ఏర్పడటంతో.. ఈ పీఎస్ఎల్వీ సీ60 రాకెట్‌ వెళ్లాల్సిన అదే కక్ష్యలో ఇతర శాటిలైట్లు అనుసంధానం చెందడం వల్ల 2 నిమిషాలు ఆలస్యంగా స్పెడెక్స్‌ను ప్రయోగించనున్నట్లు పేర్కొన్నారు. రాత్రి 9.58 గంటలకు బదులు 10 గంటల 15 సెకన్లకు టైం మార్చినట్లు తాజాగా ఇచ్చిన ఓ ఇంటర్వ్యూలో సోమ్‌నాథ్‌ వెల్లడించారు. అయితే.. కక్ష్యలో ట్రాఫిక్ జామ్ కారణంగా ఆలస్యంగా ప్రయోగాన్ని చేపట్టడం ఇదేం తొలిసారి కాదు. 2023లోనూ ఇస్రో ప్రయోగించిన చంద్రయాన్‌-3 మిషన్‌ను కూడా కొన్ని నిమిషాల పాటు వాయిదా వేసింది.

ఎలాన్ మస్క్‌కు చెందిన కొన్ని స్టార్‌లింక్‌ శాటిలైట్లు.. ఈ స్పెడెక్స్ వెళ్లే దారిలో అడ్డుగా వస్తున్నట్లు ఇస్రో శాస్త్రవేత్తలు గుర్తించారు. ప్రస్తుతం స్టార్‌లింక్‌ సంస్థకు చెందిన 7 వేల శాటిలైట్లు భూమి దిగువ కక్ష్యలో తిరుగుతున్నాయని తెలిపారు. చాలాకాలంగా ఇలాంటి భారీ శాటిలైట్లు అంతరిక్షంలో ట్రాఫిక్‌ జామ్‌కు కారణం అవుతున్నాయని వివిధ దేశాల అంతరిక్ష సంస్థల సైంటిస్ట్‌లు హెచ్చరిస్తూనే ఉన్నారు. అంతేకాకుండా అంతరిక్ష వ్యర్థాల కారణంగా ఉపగ్రహాలకు భారీ ప్రమాదం కూడా పొంచి ఉంటుందని చెబుతున్నారు.

మరోవైపు.. ఆంధ్రప్రదేశ్‌లోని సతీష్ ధావన్‌ స్పేస్‌ సెంటర్‌ (షార్‌)లోని మొదటి ప్రయోగ వేదిక నుంచి పీఎస్‌ఎల్వీ సీ-60 రాకెట్ సోమవారం రాత్రి నింగిలోకి దూసుకెళ్లనుంది. స్పెడెక్స్‌ ప్రయోగం ద్వారా ఛేజర్‌, టార్గెట్‌ ఉపగ్రహాలను పీఎస్‌ఎల్వీ సీ-60 నిర్ణీత కక్ష్యలో ప్రవేశపెట్టనుంది. ఈ రెండు శాటిలైట్ల బరువు 440 కిలోలు అని ఇస్రో తెలిపింది. అయితే ఈ స్పెడెక్స్ ప్రయోగానికి కౌంట్‌డౌన్‌ ప్రారంభమైన తర్వాత అంతరిక్షంలో ట్రాఫిక్‌ జామ్‌ ఏర్పడినట్లు గుర్తించిన ఇస్రో శాస్త్రవేత్తలు.. ఈ ప్రయోగాన్ని 2 నిమిషాలు ఆలస్యంగా నింగిలోకి పంపిస్తున్నారు.