అమెరికాలో న్యూఇయర్ వేడుకల్లో ఉగ్రదాడి.. 12 మంది మృతి, 30 మందికి గాయాలు

అగ్రరాజ్యం అమెరికాలో నూతన సంవత్సర వేడుకల్లో ఓ ఉగ్రవాది మారణహోమానికి పాల్పడ్డాడు. న్యూ ఓర్లీయన్స్‌లో కొత్త ఏడాది వేడుకలే లక్ష్యంగా దుశ్చర్యకు దిగాడు. ఈ ఘటనలో 12 మంది అక్కడికక్కడే మృతిచెందగా... మరో 30 మంది గాయపడ్డారు. కానల్ అండ్ బౌర్బన్ వీధిలో వేడుకల కోసం గుమిగూడి ఉండగా.. తొలుత ట్రక్కుతో అతివేగంగా దూసుకొచ్చాడు. అనంతరం తర్వాత విచక్షరహితంగా కాల్పులు జరిపాడు. వీలైనంత ఎక్కువ మందిని ఢీకొట్టాలనే ఉద్దేశంతోనే నిందితుడు అతివేగంగా వాహనం నడిపినట్టు పోలీసులు తెలిపారు. ఈ ఘటనలో ఇద్దరు పోలీసుల కూడా గాయపడ్డారు.

స్థానిక కాలమానం ప్రకారం.. న్యూ ఓర్లియన్స్‌లో బార్లు, రెస్టారెంట్లు, సంగీత కచేరీలకు ప్రసిద్ది చెందిన ఫ్రెంచ్ క్వార్టర్ వద్ద బుధవారం తెల్లవారుజామున 3.15 గంటలకు ఈ ఘటన చోటుచేసుకుంది. ఈ ఘటనలో కనీసం 10 మంది ఘటనా స్థలిలోనే చనిపోయారని, మరో 30 మందికిపైగా గాయపడ్డారని తెలిపారు. క్షతగాత్రులను చికిత్స కోసం సమీపంలోని ఆసుపత్రులకు తరలించినట్టు వెల్లడించారు. అతివేగంతో ట్రక్కు నడుపుకుంటూ జనాలపై వచ్చిన నిందితుడు.. అందులో నుంచి దూకి కాల్పులు జరిపినట్టు ప్రత్యక్ష సాక్షులు చెప్పారు. బారికేడ్లను ఢీకొట్టి తెలుపు రంగు ట్రక్కు అతివేగంతో వచ్చిందని జిమ్, నికోల్ మోవర్ అనే వ్యక్తులు వెల్లడించారు.

‘వాహనం వేగంగా వచ్చిన తర్వాత కాల్పులు శబ్దం వినిపించింది.. పోలీసులు ఆ దిశగా పరుగెత్తుకెళ్లడం మేము చూశాం.. తుపాకీ కాల్పులు ఆగిన తర్వాత కొద్దిసేపు వరకు వరకు మేము ఆల్కోవ్‌లో ఉండి, వీధిలోకి వచ్చాం.. అక్కడ గాయాలతో చాలా మంది పడి ఉన్నారు.. మేము వారికి సహాయం చేయడానికి ప్రయత్నించాం’ అని వివరించారు.

అమెరికాలో అధికంగా టూరిస్ట్‌లు వెళ్లే ప్రాంతాల్లో ఒకటి న్యూ ఓర్లియన్స్. ఈ ఘటనకు కొద్దిసేపటి ముందే జార్టీయా యూనివర్సిటీ, నోట్రే డేమ్ జట్ల మధ్య అక్కడ కీలక ఫుట్‌బాల్ టోర్నీ ప్రారంభమైంది. కాగా, ఈ ఘటన ఉగ్రదాడి అని న్యూ ఓర్లియన్స్ మేయర్ ప్రకటించగా.. ఫెడరల్ బ్యూరో ఆఫ్ ఇన్వెస్టిగేషన్ (ఎఫ్‌బీఐ) మాత్రం తోసిపుచ్చింది.

ఘటన జరిగిన వెంటనే స్పందించి ఎమర్జెన్సీ టీమ్‌లు అక్కడకు చేరుకున్నట్టు సిటీ పోలీస్ విభాగం తెలిపింది. అదనంగా 300 మందిని పంపినట్టు పేర్కొంది. న్యూఇయర్ వేడుకల సందర్భంగా ఫ్రెంచ్ క్వార్టర్‌లో ఎల్జీబీటీ పార్టీలు, డ్రాగ్ క్యాబరెట్ సహా ప్రత్యేక ప్యాకేజీలు ఉంటాయి. అందుకే దుండగుడు ఈ పార్టీని లక్ష్యంగా చేసుకున్నట్టు అధికారులు భావిస్తున్నారు. ఇక, జర్మనీలో డిసెంబరు 20న ఈ విధంగానే క్రిస్మస్ మార్కెట్‌లోకి సౌదీ జాతీయుడు కారుతో దూసుకెళ్లిన ఘటనలో ఐదుగురు ప్రాణాలు కోల్పోగా.. 200 మంది గాయపడ్డారు.