రియల్ లైఫ్ టైమ్ ట్రావెలర్.. 2025 నుంచి 2024కు తీసుకువెళ్లిన విమానం

టైమ్ ట్రావెలింగ్ గురించి పుస్తకాల్లో చదవడం, సినిమాల్లో చూడడం తప్ప నిజజీవితంలో ఏ ఒక్కరూ ఇప్పటి వరకు అలా టైమ్ ట్రావెల్ మిషన్ ద్వారా గతంలోకో, భవిష్యత్తులోకో వెళ్లలేదు. ముఖ్యంగా అసలు టైమ్ ట్రావెల్ మిషన్‌నే ఎవరూ కనిపెట్టలేదు. కానీ ఓ విమానమే టైమ్ ట్రావెల్ మిషన్‌గా మారిపోయింది. అందులో ఉన్న ప్రయాణికులందరినీ 2025 నుంచి 2024కు తీసుకు వెళ్లింది. అసలు ఇదెలా సాధ్యం అయింది, ఆ కథేంటో తెలియాలంటే మీరు ఈ స్టోరీ పూర్తిగా చదివేయాల్సిందే.

ప్రపంచ వ్యాప్తంగా ఉన్న దేశాలు 2024 సంవత్సరానికి ఘనంగా వీడ్కోలు పలికి నూతన ఏడాదికి ఆహ్వానం చెబుతున్నాయి. ఈక్రమంలోనే ప్రజలంతా పార్టీలు చేసుకుంటూ తెగ సందడి చేస్తున్నారు. అయితే భౌగోళిక పరిస్థితుల కారణంగా కొన్ని దేశాల్లో సమయం ముందూ వెనక ఉండడం గురించి అందరికీ తెలిసిందే. ఈక్రమంలోనే దేశాల మధ్య కొన్ని గంటల సమయం తేడా ఉంటుంది. అలా ఒక్కో దేశంలో జనవరి ఒకటి ముందే రావొచ్చు. మరికొన్ని దేశాల్లో కొంచెం ఆలస్యంగా రావడం కామన్‌యే.

సరిగ్గా ఇదే జరిగి 2025 నుంచి 2024కు వెళ్లారు కొందరు ప్రయాణికులు. అన్ని దేశాల మాదిరిగానే హాంగ్ కాంగ్ భారతదేశం కంటే దాదాపు మూడు గంటలు ముందు ఉంటుంది. అలాగే అమెరికాలోని లాస్ ఏంజిల్స్ మధ్య భారత్ దేశంతో పోలిస్తే సుమారుగా 13 గంటల తేడా ఉంటుంది. ఇలా లాస్ ఎంజిల్స్‌లో ఇంకా న్యూ ఇయర్ వేడుకలు ప్రారంభం కూడా కాలేదు. కానీ హాంగ్ కాంగ్‌లో వేడుకలు పూర్తయి మధ్యాహ్నం 3 గంటలు అవుతోంది. ఈ రెండు దేశాల మధ్య మొత్తం 16 గంటల తేడా ఉండగా.. హాంగ్ కాంగ్ నుంచి ఈరోజు ఉదయం ఓ విమానం లాస్ ఎంజిల్స్‌కు వెళ్లింది.

CPA880 నెంబర్ గల విమానం కొన్ని గంటల ప్రయాణం తర్వాత ఈరోజు లాస్ ఏంజిల్స్‌లో టేకాఫ్ అయింది. అయితే అమెరికా సమయం ప్రకారం అక్కడ ఇంకా 2024యే. ఇలా 2025లో విమానం ఎక్కిన ప్రయాణికులు అంతా 2024 తిరిగి రావడంతో తెగ ఆశ్చర్యపోతున్నారు. ఇది నిజంగానే టైమ్ ట్రావెల్ మిషన్ అంటూ పలువురు నెటిజెన్లు కామెంట్లు చేస్తున్నారు. నాక్కూడా అలా మళ్లీ గతేడాదికి వెళ్లాలని ఉందని కొందరు తమ మనుసులోని భావాలను కామెంట్ల రూపంలో చెబుతుండగా.. అయితే మరో ఏడాది వరకు వేచి చూడాల్సిందేనని మరి కొందరు నెటిజెన్లు రిప్లై ఇస్తున్నారు.