పాస్‌పోర్ట్ రద్దు చేశాకా వీసా పొడగింపు ఏంటి..: షేక్ హసీనా విషయంలో బంగ్లాదేశ్ రియాక్షన్

బంగ్లాదేశ్ మాజీ ప్రధాన మంత్రి షేక్ హసీనా.. అక్కడ జరిగిన అల్లర్ల కారణంగా దేశం విడిచి పారిపోవడం.. ఆ తర్వాత భారతదేశానికి వచ్చి ఇక్కడే ఉండడం గురించి అందరికీ తెలిసిందే. అయితే ఆమెను తిరిగి తమకు అప్పగించాలంటూ బంగ్లాదేశ్ తాత్కాలిక సర్కారు ఇండియాను కోరింది. ఆమెపై మొత్తం 51 కేసులు ఉన్నాయని.. అందులో 42 హత్య కేసులే అని స్పష్టం చేసింది. అక్కడితో ఆగకుండా ఇటీవలే షేక్ హసీనా పాస్‌పోర్ట్‌ను కూడా రద్దు చేసింది. దీంతో భారత్ ఆమె వీసా గడువును పొడగించింది. దీంతో బంగ్లాదేశ్ ప్రభుత్వం తాజాగా స్పందించింది. ఆ పూర్తి వివరాలు ఏంటో మనం ఇప్పుడు తెలుసుకుందాం.

బంగ్లాదేశ్‌లో జరిగిన అల్లర్ల కారణంగా షేక్ హసీనా.. 15 ఏళ్ల పాలనకు ముగింపు పలికి ఆగస్టు 5వ తేదీన ఆ దేశాన్ని వీడింది. నేరుగా భారత దేశానికి వచ్చి ఇక్కడే ఆశ్రయం పొందుతోంది. ఇక అప్పటి నుంచి ఆ దేశ తాత్కాలిక ప్రభుత్వాధినేత, నోబెల్ గ్రహీత ముహమ్మద్ యూనస్ షేక్ హసీనాను తిరిగి తమ దేశానికి రప్పించేందుకు అనేక ప్రయత్నాలు చేస్తున్నారు. ఈక్రమంలోనే గతేడాది డిసెంబర్ 23వ తేదీన భారత విదేశాంగ శాఖకు లేఖ కూడా రాసింది. ఆమెను తిరిగి అప్పగించాలంటూ ఆ లేఖలో పేర్కొన్నారు.

ముఖ్యంగా ఆమెపై మొత్తంగా 51 కేసులు ఉన్నాయని.. అందులో 42 హత్య కేసులే అని కూడా వెల్లడించింది. అయితే ఆ లేఖను అందుకున్నట్లు భారత విదేశాంగ శాఖ కూడా ధ్రువీకరించింది. కానీ షేక్ హసీనాను అప్పగిస్తారా లేదా అనేదానిపై మాత్రం ఇప్పటి వరకు స్పందించలేదు. దాని గురించి తాము మాట్లాడాల్సింది కూడా ఏమీ లేదని భారత విదేశీ వ్యవహారాల శాఖ ప్రతినిధి రణధీర్ జైస్వాల్ ప్రకటించారు. ఇదంతా ఇలా ఉండగా తాజాగా బంగ్లాదేశ్ సర్కారు.. షేక్ హసీనాతో పాటు మరో 97 మంది పాస్‌పోర్ట్‌లను రద్దు చేస్తున్నట్లు ప్రకటించింది.

ఈ విషయం తెలుసుకున్న భారత్.. షేక్ హసీనా వీసా గడువును పొడగించింది. అయితే దీనిపై బంగ్లాదేశ్‌కు ఎలాంటి సమాచారం అందించలేదు. కానీ మీడియాలో ఈ వార్త రాగా.. బంగ్లాదేశ్ విదేశాంగ మంత్రిత్వ శాఖ ప్రతినిధి మహ్మద్ రఫీకుల్ ఆలం స్పందించారు. పాస్‌పోర్టే రద్దు చేశాకా వీసా గడువు పొడగింపుకు ఏమాత్రం సంబంధం లేదని అన్నారు. ఇప్పటికీ భారతదేశం షేక్ హసీనాను అప్పగిస్తుందా లేదా అనే దాని గురించి ఎలాంటి సమాచారం అందించలేదని వివరించారు. చూడాలి మరి ఏం జరగనుంది అనేది.