ఇకపై యూఎస్‌ను "మెక్సికన్ అమెరికా" అని పిలుస్తాం..: ట్రంప్‌నకు ఇచ్చిపడేసిన మెక్సికో అధ్యక్షురాలు

ఇటీవలే అమెరికా ఎన్నికల్లో విజయం సాధించిన డొనాల్డ్ ట్రంప్.. రెండోసారి అగ్రరాజ్యం అమెరిగా అధ్యక్ష పదవీ బాధ్యతలు స్వీకరించబోతున్న విషయం అందరికీ తెలిసిందే. అయితే ఎన్నికల్లో విజయం సాధించినప్పటి నుంచి ట్రంప్ చాలా దూకుడుగా వ్యవహరిస్తున్నారు. ఎప్పుడూ ఇతర దేశాలను తమలో విలీనం చేసుకుంటామని.. పలు ప్రాంతాలను కొనుగోలు చేస్తామంటూ అందరినీ భయభ్రాంతులకు గురి చేస్తున్నారు. అయితే తాజాగా "గల్ఫ్ ఆఫ్ మెక్సికో"ను "గల్ఫ్ ఆఫ్ అమెరికా"గా మారుస్తానంటూ వ్యాఖ్యానించారు. దీనిపై మెక్సికో అధ్యక్షురాలు తాజాగా స్పందించారు. ట్రంప్‌నకు గట్టి షాకిచ్చారు. ఆ పూర్తి విశేషాలు ఏంటో మనం ఇప్పుడు తెలుసుకుందాం.

అగ్రరాజ్యం అమెరికా అధ్యక్షుడిగా జనవరి 20వ తేదీన రెండోసారి పదవీ బాధ్యతలు స్వీకరించేందుకు సిద్ధం అవుతున్న డొనాల్డ్ ట్రంప్ వైఖరి ఎవరికీ నచ్చడం లేదు. ముఖ్యంగా ఎన్నికల్లో గెలిచినప్పటి నుంచి ట్రంప్.. కెనడాను తమ దేశంలో విలీనం చేసుకుంటామని అన్నారు. ఆ తర్వాత గ్రీన్‌లాండ్‌ను కొనుగోలు చేస్తామని చెప్పారు. అది మాత్రమే కాకుండా పనామా కాలువాను తమ అధీనంలోకి తెచ్చుకుంటామంటూ షాకింగ్ కామెంట్లు చేశారు. అది చాలదన్నట్లు ఆ మూడింటిన తానే కొనుగోలు చేయబోతున్నట్లు చెబుతూ.. తన అమెజాన్ కార్ట్‌లో వీటిని పెట్టినట్లుగా ఓ ఫొటోను కూడా ఆయన కుమారుడు విడుదల చేశారు.

ఉత్తర అమెరికాను మెక్సికన్ అమెరికా అని పిలిచేవారు..!

అయితే తాజాగా "గల్ఫ్ ఆఫ్ మెక్సికో"ను.. "గల్ఫ్ ఆఫ్ అమెరికా"గా మారుస్తానంటూ డొనాల్డ్ ట్రంప్ తెలిపారు. అయితే దీనిపై మెక్సికో అధ్యక్షురాలు క్లాడియో షేన్‌బామ్ పార్డో గట్టిగా స్పందించారు. డొనాల్డ్ ట్రంప్‌నకు తనదైన స్టైల్‌లో రిప్లై ఇచ్చారు. బుధవారం రోజు జరిగిన మీడియా సమావేశంలో మాట్లాడుతూ.. 17వ శతాబ్దంలో "ఉత్తర అమెరికా"ను "మెక్సికన్ అమెరికా" అని పిలిచే వారని గుర్తు చేశారు. "గల్ఫ్ ఆఫ్ మెక్సికో"ను ఐక్యరాజ్య సమితి గుర్తించిందన్న విషయాన్ని ఎవరూ మర్చిపోవద్దంటూ క్లాడియో చెప్పుకొచ్చారు.

ముఖ్యంగా "గల్ఫ్ ఆఫ్ మెక్సికో"ను "అమెరికా మెక్సికో" అని పిలిస్తే.. తాము యూఎస్‌ను "మెక్సికన్ అమెరికా" అని ఎందుకు పిలవకూడదంటూ ప్రశ్నించారు. ఇది వినడానికి కూడా చాలా బాగుంది కదా అంటూ డొనాల్డ్ ట్రంప్‌ను ఉద్దేశిస్తూ చురకలంటించారు. అలాగే అమెరికాకు కొత్త అధ్యక్షుడు వచ్చిన తర్వాత ఇరు దేశాల మధ్య సత్సంబంధాలు ఉండాలని తాము కోరుకుంటున్నట్లు కూడా స్పష్టం చేశారు. ట్రంప్‌నకు మెక్సికో అధ్యక్షురాలు గట్టి రిప్లై ఇవ్వడంతో పెద్ద ఎత్తున ఈ న్యూస్ వైరల్ అవుతోంది.