శభాష్ ఏపీ పోలీస్... 6 నిమిషాలు.. 106 కి.మీ

సమాచారం అందిన వెంటనే స్పందించి కేవలం ఆరు నిమిషాల్లో ఓ నిండు ప్రాణం నిలబెట్టిన ఏపీ పోలీసులపై ప్రశంసల వర్షం కురుస్తోంది. వివరాల్లోకి వెళ్తేడాక్టర్ బి.ఆర్. అంబేద్కర్ కోనసీమ జిల్లా అయినవిల్లి మండలానికి చెందిన ఓ యువకుడు ఆర్థిక ఇబ్బందులతో ఆత్మహత్య చేసుకోవాలనుకున్నాడు. ఉరివేసుకునేందుకు కుటుంబసభ్యులకు సెల్ఫీ వీడియో పంపించాడు. ఈ వీడియోను వెంటనే కుటుంసభ్యులు పి.గన్నవరం సీఐ భీమరాజుకు పంపించగా.. ఆయన వేగంగా స్పందించడంతో ఆ యువకుణ్ని కాపాడగలిగారు. 2025 సంవత్సరం, ఫిబ్రవరి 10వ తేదీ.. సోమవారం రాత్రి.. సరిగ్గా 11 గంటల 21 నిమిషాల సమయం.. అంబేద్కర్ కోనసీమ జిల్లాలోని పి. గన్నవరం పోలీస్ స్టేషన్‌లో సీఐగా పనిచేస్తున్న భీమరాజు ఫోన్.. ట్రింగ్ ట్రింగ్‌మని మోగింది. అర్ధరాత్రి కావొస్తోంది.. ఇంత రాత్రి వేళ ఎవరు ఫోన్ చేశారో, ఏం ఆపద వచ్చి ఫోన్ చేశారోననే అనుమానంతో ఫోన్ తీసి చూశారు సీఐ భీమరాజు. అవతలి నుంచి ఓ గొంతు.. సార్ కాపాడండి, సార్ కాపాడండి.. ఆ గొంతులో కంగారు, భయం. ఆందోళన స్పష్టంగా వినిపిస్తోంది. ఫోన్ లిఫ్ట్ చేయగానే భయం, కంగారుతో తడబడుతూనే తమ బాధేంటో సీఐతో మొరపెటుకున్నారు అవతలి వ్యక్తి. ఓ వీడియోను కూడా సీఐకు పంపించారు. వీడియో చూడగానే సీఐ మతిపోయినంత పనైంది. అవతలి వ్యక్తులకు ధైర్యం చెప్తూనే యాక్షన్‌లోకి దిగారు పి. గన్నవరం సీఐ భీమరాజు. వెంటనే ఐటీ కోర్ కానిస్టేబుల్ జాఫర్‌కు విషయాన్ని వివరించారు.

సమయం 11 గంటల 22 నిమిషాలు.. ఫోన్‌లో అవతలి వ్యక్తి చెప్పిన ఫోన్ నంబర్ ఆధారంగా ఆ నంబర్‌కు కాల్ చేశారు ఐటీ కానిస్టేబుల్ జాఫర్. కానీ ఎలాంటి ఉపయోగం లేకపోయింది. ఫోన్ స్విఛాఫ్ వస్తోంది. ఏం చేయాలో పాలుపోలేదు. సమయం వృథా అయ్యే కొద్దీ ఓ నిండు ప్రాణం పోతుంది. ఎలాగైనా ఆ వ్యక్తిని కాపాడాలనే తపన, ఫోన్‌ ఐఎంఈఐ నంబర్ ద్వారా ఆ ఫోన్ ఎక్కడుందనేదీ కనిపెట్టారు పోలీసులు. అక్కడి నుంచి సుమారు 106 కిలోమీటర్ల దూరంలోని అన్నవరంలో ఆ ఫోన్ ఉన్నట్లు చూపిస్తోంది. సీఐ భీమరాజు మెదడు చాలా వేగంగా ఆలోచించింది. వెంటనే ఫోన్ తీశారు.

సమయం 11 గంటల 24 నిమిషాలు.. అన్నవరం ఎస్సై శ్రీహరిబాబు ఫోన్ మోగింది. ఫోన్ లిఫ్ట్ చేస్తే అవతల పి.గన్నవరం సీఐ భీమరాజు.. విషయం మొత్తాన్ని ఎస్‌ఐకు చెప్పారు సీఐ. వీడియోతో పాటు లోకేషన్ షేర్ చేశారు. అన్నవరంలో ఆ ప్రాంతం ఎక్కడుందో వెంటనే ట్రేస్ చేయాలని సూచించారు. సీఐ ఆదేశాలతో అన్నవరం ఎస్ఐ అలర్ట్ అయ్యారు. సిబ్బందిని అప్రమత్తం చేశారు. సీఐ తనకు పంపించిన వీడియోను స్థానిక లాడ్జిల యజమానులకు వాట్సాప్‌ గ్రూప్‌లో షేర్ చేశారు. నిమిషాల వ్యవధిలోనే ఓ లాడ్జి ఓనర్ నుంచి అన్నవరం ఎస్ఐకు ఫోన్ వచ్చింది.

సమయం 11 గంటల 27 నిమిషాలు.. లాడ్జిలోని ఓ గది తలుపులు అమాంతం తెరుచుకున్నాయి. అక్కడ చూస్తే ఓ యువకుడు ఉరేసుకునేందుకు సిద్ధమవుతున్నాడు. అన్నవరం ఎస్ఐ వెంటనే అతణ్ని అడ్డుకున్నారు. అదుపులోకి తీసుకున్నారు. ఆ యువకుడికి కౌన్సిలింగ్ ఇచ్చి.. కుటుంబసభ్యులకు అప్పగించారు. ఆ విధంగా.. కేవలం 6 నిమిషాలలో 106 కిలోమీటర్ల దూరంలో ఆత్మహత్య చేసుకోబోతున్న అయినవిల్లి మండలానికి చెందిన యువకుడిని కాపాడారు పోలీసులు. యువకుడి కుటుంబసభ్యుల ఫిర్యాదుకు సత్వరమే స్పందించిన పోలీసులపై అభినందనలు వెల్లువెత్తున్నాయి. అర్ధరాత్రి వేళ అతి తక్కువ సమయంలో 106 కిలోమీటర్ల దూరంలోని ఓ వ్యక్తిని కాపాడిన తీరుపై ప్రశంసలు కురుస్తున్నాయి.