కోరీ బుకర్ 25 గంటల సుదీర్ఘ ప్రసంగంతో ట్రంప్ విధానాలను ఛేదించారు

అమెరికా అధ్యక్షుడు డొనాల్డ్ ట్రంప్ విధానాలను వ్యతిరేకిస్తూ డెమొక్రటిక్ సెనెటర్ కోరీ బుకర్ 25 గంటల పాటు సుదీర్ధంగా ప్రసంగించి రికార్డు సృష్టించారు. న్యూజెర్సీ సెనేటర్ సెనెట్ చరిత్రలో సుదీర్ఘ ప్రసంగం చేసిన వ్యక్తిగా సరికొత రికార్డు క్రియేట్ చేశారు. ట్రంప్ విధానాలపై తన అసమ్మతిని తెలియజేస్తూ, అమెరికా ప్రజలకు, ప్రజాస్వామ్యానికి పొంచి ఉన్న ముప్పును ఎత్తిచూపుతూ బుకర్ ప్రసంగం సాగింది. డెమొక్రాట్ నేత కోరీ బుకర్ అమెరికా కాలమానం ప్రకారం సోమవారం సాయంత్రం సెనెట్‌లో ప్రసంగం మొదలుపెట్టి... మంగళవారం సాయంత్రం వరకు ఆయన మాట్లాడుతూనే ఉన్నారు. మొత్తం 25 గంటల 5 నిమిషాలు పాటు ప్రసంగం చేశారు. సెనెట్ చరిత్రలో ఇంత సుదీర్ఘంగా ఎవరూ ప్రసంగించలేదు.

దీంతో గతంలో ఉన్న రికార్డు బద్దలైంది. 1957లో రిపబ్లికన్ నేత స్ట్రోమ్ థర్మోండ్ పౌరహక్కుల చట్టాన్ని వ్యతిరేకిస్తూ 24 గంటల 18 నిమిషాలు మాట్లాడారు. ఇప్పుడు ఆ రికార్డును కోరీ బుకర్ అధిగమించారు. బుకర్ ప్రసంగిస్తుంటే తోటి డెమొక్రాట్లు ఆయనకు సహాయం చేశారు. మధ్యమధ్యలో ప్రశ్నలు అడుగుతూ ఆయనను ప్రోత్సహించారు. ఈ సందర్భంగా బుకర్ మాట్లాడుతూ ‘‘ప్రజలు చాలా శక్తిమంతులని చెప్పడానికే నేను ఇక్కడ నిలబడ్డాను.. మన దేశంలో పరిస్థితులు దారుణంగా ఉన్నాయి... అమెరికా ప్రజలకు, ప్రజాస్వామ్యానికి ముప్పు ఉంది. అందుకే మనమంతా ఐక్యంగా పోరాడాలి’ అని పిలుపునిచ్చారు.

అంతేకాదు, ట్రంప్ ఆర్థిక, వ్యాపార విధానాలను ఆయన తప్పుపట్టారు. ఎలాన్ మస్క్ ఆధ్వర్యంలోని డోజ్ విభాగం చర్యలను ఆయన ఖండించారు. బుకర్ మాట్లాడుతున్నంతసేపు ఆయన కుటుంబ సభ్యులు సెనెట్ గ్యాలరీలో కూర్చుని విన్నారు. కాగా, 2013లో టెక్సాస్‌కు చెందిన రిపబ్లికన్ సెనెటర్ టెడ్ క్రూజ్ 21 గంటల 19 నిమిషాలు మాట్లాడారు. ఇప్పుడు ఆ రికార్డును కూడా కోరీ బుకర్ దాటేశారు.

అమెరికా అధ్యక్షుడు ట్రంప్ నిర్ణయాలను చాలామంది వ్యతిరేకిస్తున్నారు. ముఖ్యంగా డెమొక్రట్లు ఆయన విధానాలను తీవ్రంగా విమర్శిస్తున్నారు. ఈ నేపథ్యంలోనే కోరీ బుకర్ తన సుదీర్ఘ ప్రసంగంతో అందరి దృష్టిని ఆకర్షించారు. డెమొక్రాట్లలో ట్రంప్ విధనాలపై ఉన్న వ్యతిరేకతను ఈ విధంగా తెలియజెప్పే ప్రయత్నం చేశారు. అయితే బుకర్ తన ప్రసంగంలో ‘అద్దం ముందు నిలబడి మనల్ని మనం చూసుకున్నట్టు.. మన పనితీరును సమీక్షించుకోవాలని’ డెమొక్రాట్లకు ఆయన పిలుపునిచ్చారు

బుకర్‌పై సెనెట్‌లో డెమొక్రాట్ నేత చక్ షుమెర్ ప్రశంసలు కురిపించారు. ‘మీ బలం, మీ ధైర్యం, మీ స్పష్టత అద్భుతంగా ఉన్నాయి.. అమెరికా మొత్తం మీరు చెప్పే అంశాలపై శ్రద్ధ పెడుతుంది.. ఈ పరిపాలన (ట్రంప్)లో వినాశకరమైన చర్యలు, చాలా సమస్యలు ఉన్నాయని అమెరికా సమాజం మొత్తం తెలుసుకోవాలి.’ అన్నారు.

బుకర్ గంటల తరబడి నిలబడి ఉండగా.. ఆయన టేబుల్ వద్ద రెండు గ్లాసుల నీరు తప్ప మరేమీ లేనట్లు కనిపించింది. ఆయన ప్రసంగం ముగిసిన అనంతరం మీడియాతో మాట్లాడుతూ.. రోజుల తరబడి ఉపవాసం ఉండి, ముందు రోజు రాత్రి ద్రవాలు తాగడం మానేశానని చెప్పారు. ఎక్కువ గంటలు నిలబడి సుదీర్ఘంగా ప్రసంగించడంతో తిమ్మిర్ళతో బాధపడ్డాడనని తెలిపారు. అయినప్పటికీ తన ప్రసంగం సాయంత్రం వరకు సాగడంతో భావోద్వేగాలతో బలంగా మారిందని చెప్పారు.