ఆ 25 వేల మంది టీచర్ల నియామకాలు రద్దు,,,దీదీ సర్కారుకు బిగ్ షాక్

పశ్చిమ బెంగాల్ ప్రభుత్వానికి సుప్రీం కోర్టు గట్టి షాక్ ఇచ్చింది. ముఖ్యంగా ఆ రాష్ట్ర రాజకీయాలను కుదిపేసిన ఉపాధ్యాయ నిమాయక కుంభకోణం కేసులో కోల్‌కతా హైకోర్టు ఇచ్చిన తీర్పును సమర్థించింది. 2016 నాటి స్టేట్ లెవెల్ సెలక్షన్ టెస్ట్ నియమాక ప్రక్రియ చెల్లదని స్పష్టం చేసింది. ముఖ్యంగా ఆ ప్రిక్రియ ద్వారా ఎంపికైన 25 వేల మంది ఉపాధ్యాయులు, నాన్ టీచింగ్ సిబ్బంది ఉద్యోగాలను రద్దు చేస్తున్నట్లు వెల్లడించింది. అలాగే దీని ద్వారా ఉద్యోగాలు పొందిన టీచర్లు ఇప్పటి వరకు పొందిన జీతాలను తిరిగి వాపసు ఇవ్వాల్సిన అవసరం లేదని తెలిపింది. ఆ పూర్తి వివరాలు మీకోసం.

2016 సంవత్సరంలో పశ్చిమ బెంగాల్ ప్రభుత్వం రాష్ట్ర స్థాయి సెలక్షన్ పరీక్షను నిర్వహించింది. దీని ద్వారానే ప్రభుత్వ ప్రాయోజిత, ఎయిడెడ్ పాఠశాలల్లో 9 నుంచి 12వ తరగతు వరకు ఉపాధ్యాయులతో పాటు గ్రూప్ సి, గ్రూప్ డి స్టాఫ్ సిబ్బంది నియమించుకోవాలనుకుంది. అయితే మొత్తంగా 24, 650 ఖాళీల భర్తీ కోసం ఈ పరీక్ష పెట్టగా.. 23 లక్షల మందికిపైగా హాజరయ్యారు. ఇలా తుది ఎంపికలో మొత్తంగా 25 వేల 753 మందిని సెలెక్ట్ చేసుకుని.. వారికి అపాయింట్‌మెంట్ లెటర్లను పంపించింది. అయితే ఈ నియమాక ప్రక్రియలో అవకతవకలు జరిగాయని పెద్ద ఎత్తున ఆరోపణలు వచ్చాయి.

దీనిపై దర్యాప్తు చేపట్టాలంటూ అనేక న్యాయస్థానాల్లో పిటిషన్లు దాఖలు అయ్యాయి. ఈక్రమంలోనే సుప్రీం కల్గజేసుకుని ఈ పిటిషన్లపై విచారణ నిమిత్తం కోల్‌కతా హైకోర్టులో ప్రత్యేక డివిజన్ బెంచ్ ఏర్పాటు చేసింది. అలా ఈ బెంచ్ సుదీర్ఘ విచారణ జరిపి.. నియామకాల్లో అవకతవకలు జరిగాయని తేల్చింది. అందుకే దాన్ని రద్దు చేస్తున్నట్లు ప్రకటించింది. అంతేకాకుండా ఎంపికనై వారందరినీ ఇంటికి పంపించి వేస్తూనే.. వారు తీసుకున్న జీతాలను సైతం తిరిగి ఇచ్చేయాలని తీర్పును ఇచ్చింది. అంతేకాకుండా ఆ నిమాయకాల స్థానంలో కొత్త ప్రక్రియ ప్రారంభించాలని చెప్పింది. దీంతో సర్కారు సుప్రీం కోర్టును ఆశ్రయించింది.

నేడు విచారణ జరిపిన అత్యున్నత న్యాయస్థానం.. కోల్‌కతా హైకోర్టు తీర్పును సమర్థించింది. పశ్చిమ బెంగాల్ సర్కారు చేపట్టిన ఈ నియమాక ప్రక్రియలో అవకతవకలు జరగడం నిజమంటూనే వాటిని రద్దు చేస్తున్నట్లు తీర్పును ఇచ్చింది. ముఖ్యంగా సీజేఐ సంజీవ్ ఖన్నా మరియు జస్టిస్ సంజయ్ కుమార్‌లతో కూడిన ధర్మాసనం.. ఈ కేసులో వాస్తవాలను పరిశీలించామని, మొత్తం ఎంపిక ప్రక్రియలో అవకతవకలు, మోసం ఉన్నాయని పేర్కొంది. అయితే వారందరి వద్ద నుంచి వేతనాలను వెనక్కి తీసుకోవాల్సిన అవసరం లేదని సూచించింది. అలాగే కొత్త ఎంపికను సైతం త్వరగా ప్రారంభించాలని ప్రభుత్వానికి ఆదేశాలు జారీ చేసింది.