8 మంది ప్రాణాలను పొట్టనపెట్టుకున్న పొగమంచు
Andhra Pradesh Telugu | Suryaa Desk | Published : Mon, Dec 24, 2018, 04:28 PM
న్యూఢిల్లీ: ఎడతెరిపి లేకుండా కురుస్తున్న దట్టమైన మంచు కారణంగా దారి కనిపించక 50 వాహనాలు ఒకదానినొకటి ఢీకొనడంతో 8 మంది ప్రాణాలు కోల్పోయారు. పది మంది గాయపడ్డారు. హర్యానాలోని రోహ్తక్-రేవారి హైవేపై ఈ దుర్ఘటన చోటుచేసుకుంది. ఈ ఘటనపై హర్యానా మంత్రి ఓపీ ధన్కర్ విచారం వ్యక్తం చేశారు. మృతుల కుటుంబాలకు రూ.2లక్షల చొప్పున, తీవ్రంగా గాయపడిన వారికి రూ.లక్ష, స్వల్పంగా గాయపడిన వారికి రూ.50 వేలు పరిహారం ప్రకటించారు. పలు కార్లు, టెంపోలు, ట్రక్కులు, స్కూలు బస్సులు ప్రమాదానికి గురైన వాటిలో ఉన్నాయి. ప్రమాదం సంఘటన తెలిసిన వెంటనే పోలీసు అధికారులు ఘటనా స్థలికి చేరుకుని సహాయక కార్యక్రమాలు చేపట్టారు.
పంజాబ్, హర్యానా వ్యాప్తంగా గత వారం రోజులుగా ముమ్మరంగా చలిగాలులు వీస్తున్నాయి. దట్టమైన మంచు కారణంగా అమృత్సర్, లూధియానా, పాటియాలా, బటిండా, గుర్దాస్పూర్, ఫెరోజ్పూర్, హిసార్, కర్నల్, అంబాలా, భివానీ, సిర్సా సహా పలు ప్రాంతాల్లో దారులు కనిపించని పరిస్థితి ఉంది. తరచు ట్రాఫిక్ జామ్లు తలెత్తడం, కంట్రోల్ రూమ్ పోలీసులు రంగంలోకి దిగి వాహనాలను క్లియర్ చేయడం వంటివి జరుగుతున్నాయి. పలు రైళ్లు, విమానాల రాకపోకలను రద్దు చేయడం, దారి మళ్లించడం వంటివి చోటుచేసుకుంటున్నాయి.
|
|