భారత్-బంగ్లాదేశ్ సరిహద్దుల్లో నిఘా పెంపు.. 24 గంటలు బీఎస్ఎఫ్ గస్తీ

బంగ్లాదేశ్‌లో షేక్ హసీనా ప్రభుత్వం పడిపోయి.. మహమ్మద్ యూనస్ నేతృత్వంలో కొనసాగుతున్న తాత్కాలిక ప్రభుత్వం.. భారత వ్యతిరేక విధానాలు అనుసరిస్తూనే పాక్ అనుకూల వాదాన్ని అందుకోవడం ఇప్పుడు మన దేశానికి తీవ్ర తలనొప్పిగా మారింది. ఒకప్పుడు మిత్ర దేశాలుగా ఉన్న భారత్ బంగ్లాదేశ్ కాస్తా ఇప్పుడు శత్రుదేశాలుగా మారిపోతున్నాయి. అదే సమయంలో ఒకప్పుడు శత్రుదేశాలుగా ఉన్న బంగ్లాదేశ్ పాకిస్తాన్‌లు ఇప్పుడు మిత్ర దేశాలు అవుతున్నాయి. పాకిస్తాన్ నుంచి విడిపోయే సమయంలో బంగ్లాదేశ్‌కు భారత్ సహకరించగా.. ఇప్పుడు ఆ కృతజ్ఞతను మరిచిపోయి.. భారత్ పట్ల అక్కసు వెళ్లగక్కుతూ.. పాక్ పంచన చేరుతున్న బంగ్లాదేశ్ తీరు చూసి ప్రపంచ దేశాలు ఆశ్చర్యం వ్యక్తం చేస్తున్నాయి. ఈ నేపథ్యంలోనే బంగ్లాదేశ్-పాకిస్తాన్ సంబంధాలను నిశితంగా గమనిస్తున్న భారత్.. అప్రమత్తంగా వ్యవహరిస్తోంది.

భారత్‌తో బంగ్లాదేశ్‌ జల సరిహద్దులపై బోర్డర్ సెక్యూరిటీ ఫోర్స్-బీఎస్ఎఫ్ నిఘా కట్టుదిట్టం చేసినట్లు అధికారులు పేర్కొన్నారు. భారత్‌లోని పశ్చిమ బెంగాల్, ఈశాన్య రాష్ట్రాలతో.. బంగ్లాదేశ్‌కు 4 వేల కిలోమీటర్ల సరిహద్దు కలిగి ఉంది. గంగ, బ్రహ్మపుత్ర, సుందర్బన్‌ నదులకు 53 కంటే ఎక్కువ ఉప నదులు, వాగులు సరిహద్దులుగా ఉన్నాయి. అయితే నదుల్లో ఎప్పటికప్పుడు నీటి ప్రవాహం మారుతూ ఉంటుంది కాబట్టి ఆ ప్రాంతాల్లో 24 గంటలు నిఘా ఉంచినట్లు బీఎస్‌ఎఫ్‌ వర్గాలు వెల్లడించాయి. ఇందు కోసం ఈస్ట్రన్‌ కమాండ్‌ కొత్తగా తేలియాడే సరిహద్దు ఔట్‌ పోస్టులు ఏర్పాటు చేసినట్లు బోర్డర్ సెక్యూరిటీ ఫోర్స్ పేర్కొన్నాయి. ఇవి రెండు రాష్ట్రాల మధ్య ఉన్న జల సరిహద్దుల్లో గస్తీ నిర్వహణకు సహకరిస్తాయని బీఎస్ఎఫ్ అధికారులు వెల్లడించారు.

ఇక 1970కి ముందు పాకిస్తాన్‌కు చెందిన కొందరు ఉగ్రవాదులు పశ్చిమ బెంగాల్ జలాల ద్వారా జమ్మూ కాశ్మీర్‌లోకి ప్రవేశించేవారని.. ఆ తర్వాత బంగ్లాదేశ్ విడిపోయిన తర్వాత ఆ పరిస్థితి లేదని అధికారులు తెలిపారు. అయితే ప్రస్తుతం బంగ్లాదేశ్‌లో ప్రభుత్వం మారగా.. మళ్లీ పాకిస్తాన్‌ ఉగ్రవాదులు భారత్‌లోకి ప్రవేశించే అవకాశాలు ఉండొచ్చని ఇంటెలిజెన్స్ వర్గాలు పేర్కొన్నాయి. గత 10 రోజుల్లో బెంగాల్‌ సరిహద్దు జలాల నుంచి భారత్‌లోకి ముగ్గురు ఉగ్రవాద అనుమానితులు ప్రవేశించగా.. వారిని అదుపులోకి తీసుకున్నట్లు బీఎస్‌ఎఫ్‌ అధికారులు వెల్లడించారు. దేశంలోకి పాక్ ఉగ్రవాదులు చొరబడేందుకు నీటి మార్గాలను ఎంచుకుంటుండడంతో జల సరిహద్దులపై నిఘా పెట్టినట్లు బీఎస్ఎఫ్ తెలిపింది.