ఏపీ విద్యాశాఖ కీలక నిర్ణయం

హై స్కూళ్లలో తెలుగు, ఇంగ్లీష్ మీడియంలను కలిపి ఒకే మీడియంగా చూడాలంటూ పాఠశాల విద్యాశాఖ ఆదేశాలు జారీ చేసింది. ఒకే మీడియం పేరుతో తెలుగు మీడియాన్ని మూసివేసేందుకు చర్యలు చేపట్టింది. హై స్కూళ్లలో 3,4,5 తరగతుల విలీనం కారణంగా టీచర్ల కొరత ఏర్పడుతోంది. ఈ సమస్యను పరిష్కంచేందుకు 2 మీడియంలను ఒకే మీడియంగా పరిగణిస్తూ అదనపు సెక్షన్లకు టీచర్లను ఇవ్వనున్నట్లు వెల్లడించింది. మీడియంతో సంబంధం లేకుండా 3-10 తరగతులకు ప్రధానోపాధ్యాయుడు, పీఈటీతో కలిపి 9మంది ఉపాధ్యాయులను కేటాయించనున్నట్లు పేర్కొంది.

3,4,5 తరగతుల విలీనానికి సంబంధించి పాఠశాల విద్యాశాఖ తాజా మార్గదర్శకాలను విడుదల చేసింది. తరగతుల విలీనానికి ఇప్పటికే మ్యాపింగ్‌ పూర్తి చేసిన బడులను మరోసారి పరిశీలించాలని ఆదేశించింది. ఫౌండేషన్‌ స్కూళ్లలో 1,2 తరగతుల బోధనకు 30మంది విద్యార్థులకు ఒక ఉపాధ్యాయుడు చొప్పున కేటాయించనున్నారు. ప్రైమరీ స్కూళ్ల నుంచి 3,4,5 తరగతులను హై స్కూళ్లకు తరలిస్తే మిగిలే 1,2 తరగతుల్లో విద్యార్థుల సంఖ్య తక్కువగా ఉండే స్కూళ్లు అధికంగా ఉన్నాయి. 30 మందికి ఒక్కరినే కేటాయిస్తే తక్కువ మంది ఉన్న చోట రెండు తరగతుల బోధనకు ఒక్కరే మిగులుతారు.

హైస్కూళ్లకు 3,4,5 తరగతులను తరలించిన తర్వాత ప్రైమరీ స్కూల్ లో మిగిలే 1,2 తరగతుల బోధనకు అక్కడ ఉన్న అందరి కంటే జూనియర్‌ టీచర్లను కేటాయిస్తారు. మిగిలే ఉపాధ్యాయులతో పాటు ప్రధానోపాధ్యాయుడిని హై స్కూళ్లకు అనుసంధానం చేస్తారు.

హై స్కూళ్లలో 3-10 తరగతులకు ప్రధానోపాధ్యాయుడు, పీఈటీతో కలిపి 9 మంది ఉంటారు. ఈ లెక్కన ఒక్కో స్కూల్‌ అసిస్టెంట్‌కు వారానికి 48 పీరియడ్స్‌ వరకు బోధించాల్సి వస్తుంది.

అవసరమయ్యే హై స్కూళ్లకు పని సర్దుబాటు కింద జిల్లా, మండలాల్లో మిగులు సిబ్బందిని కేటాయిస్తారు.

ఒకే ప్రాంగణంలో ఉండే 1-10 తరగతులను తల్లిదండ్రుల కమిటీ తీర్మానంతో మిశ్రమ పాఠశాలగా మార్పు చేస్తారు.

హై స్కూళ్లలో తరగతి గదులు లేకపోతే 3,4,5 తరగతులను ప్రైమరీ స్కూళ్లలోనే నిర్వహిస్తారు. హై స్కూల్ కి చెందిన సబ్జెక్టు ఉపాధ్యాయులు వెళ్లి తరగతులు తీసుకుంటారు. ప్రధానోపాధ్యాయులు పర్యవేక్షణ చేస్తారు.