వ‌రెవ్వా బొంగు చికెన్..!

బొంగు చికెన్‌ ఇప్పుడు బాగా పాపులర్‌ అయ్యింది. పెద్ద పెద్ద రెస్టారెంట్లలో కూడా ఈ వంటకాన్ని మెనూలో చేరుస్తున్నారు. విశాఖ‌ జిల్లా అర‌కు, బొర్రా గుహ‌ల‌ అటవీ ప్రాంతంలోని గిరిజన తెగకు చెందిన వారు బొంగు చికెన్‌ను క‌మ్మ‌గా త‌యారు చేస్తున్నారు. ‘‘ఈ ప్రాంతంలో ఉన్న అందమైన సెలయేళ్లు, వెదురు బొంగు చికెన్‌ కారణంగా పర్యాటకులు ఎక్కువగా వస్తుంటారు. ఇటీవలి కాలంలో టూరిస్టుల సంఖ్య పెరగడంతో.. వెదురు బొంగు చికెన్ అమ్మాకాలు పెరుగుతున్నాయి.

ఇలా తయారవుతుంది..!

ప్రత్యేకమైన వెదురు బొంగును ఎంచుకుని.. మ్యారినేట్‌ చేసిన చికెన్‌ను ఇందులో స్టఫ్‌ చేస్తారు. బొగ్గుల మంట మీద ఈ వెదురు బొంగును ఉంచి, లోపలి చికెన్‌ కాలేలా చూస్తారు. ఇందులో ఒక్క చుక్కనూనె కూడా ఉపయోగించరు. వెదురు బొంగులోకి వెళ్లే ఆవిరి ద్వారానే లోపల ఉన్న చికెన్‌ కాలుతుంది. ఈ విధానంలోనే వెదురు షూట్‌ కర్రీ, వెదురు చట్నీ కూడా తయారుచేస్తారు. విదేశీయులు సైతం బొంగు చికెన్‌ను ఇష్టంగా తింటున్నారు.

ఇంటిల్లిపాదికీ..!

‘ఏడాదిగా.. చికెన్‌ ధరలు బాగా పెరిగిపోయాయి. అయినా ప‌ర్యాట‌కుల‌కు అందుబాటు ధ‌ర‌లో బొంగు చికెన్ అంద‌జేస్తున్నారు. కేజీకి ఆరేడు ప్లేట్లు వస్తుంది’’ అంటున్నారు ఇక్క‌డ గిరిజ‌నులు.

అదే ఆకర్షణ..!

మావోయిస్టులు విస్తృతంగా సంచరించే ప్రాంతం నుంచి ఈ వంటకం ఎక్కడ పుట్టిందనే విషయంలో స్పష్టత లేదు. ఈ వంటకం గురించిన సమాచారం ఇతర రాష్ట్రాలకు ఎలా చేరిందో కూడా పూర్తిగా తెలియదు. ఎక్కడ నుంచి ఎలా వచ్చింది అనే విషయం భోజన ప్రియులకు అనవసరం. ఈ వంటకాన్ని తయారుచేసే విధానమే అందరినీ ఆకర్షిస్తోంది. వెదురు బొంగులోకి చికెన్‌ను స్టఫ్‌ చేసి, బొగ్గుల మీద నెమ్మదిగా కాల్చడం వల్ల చికెన్‌ చక్కగా ఉడికి, వెదురులో స్రవించే రసంతో కలిపి, మెత్తగా, రుచికరంగా తయారవుతుంది.

పెరుగుతున్న ఆదరణ..!

బొంగు చికెన్‌ తినేవారి సంఖ్య పెరిగిపోవడంతో.. వెదురుచెట్లను కొట్టేయవలసి వస్తోంది. అందువల్ల అటవీశాఖ అధికారులు వెదురు చెట్లను విస్తృతంగా పెంచుతూ, గిరిజనులకు సహాయపడుతున్నారు. ఇప్పుడు అక్కడ ఏసీ హోటల్స్‌ కూడా అందుబాటులో ఉన్నాయి. అటవీశాఖవారు వాటర్‌ ఫాల్స్, పార్కులను అభివృద్ధి చేసి, పర్యావరణాన్ని కాపాడుతున్నారు. పర్యాటక స్థలాన్ని అక్కడి గిరిజనులే నిర్వహిస్తున్నారు. దేశ విదేశాల్లో ఉన్న ప్ర‌జ‌లంతా ఇప్పుడు పిక్నిక్ సీజ‌న్ కావ‌డంతో మ‌న్యంలో విహ‌రించేందుకు త‌ర‌లివస్తున్నారు. బొంగు చికెన్‌ తింటుంటారు. ఎంతైనా ఒక్కసారైనా బొంగు చికెన్ తినాలి అనిపించడం లో ఆశ్యర్యం లేదు. మరి మీకు..?