అలా విడాకులు...ఇలా పెళ్లి..పాక్ నేతపై విమర్శల వెల్లువ

జీవితంలో పెళ్లి అన్నది మరపురాని ఘటన. కానీ ఆ ఘటన అతడి జీవితంలో మూడే సారి జరిగింది. పాకిస్థాన్‌కు చెందిన ఓ రాజకీయ నాయకుడు విడాకులు తీసుకున్న రోజే మూడో పెళ్లి చేసుకున్నారు. ఆ విషయాన్ని ఇన్‌స్టా‌గ్రామ్ ద్వారా తెలియజేశారు. పాకిస్థాన్ జాతీయ అసెంబ్లీ సభ్యుడు అమీర్ లియాఖత్ (49) తన భార్య, పాక్‌ నటీ తుబా అమీర్‌ నుంచి బుధవారం డైవర్స్ తీసుకున్నారు. అదే రోజు ఆయన 18 ఏళ్ల సయేదా దానియా షాను వివాహం చేసుకున్నారు. ఆ విషయాన్ని ఇన్‌స్టాగ్రామ్ ద్వారా తెలియజేశారు. తమను అందరూ ఆశీర్వదించాలని, తమ కోసం ప్రార్థన చేయాలని కోరారు. పైగా తన గత జీవితాన్ని చీకటితో పోల్చారు. అదొక రాంగ్ టర్న్‌గా అభివర్ణించారు. పెళ్లికి ముందే కొత్త భార్య గురించి అమీర్ లియాఖత్ సోషల్‌ మీడియాలో పోస్టులు చేశారు. అలాగే పెళ్లి తర్వాత ఇద్దరు ఒక టీవీకి ఆయన ఇంటర్వ్యూ కూడా ఇచ్చారు. ఈ సందర్భంగా అమీర్ లియాఖత్‌తో చిన్నప్పుడే ప్రేమలో పడినట్టు దానియా తెలిపింది. ఆయనను టీవీలో చూసి ఇష్టపడ్డానని చెప్పింది. ఇప్పుడు అమీర్ లియాఖత్‌తో పెళ్లి జరగడం నమ్మలేకపోతున్నానని తెలిపింది. కాగా వారిద్దరూ పెళ్లి చేసుకోవడంతో పాకిస్థాన్ ప్రధాని ఇమ్రాన్ ఖాన్ అమీర్ లియాఖత్‌కు శుభకాంక్షలు తెలియజేశారు. అయితే అమీర్ లియాఖత్ పెళ్లిపై అనేక విమర్శలు వెల్లువెత్తుతున్నాయి. తనకన్నా ఎంతో చిన్నదైన అమ్మాయిని పెళ్లి చేసుకోవడంతో సోషల్ మీడియాలో నెటిజన్లు మీమ్స్‌ను కురిపిస్తున్నారు. వారిద్దరి మధ్య 31 ఏళ్లు తేడా ఉండటంతో సెటైరికల్‌గా కామెంట్లు పెడుతున్నారు. అమీర్‌ లియాఖత్‌ 18 ఏళ్ల కిందటే తన భార్యను ఎత్తుకున్నారంటూ ఒకరు ట్వీట్‌ కూడా చేశారు.