ఆ హీరోయిన్ వెంట పడుతున్న సుడిగాలి సుధీర్...!

బుల్లి తెరపై సుడిగాలి సుధీర్, రష్మీ గౌతమ్ పండించే రొమాన్స్ ఓ రేంజ్‌లో ఉంటుంది. వీరిద్దరు కలిసి వచ్చారంటే చాలు.. ప్రేక్షకులు కళ్లప్పగించి చూస్తారు. సుధీర్ పాటలతో, డైలాగులతో రష్మీని బుట్టలో పడేసేందుకు ప్రయత్నిస్తుంటే.. నీకంత సీన్ లేదంటూ రష్మీ కౌంటర్ ఇస్తే.. నవ్వులే నవ్వులు. వాస్తవానికి వీళ్లిద్దరు పెళ్లి చేసుకుంటే చూడాలని ఉందని ఎందరో అభిమానులు ఆరాటపడుతుంటారు. వాళ్లు కూడా ప్రేక్షకుల ఆసక్తికి తగ్గట్లు లవ్‌లో పడ్డట్లు, పెళ్లికి సిద్ధమవుతున్నట్లు స్కిట్లు, డైలాగులతో అలరిస్తుంటారు. అయితే, తమ ఇద్దరి మధ్య మాత్రం రియల్ లైఫ్‌లో ఎలాంటి అఫైర్ లేదని, మంచి స్నేహితులమని చెబుతుంటారు. ఇదే విషయాన్ని చాలా సందర్భాల్లో స్పష్టం చేశారు కూడా. కానీ, సోషల్ మీడియాలో కామెంట్లు, స్ఫూఫ్ వీడియోలు మాత్రం ఆగడం లేదు. అయితే, బుల్లి తెరపై వీరిద్దరు కోపంతో అలిగినా, ఒకరినొకరు తిట్టుకున్నట్లు కనిపించినా, రష్మీ కళ్లముందు సుధీర్ వేరేవాళ్లకు లైన్ వేసినా, రష్మీ వేరే వాళ్లకు లైన్ వేసినా.. అభిమానులు తట్టుకోలేరు. దాన్ని అస్త్రంగా చేసుకొనే పలు కార్యక్రమాల నిర్వాహకులు రష్మీ, సుధీర్‌ మధ్య వేరొకర్ని ఎంటర్ చేయించి.. కాస్త కారాలు మిరియాలు నూరేలా, దానికింత మసాలా దట్టించేలా షోలను రక్తి కట్టిస్తారు. తాజాగా, అలాంటి ఘటనే ఢీ ఛాంపియన్స్‌లో చోటుచేసుకుంది. ‘ఢీ’ కార్యక్రమం నుంచి యాంకర్ ప్రదీప్ తప్పుకోవడంతో టీమ్ లీడర్లుగా ఉన్న రష్మీ, సుధీర్ యాంకర్ల పాత్రను చేపట్టారు. వీరిస్థానంలో రవి, వర్షిణి టీమ్ లీడర్లుగా కొనసాగుతున్నారు. శేఖర్ మాస్టర్, ప్రియమణి, పూర్ణ జడ్జిలుగా ఉన్నారు. అయితే, నిన్న (బుధవారం) ప్రసారమైన ఢీ ఛాంపియన్స్ షోలో పూర్ణ గైర్హాజరైంది. దీంతో.. ఆమె స్థానంలో ఒకప్పటి ప్రముఖ తార లైలాను గెస్ట్‌గా తీసుకొచ్చారు. ఆమె వేదికపైకి రాగానే సుధీర్ ఆశ్చర్యపోయాడు. వేదికపైకి వచ్చింది మొదలు.. ఆమె అక్కడ ఉన్నంతసేపు సుధీర్ గాల్లో తేలిపోయాడు. పైగా, ఆమె చేయి పట్టి జడ్జి సీట్లో కూర్చోబెట్టాడు. ఈ సన్నివేశాన్ని చూసిన రష్మీ కాస్త షాక్ అయ్యింది. సుధీర్‌ను కొట్టాలి అన్నట్లు వెనకనుంచి సైగ చేసింది. అతడు వేదిక మీదకు తిరిగి వస్తుండగా పక్కకు వెళ్లు అన్నట్లు చిరు కోపం ప్రదర్శించింది కూడా.