బోయపాటి ఇప్పుడన్నా మారుతాడా

‘వినయ విధేయ రామ’ రిలీజైన తొలి రోజు దాని గురించి ఏ రేంజిలో ట్రోలింగ్ నడిచిందో తెలిసిందే. ఎప్పుడూ బాలయ్యే ఇలాంటి ట్రోలింగ్‌లకు కేంద్రం అవుతుంటాడు. కానీ ఈసారి ఆ ప్లేసులోకి రామ్ చరణ్ వచ్చాడు. ఐతే బాలయ్యతో ఏ దర్శకుడు ఎలాంటి విన్యాసం చేయించినా... ప్రధానంగా ట్రోల్ అయ్యేది బాలయ్యే.

దర్శకుల్ని పట్టించుకోరు. కానీ ‘వినయ విధేయ రామ’ విషయంలో చరణ్ కంటే కూడా దర్శకుడు బోయపాటి శ్రీనునే ఎక్కువ క్రెడిట్ తీసుకోవాల్సి వచ్చింది. తీవ్ర స్థాయిలో ట్రోలింగ్ రుచి చూడాల్సి వచ్చింది. నిజానికి బోయపాటి ప్రతి సినిమాలోనూ కొంత అతి కనిపిస్తుంటుంది. కానీ వేరే ఆకర్షణలతో కవర్ చేయడం వల్ల ఆ అతి మరుగున పడుతూ వచ్చింది. కానీ ‘వీవీఆర్’ విషయంలో తేడా వచ్చింది. కథలో దమ్ము లేకపోవడం, ఎమోషన్ మిస్సవడంతో తెరపై హీరోతో చేయించిన విన్యాసాలు కామెడీ అయిపోయాయి.

ఈ సినిమా వల్ల బోయపాటికి విపరీతమైన డ్యామేజ్ జరిగిందని.. దీన్నుంచి ఇప్పుడిప్పుడే కోలుకోవడం కష్టమని అంతా అనుకున్నాడు. అతడి కథలు.. మేకింగ్ స్టైల్ కూడా ఔట్ డేట్ అయిపోయిందని.. తర్వాతి సినిమాకు మారకపోతే చాలా చాలా కష్టమని అన్నారు. కానీ ‘వినయ విదేయ రామ’ టాక్‌కు, కలెక్షన్లకు సంబంధం లేదు. ఎంత పేలవమైన టాక్ వచ్చినప్పటికీ ఈ చిత్రం మంచి వసూళ్లతో సాగిపోతోంది.

ఫుల్ రన్లో బయ్యర్ల పెట్టుబడి సగం వెనక్కి రావడం కూడా కష్టమనుకుంటే.. వారం రోజుల్లోనే 65 శాత రికవరీతో ఆశ్చర్యపరిచింది. సంక్రాంతి పండగ అడ్వాంటేజీ వల్ల ఆడేసిందేమో అనుకుందామంటే.. ‘యన్.టి.ఆర్’ సినిమా పాజిటివ్ టాక్ తెచ్చుకుని కూడా చతికిలపడింది. కానీ ‘వీవీఆర్’ రివ్యూల్ని తట్టుకుని మంచి వసూళ్లు సాధించింది.

ఇందులో కొన్ని సీన్లపై సోషల్ మీడియాలో ఎంత సెటైర్లు పడ్డా మాస్ జనాలు అవేమీ పట్టించుకోకుండా సినిమా చూస్తున్నారు. దీంతో మాస్ ప్రేక్షకులకు కావాల్సిందే బోయపాటి వడ్డించి కొంత మేర సక్సెస్ అయ్యాడనే మాట వినిపిస్తోంది. బోయపాటి తన మార్కు మాస్ అంశాల్ని విడిచి పెట్టాలా వద్దా అనే విషయంలో భిన్నాభిప్రాయాలు వ్యక్తమవుతున్నాయి. ఐతే అతను పూర్తిగా మారాలనీ చెప్పలేం. అలాగని ఇప్పుడున్నట్లే ఉండాలని అనలేం. కొంచెం మారాలి. కొంచెం తన మాస్ టచ్ కొనసాగించాలి. కొంచెం మద్యస్థంగా ఉండే సినిమాలు తీస్తే ఇంకొంత కాలం సర్వైవ్ కాగలడేమో. ‘వీవీఆర్’కు కూడా వసూళ్లు వచ్చాయి కదా అని ఇలాంటి మైండ్ లెస్ మాస్ మసాలా మరోసారి వడ్డిస్తానంటే మాత్రం కష్టం.