జీవిత చరిత్రల సినిమాలకు బాడ్ టైం నడుస్తుంది

మహానటి ఇచ్చిన స్ఫూర్తి ఏమో కానీ అందరూ పొలోమని బయోపిక్ లు మొదలుపెట్టుకోవడం ఇప్పుడు లబోదిబోమనేలా చేస్తోంది. ఇప్పటికే నిర్మాణంలో ఉన్నవి స్క్రిప్ట్ ని మరోసారి విశ్లేషించుకునే పనిలో పడ్డాయి. జనవరి నెలలో వీటికి చేదు అనుభవాలు మిగల్చడమే కారణం. ఎన్టీఆర్ కథానాయకుడు హిట్ అయ్యుంటే ఎలా ఉండేదో కానీ దారుణమైన డిజాస్టర్ గా మిగిలిపోవడం చూస్తే స్టార్ హీరో ఉన్నంత మాత్రాన జనం ఎగబడి చూడరన్న క్లారిటీ వచ్చేసింది. మరోవైపు కంగనా రౌనత్ దర్శకుడు క్రిష్ ల మధ్య నలిగిపోయి బయటికి వచ్చిన మణికర్ణిక ఫలితం కూడా ఇదే దిశగా వెళ్తోంది.

నార్త్ లో కొంత వరకు పర్వాలేదు అనిపించుకుంటున్నా పెట్టిన పెట్టుబడి వెనక్కు వచ్చే సూచనలు కనిపించడం లేదు  కాబట్టి ట్రేడ్ దీన్ని ప్లాప్ గా డిక్లేర్ చేసింది. ఇక శివసేన వ్యవస్థాపకుడు బాల్ థాకరే జీవితం ఆధారంగా రూపొందిన థాకరేను ముంబైలో తప్ప ఇంకెక్కడా కనీసం పట్టించుకున్న నాథుడే లేడు. పోనీ సినిమా బాగుంటే విమర్శకులు మెచ్చుకుని ఉండేవాళ్ళు. భజన తప్ప ఏమి లేని ఈ బయోపిక్ నవాజుద్దీన్ సిద్ధిక్ కెరీర్ లో పెద్ద బాంబ్ గా మిగిలింది.

హిందీలో బయోపిక్ ల ట్రెండ్ ఇప్పుడు మొదలైంది కాదు కాబట్టి ఇప్పటికిప్పుడు ఆగేది కాదు. భాగ్ మిల్కా భాగ్ తో మొదలుకుని మేరీ కోమ్-ధోని-సచిన్ అంటూ ఎన్నో వచ్చాయి సక్సెస్ అయ్యాయి. కానీ గమనించాల్సిన అంశం ఏమిటంటే బ్రతికున్న వాళ్ళ బయోపిక్స్ మాత్రమే మంచి ఫలితం ఇస్తున్నాయి. పోయిన వాళ్ళ కథల్లో మహానటి తప్ప అంత గొప్పగా ఆడినవేవి కనిపించడం లేదు. సెట్స్ పై ఉన్న వాటిలో కాంతారావు-ఘంటశాల లాంటివి ఏమైనా మార్పులు చేసుకుంటాయేమో చూడాలి. మొత్తం ఈ ఏడాది 25 దాకా బయోపిక్స్ వస్తాయని అంచనా. ఇందులో అధిక శాతం సక్సెస్ అయితేనే కొత్తవాటికి ఊతం వస్తుంది. లేకపోతే 2020కి బయోపిక్ లన్నీ దుకాణం సర్దుకోవాల్సిందే