|
|
by Suryaa Desk | Thu, Jan 30, 2025, 09:13 AM
గతంలో హిట్ అయిన సినిమా టైటిల్‌ను రిపీట్‌ చేస్తూ సినిమాలు రావడం జరుగుతున్నదే. అయితే ఇద్దరు హీరోలు నటించిన వేర్వేరు చిత్రాలకు ఒకే టైటిల్ పెట్టడం, ఒకే రోజు కొన్ని గంటల వ్యవధిలో ఆ రెండు చిత్రాల టైటిల్స్‌ అనౌన్స్‌ చేయడం తమిళ చిత్ర పరిశ్రమలో ఇప్పుడు చర్చనీయాంశం అయింది. విజయ్ ఆంటోనీ హీరోగా అరుణ్‌ ప్రభు దర్శకత్వంలో రూపుదిద్దుకుంటున్న చిత్రానికి ‘శక్తి తిరుమగణ్‌’ అని తమిళ్‌లో.. తెలుగులో ‘పరాశక్తి’ అని టైటిల్ పెట్టినట్లు ప్రకటించారు. ఇది ఆయనకు 25వ చిత్రం కావడం గమనార్హం. శివకార్తీకేయన్‌ హీరోగా సుధా కొంగర దర్శకత్వంలో ఓ సినిమా తెరకెక్కుతున్న సంగతి తెలిసిందే. ఈ సినిమాకు కూడా ‘పరాశక్తి’ అనే టైటిల్‌ను మేకర్స్‌ ఖరారు చేశారు. శివ కార్తికేయన్‌కు కూడా ఇది 25వ చిత్రమే.73 ఏళ్ల క్రితం ఏవీఎం సంస్థ ‘పరాశక్తి’ పేరుతో ఓ చిత్రం నిర్మించింది. వారి అనుమతితో శివ కార్తికేయన్‌ హీరోగా నిర్మిస్తున్న చిత్రానికి ‘పరాశక్తి’ టైటిల్‌ను పెట్టినట్లు చిత్ర నిర్మాణ సంస్థ డాన్‌ పిక్చర్స్‌ వెల్లడించింది. మరో వైపు విజయ్ ఆంటోనీ తన చిత్రానికి ‘పరాశక్తి’ అనే టైటిల్‌ను సౌత్‌ ఇండియన్‌ ఫిల్మ్‌ ఛాంబర్‌లో రిజిస్టర్‌ చేశారు. ఇప్పుడు వీరిద్దరిలో ఎవరు వెనక్కి తగ్గుతారో వేచి చూడాలి.
Latest News