తెలంగాణలో మంకీపాక్స్‌ కేసుల భయం,,,,మెడికల్ కిట్లు అందుబాటులో ఉంచాలని మంత్రి సూచన

కరోనా మహమ్మారి నుంచి అన్ని దేశాలు ఇప్పుడిప్పుడు కోలుకుంటుండగా.. మంకీపాక్స్ కలవర పెడుతోంది. ఇప్పటికే ఆఫ్రికా దేశాల్లో శరవేగంగా ఈ వైరస్ వ్యాపిస్తోంది. మిగతా దేశాలకు కూడా పాకుతోంది. ఎంపాక్స్‌పై అప్రమత్తమైన ప్రపంచ ఆరోగ్య సంస్థ.. గ్లోబల్ హెల్త్ ఎమర్జెన్సీని ప్రకటించింది. దీంతో మంకీపాక్స్ వైరస్‌ను మన దేశంలోకి రాకుండా అడ్డుకోవడమే లక్ష్యంగా ప్రధాని మోదీ రెండ్రోజుల క్రితం అత్యవసర సమావేశం ఏర్పాటు చేశారు. ప్రిన్సిపల్ సెక్రటరీ డాక్టర్ పీకే మిశ్రా నేతృత్వంలోని అధికారుల బృందంతో ప్రధాని ఉన్నత స్థాయి సమీక్ష నిర్వహించారు. మంకీపాక్స్‌ని ఎలా ఎదుర్కోవాలనే విషయంపై అధికారులతో చర్చించారు. ఈ సందర్భంగా అన్ని రాష్ట్రాలకు కీలక సూచనలు చేశారు.

కేంద్రం సూచనలతో తెలంగాణ ప్రభుత్వం అప్రమత్తమైంది. మంకీపాక్స్‌పై అలర్ట్‌గా ఉండాలని రాష్ట్ర వైద్య, ఆరోగ్య శాఖ మంత్రి దామోదర్‌ రాజనర్సింహ ఆ శాఖ అధికారులరు కీలక ఆదేశాలు జారీ చేశారు. మంకీపాక్స్‌ నివారణకు అవసరమైన మెడికల్‌ కిట్లు, మెడిసిన్ సిద్ధంగా ఉంచాలన్నారు. ఈ మేరకు సోమవారం (ఆగస్టు 19) సచివాలయంలో మంకీపాక్స్‌పై వైద్య, ఆరోగ్యశాఖ ఉన్నతాధికారులతో మంత్రి సమీక్షా సమావేశం నిర్వహించారు. రాష్ట్రంలో ఈ వ్యాధికి సంబంధించి ఎలాంటి కేసులు నమోదు కాలేదని చెప్పారు. ప్రజలు భయపడాల్సిన అవసరం లేదని స్పష్టం చేశారు. అయితే ముందుజాగ్రత్త చర్యగా గాంధీ, ఫీవర్‌ హాస్పిటల్స్‌లో స్పెషల్ వార్డులు అందుబాటులో ఉండేలా ఏర్పాట్లు చేయాలన్నారు.

మంకీపాక్స్ లక్షణాలు..

ఎంపాక్స్‌ను మంకీపాక్స్ అని కూడా అంటారు.

1958లో కోతులలో పాక్స్ లాంటి వ్యాధి వ్యాప్తి చెందినప్పుడు దీనిని తొలిసారిగా గుర్తించారు.

మంకీపాక్స్‌ బాధితుల్లో కూడా జ్వరం, ఒళ్లు నొప్పులు, అలసట, చర్మంపై దద్దుర్లు వంటి లక్షణాలు ఉంటాయి.

దద్దుర్లు తీవ్రమైన నొప్పిని కలుగజేస్తాయి.

దక్షిణాఫ్రికాలో ఇప్పటికే అంతమైన మంకీపాక్స్‌ వ్యాధి.. స్వలింగ సంపర్గం వల్లే ఇతర దేశాలకు వ్యాపించి ఉంటుందనే అనుమానాలు ఉన్నాయి.

సాధారణంగా ఎంపాక్స్ వైరస్ రెండు నుంచి నాలుగు వారాల ఉంటుంది

వ్యాధిగ్రస్తులతో సుదీర్ఘమైన, సన్నిహిత సంబంధం ద్వారా వైరస్ వ్యాప్తిచెందుతుంది.

మంకీఫాక్స్ వ్యాక్సిన్ అందుబాటులో ఉంది.

స్మాల్‌పాక్స్ (మశూచి) వ్యాక్సిన్‌నే మంకీపాక్స్ బాధితులకు ఇస్తున్నారు.

డెన్మార్క్‌కు చెందిన బవారియన్ నోర్డిక్ కంపెనీ మాత్రమే మంకీపాక్స్ నివారణకు వ్యాక్సిన్‌ను తయారు చేస్తోంది.