'మహాత్మా క్షమించు.. మళ్లీ ఇలా చేయం'.. తప్పు ఒప్పుకుని, బుద్ధితెచ్చుకున్న యువకులు

దీపావళి పండుగ సందర్భంగా.. ఓ ముగ్గురు యువకులు టపాసులు కాల్చుతూ.. ఓ లక్ష్మీబాంబును మహాత్మా గాంధీ నోట్లో పెట్టి పేల్చిన హైదరాబాద్ బోయినపల్లి ఘటన.. తీవ్ర చర్చనీయాంశంగా మారిన విషయం తెలిసిందే. అందుకు సంబంధించిన వీడియో ఆలస్యంగా వెలుగులోకి వచ్చినా.. సోషల్ మీడియాలో తెగా వైరల్ అయ్యింది. కాగా.. దానిపై నెటిజన్లు తీవ్ర స్థాయిలో స్పందించారు. ఆ యువకులను ఊరికే వదిలిపెట్టకూడదని.. చట్టప్రకారం శిక్షించాలంటూ సామాన్య నెటిజన్ల నుంచి రాజకీయ నేతల వరకు హైదరాబాద్ పోలీసులను కోరారు.

అయితే.. రాత్రికి రాత్రే ఏం జరిగిందో తెలియదు కానీ.. ఆ వెర్రి వెధవ పని చేసిన ఆకతాయిలకు బుద్దొచ్చింది. టింగుమని జ్ఞానోదయం కలిగింది. తాము చేసిన తప్పును తెలుసుకున్న ఆ యువకులు.. ఎక్కడైతే మహాత్మ గాంధీ నోట్ల బాంబు పేల్చారో.. మళ్లీ అదే గాంధీజీ విగ్రహం దగ్గరికొచ్చి.. ఇంకో వీడియో చేశారు. ఈసారి.. "మహాత్మా మిన్నించు.. ఇంకోసారి ఇలాంటివి చేయం.." అంటూ గాంధీజీ విగ్రహాన్ని శుభ్రంగా కడిగి, తుడిచి, పూల దండేసి, దండం పెట్టి క్షమాపణలు కోరారు.

అనంతరం మాట్లాడిన ఆ యువకులు.. "తెలిసీ తెలియక దీపావళి రోజు గాంధీ విగ్రహం వద్ద తప్పు చేశాం. మళ్లీ ఎప్పుడు చేయం. మహాత్మా గాంధీ అంటే మాకు గౌరవం. క్షమించండి." అంటూ స్వచ్ఛందంగానే ముందుకొచ్చి చెప్పిన వీడియోను విడుదల చేశారు. కేవలం ఆ యువకులే కాదు.. తమ పిల్లలను క్షమించాలని, ఇలాంటివి పునరావృతం కాకుండా చూసుకుంటామని.. వాళ్ల తల్లిదండ్రులు కూడా క్షమాపణలు కోరారు. దీంతో.. ఈ వివాదానికి పుల్ స్టాప్ పడ్డట్టయింది. ఏ వ్యక్తికైనా.. తాను చేసిన తప్పును తెలుసుకుని ప్రయశ్చితం చేసుకోవటమో.. క్షమాపణ అడగటం కంటే పరివర్తన ఇంకేముంటుంది. అయితే.. పోలీసులు ఎలాంటి చర్యలు తీసుకుంటారనేది ఇప్పుడు సర్వత్రా చర్చనీయాంశంగా మారింది.

 ఈ వీడియోపై కూడా నెటిజన్లు రకరకాలు స్పందిస్తున్నారు. భయం వల్లో, బెదిరిస్తేనో మొత్తానికి ఆ ఆకతాయిల్లో పరివర్తన వచ్చిందని.. కొందరు అభిప్రాయపడుతుంటే.. సోషల్ మీడియాలో జరిగిన రచ్చకు దెబ్బకు భయపడిపోయారని మరికొందరు.. ఇంట్లో అమ్మానాన్నలు గట్టిగానే కోటింగ్ ఇచ్చుంటారు.. అందుకే ఈ రియాక్షన్ అని ఇంకొందరు కామెంట్లు చేస్తున్నారు. అయితే.. పోలీసుల దగ్గరికి వెళ్తే కేసులు, కోర్టులంటూ తమ జీవితం నాశనమవుతుందని ఎవరైనా చెప్పారో.. లేదా వాళ్లే సోషల్ మీడియాలో, మీడియాలో జరిగిన ప్రచారాన్ని చూసి భయపడ్డారో కానీ.. మొత్తానికి క్షమించమని అడుగుతూ వీడియో విడుదల చేయటంతో.. పరిస్థితి కొంత సద్దుమణిగినట్టే. అయితే.. భవిష్యత్తులోనూ బుద్ధిగా ఉంటూ ఇలాంటి ఆకతాయి పనులు చేయకుండా ఉంటే అదే మంచిది.