తండ్రిగా ఎంతో గర్విస్తున్నా.. హిమాన్షు ఇవ్వకుండా దాచేసిన గిఫ్ట్‌పై కేటీఆర్ ఎమోషనల్ ట్వీట్

తండ్రి కొడుకుల మధ్య ఉన్న అనుబంధం మాటల్లో చెప్పలేనిది. చిన్నప్పటి నుంచి తండ్రినే హీరోగా చూసే కొడుకులు ఎంతో మంది ఉంటారు. వాళ్ల కోసం ప్రాణాలు కూడా ఇచ్చేంత ప్రేమ ఉంటుంది. అయితే.. తమ ప్రేమను కొంత మంది మాత్రమే వ్యక్తపరుస్తుంటారు. చాలా మంది తండ్రి మీద ప్రేమను వ్యక్తపరచకుండా గుండెల్లోనే పదిలంగా దాచుకుంటారు. అందుకు ఎన్నో కారణాలు.. కొందరికి గౌరవం అడ్డొస్తే మరికొందరికి భయం అడ్డుపడుతుంది.. ఇంకొందరికైతే కారణం కూడా ఏమీ ఉండదు.. అయినా "నాన్న ఐ లవ్ యూ" అని చెప్పే ధైర్యం చేయలేక.. ఆ మాటను ఎన్నో సార్లు మౌనంగానే మనసులో చెప్పుకుంటూ ఉంటారు. నిజానికి ఆ మాట బయటికి చెప్పినా.. చాలా మంది తండ్రులు కాస్త ఆశ్చర్యంగానూ, అనుమానంగానూ చూస్తారనుకోండి. బయటికి చెప్పకుండా లోలోపలే పెంచుకునే గౌరవప్రదమైన ప్రేమానురాగాల బంధమే తండ్రి కొడుకుల మధ్య ఉండే అనుబంధం.

అయితే.. చాలా మంది తండ్రీకొడుకులు మాత్రం స్నేహితుల్లా ఉండటం గమనిస్తుంటాం. బీఆర్ఎస్ వర్కింగ్ ప్రెసిడెంట్ కేటీఆర్ ఆయన కుమారుడు హిమాన్షు కూడా అదే కోవకు వస్తారు. వాళ్లిద్దరూ తండ్రీకొడుకులే అయినా బెస్ట్ ఫ్రెండ్స్‌లా ఉంటారు. ఈ విషయం చాలా సందర్భాల్లో వ్యక్తపరిచారు కూడా. అయితే.. తన తండ్రిపై తనకున్న ప్రేమను హిమాన్షు వ్యక్తపరిచే ప్రయత్నం చేశాడు. కేటీఆర్ పుట్టిన రోజున తన ప్రేమను తెలియజేసేలా ఓ గిఫ్ట్ ఇవ్వాలని భావించాడు కానీ.. కొన్ని కారణాల వల్ల ఇవ్వలేకపోయారు.

హిమాన్షుది ఫక్తు రాజకీయ నేపథ్యం ఉన్న కుటుంబం అయినప్పటికీ.. అతనికి సింగింగ్ మీద మక్కువ. ఇప్పటికే.. ఓ ఇంగ్లీష్ ఆల్బమ్‌ని తన గాత్రంతో ఆలపించి తన యూట్యూబ్ ఛానల్‌లో ఆప్‌లోడ్ చేసి.. పలువురి ప్రశంసలు అందుకున్నాడు హిమాన్షు. కాగా.. తనకు ఎంతో నచ్చిన సింగింగ్‌ రూపంలోనే తండ్రికి బర్త్‌ డే గిఫ్ట్ ఇవ్వాలని ప్రయత్నించాడు. తండ్రీ కొడుకుల మధ్య ఉన్న అనుబంధాన్ని తెలిపే "యానిమల్" సినిమాలోని నాన్న పాటను తన స్వరంతో ఆలపించాడు హిమాన్షు. అయితే.. అవుట్‌పుట్ తాను అనుకున్న స్థాయిలో రాలేదని భావించిన హిమాన్షు.. ఆ ఆల్బమ్‌ని తండ్రి కేటీఆర్‌కు ఇవ్వకుండానే దాచేశాడు. అయితే.. హిమాన్షు దాచేసిన ఆ ఆల్బమ్‌ను కేటీఆర్ ఇటీవలే వినటమే కాదు.. దాన్ని ట్విట్టర్ వేదికగా అందరితో పంచుకున్నారు కూడా. ఈ మేరకు ఎమోషనల్ ట్వీట్ చేశారు.

"కష్టతరమైన సంవత్సరంలో నాకు దొరికిన ఉత్తమ బహుమతి. థ్యాంక్యూ బింకు (హిమాన్షు). గాత్రం నచ్చింది. జూలైలో వచ్చిన నా పుట్టినరోజు కోసం నా కొడుకు దీన్ని రికార్డ్ చేశాడు. కానీ అది సరిపోదని భావించి విడుదల చేయకుండా ఆపేశాడు. నేను గత వారమే మొదటిసారి విన్నాను. నాన్నగా చాలా గర్వంగా ఉంది." అంటూ కేటీఆర్ ఆ పాటను ట్వీట్ చేశారు. ఈ ట్వీట్ మీద నెటిజన్లు తమదైన శైలిలో స్పందిస్తున్నారు. తండ్రి కుమారుల మధ్య ప్రేమను తెలిపే ఈ పాటను హిమాన్షు తన గాత్రంతో ఆలపించి.. తనకు తన తండ్రిపై ఉన్న ప్రేమను వ్యక్తపరచటం నిజంగా అభినందనీయమంటూ కామెంట్లు చేస్తున్నారు.