ఎంపీటీసీ, జెడ్పీటీసీ, మున్సిపల్ ఎన్నికలు ఎప్పుడు..,ఆ నెలలోనేనా..?

తెలంగాణలో పంచాయతీ ఎన్నికల కోలాహలం ముగియడంతో.. ఇప్పుడు అందరి దృష్టి ఎంపీటీసీ, జెడ్పీటీసీ, మున్సిపల్ ఎన్నికలపై పడింది. రాజకీయ పార్టీలు, అభ్యర్థులు ఈ ఎన్నికల కోసం ఆత్రుతగా ఎదురుచూస్తున్నారు. అయితే ఇప్పట్లో ఎంపీటీసీ, జెడ్పీటీసీ ఎన్నికల నగారా మోగే అవకాశం లేదని స్పష్టమవుతోంది. రాష్ట్ర ఎన్నికల సంఘం నుండి అందుతున్న సంకేతాల ప్రకారం.. జనవరి చివరి వరకు ఎలాంటి ఎన్నికలు నిర్వహించే అవకాశం లేదు. దీనికి ప్రధాన కారణం ఓటరు జాబితా సవరణ ప్రక్రియ.

రాష్ట్ర ఎన్నికల సంఘం ఓటరు జాబితాను సమగ్రంగా సవరించాలని నిర్ణయించింది. కేంద్ర ఎన్నికల సంఘం 2026 జనవరి మొదటి వారంలో విడుదల చేయనున్న తాజా ఓటరు జాబితాను ప్రామాణికంగా తీసుకోవాలని అధికారులు భావిస్తున్నారు. ఆ జాబితా అందిన తర్వాత, స్థానిక సంస్థల ఎన్నికల కోసం వార్డుల వారీగా ఓటర్ల విభజన చేయాల్సి ఉంటుంది. చట్ట ప్రకారం అర్హులైన ప్రతి ఒక్కరికీ ఓటు హక్కు కల్పించాల్సిన బాధ్యత ఎన్నికల సంఘంపై ఉంది. ఈ ప్రక్రియ పూర్తి కాకుండా ఎన్నికలకు వెళ్తే న్యాయపరమైన చిక్కులు ఎదురయ్యే ప్రమాదం ఉందని అధికారులు ముందస్తు జాగ్రత్తలు తీసుకుంటున్నారు.

గతంలో జులై నెలలో చివరిసారిగా ఓటరు జాబితా సవరణ జరిగింది. ఆ తర్వాత సర్పంచ్, ఎంపీటీసీ, జెడ్పీటీసీ ఎన్నికల షెడ్యూల్ విడుదలైనప్పటికీ కోర్టు ఆదేశాలతో నోటిఫికేషన్ రద్దు కావడం వంటి పరిణామాలు చోటుచేసుకున్నాయి. కేవలం పంచాయతీ ఎన్నికలను మాత్రమే నిర్వహించడంతో మిగిలిన ఎన్నికల కోసం ఓటరు జాబితాను సవరించడం సాధ్యపడలేదు. జులై నుంచి డిసెంబర్ మధ్య కాలంలో ఓటు హక్కు పొందిన కొత్త ఓటర్లకు అవకాశం కల్పించలేదనే కారణంతో ఇప్పటికే దాదాపు 50 వరకు కోర్టు కేసులు నమోదయ్యాయి. ఈసారి ఎంపీటీసీ, జెడ్పీటీసీ ఎన్నికల్లో ఇటువంటి పొరపాట్లు పునరావృతం కాకూడదని అధికారులు పట్టుదలగా ఉన్నారు.

మున్సిపల్ ఎన్నికల నిర్వహణకు సంబంధించి కూడా కొన్ని అడ్డంకులు ఉన్నాయి. మున్సిపాలిటీల్లో వార్డుల విభజనకు సంబంధించిన పూర్తి వివరాలు ప్రభుత్వం నుంచి ఎన్నికల సంఘానికి ఇంకా అందలేదు. వార్డుల విభజన ప్రక్రియ పూర్తయితే తప్ప, వార్డుల వారీగా ఓటరు జాబితాను రూపొందించడం సాధ్యం కాదు. జనవరి మూడో వారం నుంచి ఓటరు జాబితా సవరణ ప్రక్రియ ప్రారంభమయ్యే అవకాశం ఉంది. ఈ జాబితా ఖరారైన తర్వాతే పోలింగ్ స్టేషన్ల ఏర్పాటు, ఇతర ఎన్నికల ఏర్పాట్లు వేగవంతం అవుతాయి.

మొత్తానికి, చట్టపరమైన ఇబ్బందులు లేకుండా, పారదర్శకంగా ఎన్నికలు నిర్వహించాలన్నదే అధికారుల ఆలోచన. ఓటరు జాబితా సవరణ లేకుండా ఎన్నికలు నిర్వహించడం అసాధ్యమని అధికారులు తేల్చి చెబుతున్నారు. కాబట్టి, కొత్త ఏడాదిలో ఫిబ్రవరి లేదా ఆ తర్వాతి నెలలోనే రాష్ట్రంలో మిగిలిన స్థానిక సంస్థల ఎన్నికలు జరిగే అవకాశం కనిపిస్తోంది. అప్పటి వరకు అభ్యర్థులు తమ వ్యూహాలకు పదును పెడుతూ నిరీక్షించక తప్పదు.