పెళ్లి కట్నకానుకలుగా రూ.2.5కోట్ల డబ్బు, రూ.75 లక్షల కారు.. పెళ్లి చేసిన వ్యక్తికి రూ.11 లక్షలు

పెళ్లి చేసే సమయంలో వధువు కుటుంబ సభ్యులు.. వరుడి కుటుంబానికి భారీగా కట్నకానుకలు సమర్పిస్తుండటం మనం చూస్తూనే ఉంటాం. ఇక ధనవంతులు అయితే.. కోట్ల రూపాయల డబ్బులు, బంగారం, నగలు, కార్లు, బంగ్లాలు ఇవ్వడం.. సర్వసాధారణమే. అయితే తాజాగా జరిగిన ఓ పెళ్లిలో వరుడికి వధువు కుటుంబం ఇచ్చిన డబ్బు, నగలు చూసి.. అంతా షాక్ అవుతున్నారు. ఎందుకంటే పెళ్లికి కట్నంగా రూ.2.5 కోట్ల నగదును అందించారు. అంతేకాకుండా రూ.75 లక్షల లగ్జరీ కారును బహుమతిగా ఇచ్చారు. ఇక ఆ పెళ్లి చేసిన వ్యక్తికే ఏకంగా రూ.11 లక్షలు ఇవ్వడం గమనార్హం. ఇక ఆ పెళ్లికి సంబంధించిన వీడియో ఇప్పుడు సోషల్ మీడియాలో తెగ వైరల్‌గా మారడంతో నెటిజన్లు కామెంట్ల వర్షం కురిపిస్తున్నారు.

ఉత్తర్‌ప్రదేశ్‌లోని మీరట్‌లో జరిగిన ఈ పెళ్లి ఇప్పుడు సోషల్ మీడియాలో సెన్సేషన్‌గా మారింది. ఇక వైరల్ అవుతున్న వీడియోను చూస్తుంటే అది ఒక ముస్లిం పెళ్లి అని అర్థం అవుతోంది. మీరట్‌లోని నేషనల్ హైవే-58కి పక్కన ఉన్న రిసార్ట్‌లో జరిగిన ఈ పెళ్లిలో డబ్బుల సూట్‌కేస్‌లే దర్శనం ఇచ్చాయి. ఇక పెళ్లి కుమార్తె తరఫున కుటుంబ సభ్యులు.. పెళ్లి కుమారుడి కుటుంబానికి మొత్తం రూ.2.5 కోట్ల డబ్బులు అందించినట్లు ఆ వీడియోలో వెల్లడైంది. ఇక పెళ్లి కుమార్తె తరఫు బంధువులకు.. జూటా చూరై (పెళ్లి కుమారుడి షూలను దొంగింలించడం)సంప్రదాయం ప్రకారం.. రూ.11 కోట్లు గిఫ్ట్‌గా ఇచ్చారు. ఇక మౌలానా(ముస్లిం పెళ్లి జరిపించే వ్యక్తి)కు రూ.11 లక్షలు బహుమతి అందించారు. మరోవైపు.. స్థానికంగా ఉన్న మసీదుకు రూ.8 లక్షల బహుమతి ఇచ్చారు.

ఇక అదే వీడియోలో.. వరుడికి ఒక లగ్జరీ కారు ఇచ్చేందుకు రూ.75 లక్షలు ఇస్తున్నట్లు ఓ వ్యక్తి ప్రకటించాడు. అందుకు సంబంధించిన డబ్బుల సూట్‌కేసులను భారీగా వరుడి కుటుంబ సభ్యులకు అందించారు. ఇక అందులో నుంచి రూ.8 లక్షలను వధువు తరఫు బంధువులకు ఇచ్చారు. ఆ రూ.8 లక్షలను.. ఘజియాబాద్‌లోని మసీదుకు రూ.8 లక్షలు ప్రకటించారు. వధువు కుటుంబం ఘజియాబాద్‌కు చెందింది. ఇక పెళ్లి కుమారుడి వైపు ఉన్న పెళ్లి పెద్దకు రూ.11 లక్షలు అందించారు. ఇక పెళ్లి కొడుకు షూ దొంగతనం చేసినవారికి రూ.11 లక్షలు ఇచ్చారు.

అయితే ఈ మొత్తం వ్యవహారానికి సంబంధించి ఓ వ్యక్తి వీడియో తీస్తుండగా అడ్డుకున్నారు. ఈ పెళ్లిని ఎలాంటి మీడియా ఆర్భాటాలు లేకుండా చాలా ప్రైవేటుగా.. రిసార్ట్‌లో ఏర్పాటు చేశారు. ఇక ఆ వీడియోను ఓ వ్యక్తి సోషల్ మీడియాలో పోస్ట్ చేయడంతో తెగ వైరల్ అవుతోంది. ఈ డబ్బుల సూట్‌కేసులు, కట్నకానుకలు చూసి నెటిజన్లు నోరెళ్లబెడుతున్నారు.