మూడు రాష్ట్రాలకు మోస్ట్ వాంటెడ్ నక్సలైట్ హిడ్మా.. ఎన్‌కౌంటర్‌లో హతం

మూడు రాష్ట్రాల పోలీసులకు కొరకరాని కొయ్యగా మారి సవాల్ విసురుతున్న మడావి హిడ్మా అలియాస్ చైతు మధ్యప్రదేశ్‌లో జరిగిన ఎన్ కౌంటర్‌లో హతమయ్యాడు. అయితే, పోలీసులు కాల్పుల్లో హిడ్మా చనిపోయాడంటూ గతంలోనూ వార్తలు వచ్చినా.. కొద్ది రోజులకే తాను బతికే ఉన్నానంటూ ప్రకటించి పోలీసులకు షాకిచ్చాడు. తాజాగా, మధ్యప్రదేశ్‌లో జరిగిన ఎన్‌కౌంటర్‌లో చనిపోయాడంటూ ప్రచారం జరుగుతోంది. పక్కా సమాచారంతో ఎంపీ పోలీసులకు చెందిన హాక్ ఫోర్స్ సిబ్బంది బాలాఘాట్ జిల్లా గాధి పోలీస్ స్టేషన్ పరిధిలోని ఖామ్‌కోదాదర్ అటవీ ప్రాంతంలో హిడ్మాను హతమార్చాయి.

దట్టమైన ఈ ప్రాంతాల్లో భద్రతా బలగాలపై మావోయిస్టులు పలుమార్లు దాడులకు పాల్పడ్డారు. మధ్యప్రదేశ్, ఛత్తీస్‌గఢ్, మహారాష్ట్రలకు హిడ్మా మోస్ట్ వాంటెండ్‌గా ఉన్నాడు. అతడిపై ఏకంగా రూ.14 లక్షల రివార్డు కూడా ఉంది. హిడ్మా స్వస్థలం ఛత్తీస్‌గఢ్‌లోని బిజపుర్ జిల్లా మిర్తూర్. గోండియా-రాజ్‌నంద్‌గావ్- బాలాఘాట్ డివిజన్‌లో చురుకుగా వ్యవహరించేప్రత్యేక జోనల్ కమిటీ సభ్యుడు (SZCM) రాజేష్ అలియాస్ దామాకు హిడ్మా సన్నిహితుడు. అతడి సోదరుడు సేతు మడకమ్ కూడా నక్సలైట్. దళానికి డిప్యూటీ కమాండర్‌గా వ్యవహరిస్తున్నాడు.

ఈ ఏడాది ఇప్పటివరకు మధ్యప్రదేశ్‌లో మూడు ఎన్ కౌంటర్లు చోటుచేసుకోగా... ఇద్దరు మహిళలు సహా నలుగురు మావోయిస్టులు హతమయ్యారు. అయితే, హిడ్మా ఎలా ఉంటాడో ప్రత్యక్షంగా చూడలేదు. బయట ప్రపంచానికి కనిపించిందీ లేదు. దాదాపు 40 ఏళ్ల ఉంటాయని, బక్కపలచని దేహంతో చాలా మృదువుగా మాట్లాడుతాడని అతడి గురించి తెలిసినవాళ్లు చెబుతుంటారు. దాదాపు దశాబ్ద కాలంగా దండకారణ్యంలో ఉంటూ.. మావోయిస్టులు పాల్పడిన అనేక విధ్వంసాలకు రూపకల్పన చేసేది హిడ్మానే అని పోలీసుల విచారణలో తేలింది.

హిడ్మా టార్గెట్ చేస్తే పక్కాగా ఉంటుందని అంటారు. అతడి ఆపరేషన్లలో అనేక మంది పోలీసుల దుర్మరణం చెందారు. దాదాపు పదికి పైగా దాడులల్లో కీలకంగా వ్యవహరించాడు.1996-97 ప్రాంతంలో తన 17 ఏళ్ల వయసులో మావోయిస్టు పార్టీలో చేరిన హిడ్మా.. మాడావి, హిద్మల్లు, సంతోష్ పేర్లతో పని చేశాడు. కేవలం ఏడో తరగతి మాత్రమే చదివిన హిడ్మా.. 2000 ప్రాంతంలో మావోయిస్టులకు అవసరమైన ఆయుధాల తయారీ విభాగంలో పనిచేశాడు. 2001-02 దక్షిణ బస్తర్ జిల్లా ప్లటూన్ విభాగంలో నియమితుడై మావోయిస్టు సాయుధ విభాగం (పీపుల్స్ లిబరేషన్ గెరిల్లా ఆర్మీ)లో చేరాడు. 2001 నుంచి 2007 దాకా అతడు సాధారణ మావోయిస్టు పార్టీ సభ్యుడుగానే ఉన్నాడు. తర్వాత సల్వాజుడుం ఎదుగుదల హిడ్మాను మరింత యాక్టివ్ చేసింది. 1990 దశకం మధ్యలో బస్తర్ ప్రాంతంలో దెబ్బతిన్న మావోయిస్టు పార్టీ తిరిగి పుంజుకునేందుకు స్థానికుల్లో సల్వాజుడుంపై ఏర్పడిన ప్రతీకారమే ఒక కారణంగా తెలుస్తోంది.