నేను ఇండియన్ ను:ఆనంద్ మహింద్రా

ఓ నెటిజన్ ప్రశ్నకు తనదైన శైలీలో ట్విట్టర్ లో సమాధానం ఇచ్చారు ఆనంద్ మహింద్రా. ఇండియన్ బిలియనీర్లలో ఒకరు, దిగ్గజ మహీంద్రా అండ్ మహీంద్రా కంపెనీ చైర్మన్ ఆనంద్ మహీంద్రా గురించి చాలా మందికి తెలిసే ఉంటుంది. ఈయన సోషల్ మీడియాలో కూడా చాలా యాక్టివ్‌ ఉంటారు. సమకాలీన అంశాలపై ఎప్పటికప్పుడు స్పందిస్తారు. అలాగే వినూత్నమైన ఆలోచనలను, భిన్నమైన అంశాలను అందరితోనూ పంచుకుంటారు. ఇప్పుడు కూడా ఒక ట్వీట్ చేశారు. అయితే ఇది ఒక నెటిజన్ అడిగిన ప్రశ్నకు సమాధానం ఇచ్చారు. ఒక నెటిజన్‌ ఆనంద్‌ మహీంద్రాను మీరు ఏ మతానికి చెందిన వారు అని తలతిక్క ప్రశ్న అడిగాడు. ‘అడగడం తెలివితక్కువ ప్రశ్న అని నాకు తెలుసు.. అయితే నన్ను తెలివి తక్కువవాడిగానే ఉండనివ్వండి. ఆప్‌ పంజాబీ హై సర్‌? (మీరు పంజాబీనా, సర్‌?)’ అని నెటిజన్ ట్వీట్ చేశాడు. అయితే దీనికి మహీంద్రా గ్రూప్ చైర్మన్ ఆనంద్ మహీంద్రా మంచి రిప్లే ఇచ్చారు. నువ్వు అడిగింది తెలివితక్కువ ప్రశ్న కాదు.. కానీ నా సమాధానం మాత్రం ఇండియన్ అని ట్వీట్ చేశారు. ఆనంద్ మహీంద్రా రిప్లే‌కు నెటిజన్లు ఫిదా అయిపోయారు. ఆయన ట్వీట్‌ను రీట్వీట్ చేస్తున్నారు. ఇకపోతే ఆనంద్ మహీంద్రా కొన్ని రోజలు కిందట ఒక ట్వీట్ చేశారు. ఇందులో ఒక వీడియో ఉంది. అది కారు వీడియో. కారు అంటే కారు కాదు. ఒక వ్యక్తి సొంతంగా దీన్ని తయారు చేశాడు. పాత విడిభాగాలను తీసుకొని ఫోర్ వీలర్‌ను రూపొందించాడు. ఇది టూవీలర్ మెకానిజం కలిగి ఉండటం గమనార్హం. అంటే కిక్ కొడితే వెహికల్ స్టార్ట్ అవుతోంది. ఈ కారు చూడటానికి బాగుంది. చిన్నగా ఉంది. దీన్ని ఆనంద్ మహీంద్రా ట్వీట్ చేశారు. ‘ఈ కారు నిబంధనలకు అనుగుణంగా లేకపోవచ్చు. కానీ తక్కువ వనరులతో ఎక్కువ ఫలితాన్ని చూపెట్టే మన ప్రజల తెలివితేటలను మెచ్చుకోకుండా ఉండలేకపోతున్నాను’ అని ట్వీట్ చేశారు. ఈ ట్వీట్ వైరల్ అయిపోయింది. ఆనంద్ మహీంద్రా కొద్దిసేపటి తర్వాత ఈ కారుకు సంబంధించి మరో ట్వీట్ చేశారు. ‘స్థానిక అధికారులు ఇప్పుడైనా లేదంటే తర్వాత అయినా ఈ వాహనాన్ని రోడ్డు పైకి రాకుండా నిలిపివేస్తారు. ఎందుకంటే ఈ వాహనం నిబంధనలకు అనుగుణంగా లేదు. ఆయన తన వాహనాన్ని నాకు ఇస్తే నేను వ్యక్తిగతంగా ఆయనకు బొలెరో ఇస్తాను. ఆయన సృజనాత్మకతను మహీంద్రా రీసెర్చ్‌లో ప్రదర్శనకు ఉంచుతాం. మాకు స్ఫూర్తిని నింపుతుంది’ అని తెలిపారు.