భార్య కోసం భారీ ప్లాన్ వేసిన నితిన్..

తేజ దర్శకత్వంలో విడుదలైన `జయం` సినిమాతో ఇండస్ట్రీకి వచ్చిన టాలీవుడ్ యంగ్ హీరో నితిన్ గురించి ప్రత్యేకంగా పరిచయాలు అవసరం లేదు. చిత్ర పరిశ్రమలో అడుగుపెట్టిన అనతికాలంలోనే తనకంటూ ఓ ఇమేజ్ క్రియేట్ చేసుకున్నాడీయన. ఇక ఇటీవల భీష్మ సినిమాతో సూపర్ హిట్ కొట్టిన నితిన్‌.. ప్రస్తుతం వరుస సినిమాలతో దూసుకుపోతున్నారు. మరోవైపు బ్రహ్మచర్యానికి స్వస్తి పలికి ఓ ఇంటివాడు కూడా అయిపోయాడు. ఈ నెల 26న పండితులు నిశ్చయించిన మూహూర్తానా.. ప్రియురాలు షాలినితో నితిన్ వివాహం జరిగింది.
ప్రభుత్వ నియమ నిబంధనలను అనుసరిస్తూ.. హైదరాబాద్ ఫలక్‌నామా ప్యాలస్‌లో సన్నిహితుల సమక్షంలో నితిన్‌, షాలిని వివాహం ఘనంగా జరిగింది. వాస్తవానికి దుబాయ్‌ లో ఏప్రిల్ 16న డెస్టినేషన్ వెడ్డింగ్ జరుపుకోవాలని అనుకున్నాడు నితిన్‌. అయితే కరోనా కారణంగా అలా వేసుకున్న ప్లాన్ ముందుకుసాగలేదు. ఇక ఈ నెల 26న వారిద్దరికీ సరిపోయేలా ముహూర్తం కుదరడంతో వధూవరుల కుటుంబ సభ్యులు అదే రోజు వేడుకను ముగించారు. అయితే వివాహం ఎలాగో ముందుగా ప్లాన్ చేసుకున్నట్లు జరగలేదని.. ఇప్పుడు హనీమూన్ కోసమైనా విదేశాలకు వెళ్లాలని నితిన్ భావిస్తున్నట్టు తెలుస్తోంది.
అది కూడా షూటింగ్ లో భాగంగానే వెళ్లేలా ప్లాన్ చేసుకుంటున్నాడట ఈ యంగ్ హీరో. కాగా, ప్రస్తుతం అట్లూరి దర్శకత్వంలో `రంగ్ దే` అనే సినిమా చేస్తున్న సంగతి తెలిసిందే. సితార ఎంటర్టైమెంట్స్ బ్యానర్ పై సూర్యదేవర నాగవంశీ నిర్మిస్తున్న ఈ చిత్రంలో నితిన్ సరసన కీర్తి సురేష్ నటిస్తోంది. ఇక ఈ సినిమా సాంగ్స్ షూట్ కోసం విదేశాలకు వెళ్లాల్సి ఉందట. కానీ, జూలై 31 వరకు ఇంటర్నేషనల్ ట్రావెలింగ్ నిషేధించబడింది. ఒకవేళ విదేశీ ప్రయాణంపై బ్యాన్ ఎత్తేసి పరిస్థితులు అనుకూలిస్తే చిత్ర యూనిట్ తో పాటు నితిన్ తన భార్య షాలినిని కూడా తీసుకువెళ్లాలని ప్లాన్ చేస్తున్నాడట. మరి నితిన్ ప్లాన్ ఎంత వరకు వర్కౌట్ అవుతుందో చూడాలి.