అనుమతులు లేకుండా అక్రమ నిర్మాణాలు.. ప్రముఖ సినీ నటుడు అలీకి నోటీసులు

అనుమతులు లేకుండా అక్రమ నిర్మాణాలు చేపట్టినందుకు ప్రముఖ సినీ నటుడు అలీకి నోటీసులు జారీ అయ్యాయి. ఈ మేరకు వికారాబాద్‌ జిల్లా నవాబుపేట మండలం ఎక్‌మామిడి గ్రామ పంచాయతీ సెక్రటరీ అలీ పనివారికి నోటీసులు అందజేశారు. గ్రామ పంచాయతీ నుంచి ఎటువంటి అనుమతులు లేకుండా అలీ తన ఫామ్‌హౌస్‌లో అక్రమ నిర్మాణాలు చేపట్టారని.. అందుకు వివరణ ఇవ్వాలని నోటీసుల్లో పేర్కొన్నారు.

వివరాల్లోకి వెళితే.. వికారాబాద్‌ జిల్లా నవాబుపేట మండలం ఎక్‌మామిడి గ్రామ పంచాయతీ పరిధిలో అలీకి వ్యవసాయ భూమి ఉంది. ఆయన కుటుంబంతో కలిసి తరుచుగా అక్కడకు వెళ్తుంటారు. అయితే అందులో ఎటువంటి అనుమతి లేకుండానే ఫామ్ హౌస్ నిర్మించినట్లు తెలిసింది. గ్రామ పంచాయతీ అనుమతి లేకుండా.. పన్ను చెల్లించకుండా ఫామ్ హౌస్‌లో నిర్మాణాలు చేపట్టినట్లు గుర్తించారు. ఈ మేరకు గ్రామ పంచాయతీ సెక్రటరీ నోటీసులు అందజేశారు. అక్రమ నిర్మాణాలకు సంబంధించి ఈ నెల 5న మెుదటిసారి నోటీసు ఇవ్వగా ఎటువంటి స్పందనా రాలేదు. దీంతో ఈనెల 22న మరో నోటీసు జారీ చేసినట్లు తెలిసింది. ఫామ్‌హౌస్‌లో పని చేసే వారికి నోటీసులు అందించామని సెక్రటరీ వెల్లడించారు.

హైడ్రా కూల్చివేతలపై కీలక నిర్ణయం..

ఇక గ్రేటర్ హైదరాబాద్ పరిధిలోని చెరువులు, కుంటలు, ప్రభుత్వ స్థలాల పరిరక్షణ కోసం హైడ్రా వ్యవస్థను ఏర్పాటు చేసిన సంగతి తెలిసిందే. ఇప్పటికే హైడ్రా నగరవ్యాప్తంగా పలు ప్రాంతాల్లో కూల్చివేతలు చేపట్టింది. దాదాపు 300కు పైగా నిర్మాణాలను నేలమట్టం చేసింది. సినీ హీరో నాగార్జునకు చెందిన ఎన్ కన్వెన్షన్ కూల్చివేతతో హైడ్రా పేరు మార్మోగింది. మాదాపూర్‌లో చెరువును కబ్జా చేసి నాగార్జున ఎన్ కన్వెన్షన్ నిర్మించారని దాన్ని నేలమట్టం చేశారు. అయితే ఈ మధ్య హైడ్రా కాస్త జోరు తగ్గించింది.

ఈ నేపథ్యంలో హైడ్రా కూల్చివేతలపై కమిషనర్ ఏవీ రంగనాథ్ కీలక ప్రకటన చేశారు. ఎఫ్‌టీఎల్ పరిధిలోని నిర్మాణాలను కూల్చబోమని చెప్పారు. అయితే ఇక నుంచి ఇచ్చే అనుమతులపై నిర్మాణాలు చేపడితే మాత్రం కూల్చివేతలు చేపట్టనున్నట్లు వెల్లడించారు. ఇక చెరువులు, కుంటల ఎఫ్‌టీఎల్ పరిధిని నిర్ధారించేందుకు లేటెస్ట్ టెక్నాలజీతో సర్వే నిర్వహిస్తున్నట్లు రంగనాథ్ వెల్లడించారు.