తిరుపతి తొక్కిసలాట.. టీటీడీ అత్యవసర భేటీ.. కీలక నిర్ణయాలు

సీఎం నారా చంద్రబాబు నాయుడు ఆదేశాల మేరకు శుక్రవారం టీటీడీ పాలకమండలి అత్యవసరంగా భేటీ అయ్యింది. ఈ అత్యవసర భేటీలో టీటీడీ పాలకమండలి పలు కీలక నిర్ణయాలు తీసుకుంది. తొక్కిసలాట ఘటనలో చనిపోయినవారి మృతికి తొలుత సంతాపం వ్యక్తం చేశారు. అలాగే తిరుపతి తొక్కిసలాట ఘటనలో చనిపోయిన వారి కుటుంబాలకు రూ. 25 లక్షలు చొప్పున పరిహారం ఇవ్వాలని టీటీడీ పాలకమండలి భేటీలో నిర్ణయించారు. అలాగే తొక్కిసలాటలో తీవ్రంగా గాయపడిన వారికి రూ. 5 లక్షలు, గాయపడిన వారికి రూ. 2 లక్షలు చొప్పున ఇవ్వాలని నిర్ణయించారు.

తొక్కిసలాట ఘటనలో చనిపోయిన వారి పిల్లల చదువుకు అయ్యే పూర్తి ఖర్చును భరించాలని టీటీడీ పాలకమండలి నిర్ణయించింది. బాధితుల కుటుంబాలకు టీటీడీ సిబ్బంది నేరుగా వెళ్లి పరిహారం అందజేస్తారు. తొక్కిసలాట ఘటనపై జ్యుడీషియల్ విచారణ అనంతరం బాధ్యులపై చర్యలు తీసుకుంటామని టీటీడీ ఛైర్మన్ బీఆర్ నాయుడు తెలిపారు. చనిపోయిన వారి కుటుంబ సభ్యుల్లో ఒకరికి కాంట్రాక్టు ఉద్యోగం కల్పిస్తామని వెల్లడించారు. తొక్కిసలాట ఘటన ఉద్దేశపూర్వకంగా జరిగిన ఘటన కాదన్న టీటీడీ ఛైర్మన్.. ఏర్పాట్లు సరిగ్గా లేని ఒకటి రెండుచోట్ల తొక్కిసలాట జరిగిందన్నారు.

వైకుంఠ ద్వార దర్శనాలకు సంబంధించి ప్రస్తుతం ఉన్న ప్రకారమే.. ఈ ఏడాది 10 రోజులపాటు వైకుంఠ ద్వార దర్శనాలు కల్పిస్తామని టీటీడీ ఛైర్మన్ వెల్లడించారు. వైకుంఠ ద్వార దర్శనాలను రెండు రోజులు మాత్రమే నిర్వహించే విషయమై ఆగమ సలహా మండలి సూచనల మేరకు నిర్ణయం తీసుకుంటామన్నారు. వైకుంఠ ద్వార దర్శనాల రోజుల్లో శ్రీవారి దర్శనానికి టోకెన్ కావాలని మాత్రమే చెప్పామన్న బీఆర్ నాయుడు.. కొండపైకి యథావిధిగా భక్తులను అనుమతిస్తామని చెప్పినట్లు గుర్తు చేశారు.

మరోవైపు తిరుపతి తొక్కిసలాట ఘటనలో ఆరుగురు చనిపోయిన సంగతి తెలిసిందే. ఈ నేపథ్యంలో శ్రీవారి భక్తులకు, బాధిత కుటుంబాలకు ఏపీ డిప్యూటీ సీఎం పవన్ కళ్యాణ్ క్షమాపణలు కోరారు. అలాగే టీటీడీ ఛైర్మన్, ఈవోలు కూడా క్షమాపణలు చెప్పాలన్నారు. ఈ వ్యాఖ్యలపై టీటీడీ ఛైర్మన్ బీఆర్ నాయుడు స్పందించారు. తప్పు జరిగిందనీ.. క్షమాపణ చెప్తే చనిపోయిన వారిని తిరిగి తీసుకురాలేం కదా అని అన్నారు. జ్యుడిషియల్ విచారణలో అన్ని విషయాలు బయటకు వస్తాయని.. ఎవరో ఏదో చెప్పినదానికి తాము స్పందించాల్సిన అవసరం లేదని టీటీడీ ఛైర్మన్ బీఆర్ నాయుడు స్పష్టం చేశారు. ఇకపై ఇలాంటి ఘటనలు పునరావృతం కాకుండా చర్యలు తీసుకుంటామని టీటీడీ ఛైర్మన్ బీఆర్ నాయుడు చెప్పారు.