మరదలు కులాంతర వివాహం చేసుకుంటే భర్తకు విడాకులా

ఈ మధ్య ప్రేమ వివాహాలు చాలా ఎక్కువ అవుతున్నాయి. కుల మత భేదాలు లేకుండా అనేక మంది యువతీ యువకులు మనసుకు నచ్చిన వాళ్లతో ప్రేమలో పడుతున్నారు. పెద్దలు ఒప్పుకోకపోయినా పెళ్లి బంధంతో ఒక్కటి అవుతూ.. హాయిగా జీవిస్తున్నారు. ఓ యువతి కూడా అలాగే చేసింది. కానీ ఆమె చేసుకున్న ఈ కులాంతర వివాహమే తన అన్న జీవితాన్ని నాశనం చేసింది. ముఖ్యంగా పెళ్లి చేసుకున్న రెండు రోజులకే అతడి భార్య అతడిని వదిలి వెళ్లడానికి కారణం అయింది. ఈ కథేంటో మనం ఇప్పుడు తెలుసుకుందాం.

గుజరాత్‌లోని అహ్మదాబాద్‌కు చెందిన ఓ యువకుడు 2018లో.. కుటుంబ సభ్యులు చూపించిన అమ్మాయిని పెళ్లి చేసుకున్నాడు. అయితే పెళ్లి జరిగిన రెండు రోజులకే అతడి భార్య ఇంటి నుంచి పుట్టింటికి వెళ్లిపోయింది. ఇక ఎప్పటికీ తిరిగి రానని చెబుతూ.. విడాకుల కోసం కూడా దరఖాస్తు చేస్తానని కూడా వివరించింది. అది విన్న యువకుడు, అతడి కుటుంబ సభ్యులు అంతా షాక్ అయ్యారు. అసలు ఎందుకు విడాకులు తీసుకోవాలనుకుంటున్నావో చెప్పు అంటూ కొత్త కోడలిని అడిగారు. దీనికి ఆమె చెప్పిన సమాధానం విని షాక్ అయ్యారు.

భర్తకు మొత్తం ముగ్గురు చెల్లెల్లు ఉండగా.. ఇద్దరే ఉన్నారని తనతో అబద్ధం చెప్పాడని వివరించింది. అయితే తన మూడో చెల్లెలు ఇతర కులానికి చెందిన అబ్బాయిని ప్రేమించి పెళ్లి చేసుకుంది. దీంతో కుటుంబ సభ్యులు ఆమెతో మాట్లాడడం మానేశారు. పెళ్లి చూపులకు వెళ్లినప్పుడు, పెళ్లి జరుగుతున్నప్పుడు కూడా కాబోయే కోడలుకు మూడో కూతురు గురించి చెప్పలేదు. ఇద్దరే చెల్లెల్లు అని వివరించారు. అయితే పెళ్లి రోజు అబ్బాయి మూడో చెల్లి అక్కడకు రావడంతో.. కొత్త పెళ్లి కూతురు విషయం తెలుసుకుంది. భర్తే కావాలని తన వద్ద నిజం దాచాడని అతడిపై కోపం పెంచుకుంది.

ముఖ్యంగా భర్త చెల్లెలు కులాంతర వివాహం చేసుకుందని.. అలాంటి వాళ్లతో తాను ఎప్పటికీ కలిసుండలేనంటూ విడాకులు తీసుకోవాలని నిర్ణయించుకుంది. రెండేళ్ల పాటు అతడికి దూరంగానే ఉన్న ఆమె 2020లో భావ్‌నగర్ ఫ్యామిలీ కోర్టులో విడాకుల కోసం దరఖాస్తు చేసుకుంది. భర్త క్రూరంగా తనకు అబద్ధాలు చెప్పాడంటూ ఆరోపించగా.. న్యాయస్థానం ఈ జంటకు 2024 సెప్టెంబర్ 30వ తేదీన విడాకులు మంజూరు చేసింది. కానీ ఆ విషయం జీర్ణించుకోలేకపోయిన భర్త.. తమ వివాహ హక్కులను పునరుద్ధరించాలంటూ హైకోర్టుకు వెళ్లాడు.

తన సోదరి కులాంత వివాహం చేసుకుంటే తనకు భార్య విడాకులు ఇవ్వడం.. న్యాయస్థానం దాన్ని అంగీకరించడం ఏటంటూ హైకోర్టులో తన వాదనలు వినిపించాడు. ఇదంతా విన్న హైకోర్టు.. విచారణను జనవరి 20వ తేదీకి వాయిదా వేసింది. చూడాలి మరి ఏం జరగనుంది అనేది.