ట్రంప్ రాకతో ఉద్యోగాలు మానేస్తున్న భారతీయ విద్యార్థులు

గతేడాది సెప్టెంబర్ నెలలో జరిగిన అమెరికా అధ్యక్ష ఎన్నికల్లో డొనాల్డ్ ట్రంప్ విజయం సాధించినప్పటి నుంచి ఎక్కడ తాము బహిష్కరణకు గురవుతామోనంటూ ఆ దేశంలోని విదేశీయులు తెగ టెన్షన్ పడిపోతున్నారు. ముఖ్యంగా యూఎస్ 47వ అధ్యక్షుడిగా ట్రంప్ పదవీ బాధ్యతలు చేపట్టడానికి కొన్ని రోజుల ముందు నుంచే.. అమెరికాలో ఉండే భారతీయ విద్యార్థులు పార్ట్ టైమ్ ఉద్యోగాలను మానేస్తున్నారు. కళాశాలలకు వెళ్లొచ్చిన తర్వాత సమయం ఉంటున్నా ఉద్యోగాలు చేసేందుకు ఏమాత్రం ఆసక్తి చూపించడం లేదు. అందుకు గల కారణాలు ఏంటో మనం ఇప్పుడు తెలుసుకుందాం.

నాలుగు రోజుల క్రితమే అమెరికా నూతన అధ్యక్షుడిగా డొనాల్డ్ ట్రంప్ పదవీ బాధ్యతలు చేపట్టారు. అయితే మొదటి రోజే వీసా నిబంధనలను కఠినతరం చేస్తున్నామంటూ అందరికీ షాక్ ఇచ్చారు. ఓవైపు జన్మతః పౌరసత్వం రద్దు చేస్తూనే.. మరోవైపు ఎఫ్-1 వీసాపై వచ్చిన విదేశీ విద్యార్థులు నిబంధనలు ఉల్లంఘించి పనులు చేసేందుకు వీళ్లేదని చెప్పారు. దీంతో అమెరికాలో చదువుకుంటున్న భారతీయ విద్యార్థులు అంతా.. చిన్న చిన్న ఖర్చుల కోసం చేసే పార్ట్ టైమ్ ఉద్యోగాలను మానేశారు.

అసలే లక్షల్లో అప్పు చేసి బాగా చదువుకుని మంచి స్థాయికి రావాలని కలలు కంటూ అమెరికాకు చేరుకున్న విద్యార్థులు.. తమ ఖర్చులు వెళ్లదీయడం కోసం అక్కడే పార్ట్ టైమ్ ఉద్యోగాలు చేస్తుంటారు. ముఖ్యంగా కాలేజీ అయిపోయాక.. స్థానికంగా ఉండే పెట్రోల్ బంక్‌లు, హోటళ్లు, రెస్టారెంట్లు, సూపర్ మార్కెట్లు వంటి వాటిల్లో పని చేస్తుంటారు. ఎంత కష్టమైనా సరే పడుతూ.. అక్కడే డబ్బులు సంపాదించుకుని చదువును కొనసాగిస్తుంటారు. అయితే ఎఫ్-1 వీసాలపై యూఎస్ వెళ్లిన అంతర్జాతీయ విద్యార్థులకు వారానికి 20 గంటల వరకు మాత్రమే పని చేసే అనుమతి ఉంది.

కానీ ఖర్చులు ఎక్కువగా ఉండడంతో విదేశీ విద్యార్థులు.. ముఖ్యంగా భారతీయ విద్యార్థులు మరిన్ని ఎక్కువ గంటలు పని చేస్తున్నారు. కానీ ట్రంప్ రాకతో.. ఈ ఉద్యోగాలు వారికి ఎంతో అవసరమే అయినప్పటికీ ప్రస్తుతం వారంతా ఉద్యోగాలు మానేయాల్సి వస్తోంది. ఒకవేళ వారు నిబంధనలు ఉల్లంఘించి పార్ట్ టైమ్ ఉద్యోగాలు చేస్తున్నట్లు అధికారులు గుర్తిస్తే.. ఎక్కడ తాము స్వదేశాలకు తిరిగి వెళ్లిపోవాల్సి వస్తుందోననే ఇలా చేస్తున్నారు. ఈ చిన్న ఉద్యోగాల కోసం తమ భవిష్యత్తును ప్రమాదంలో పడేయడానికి ఏమాత్రం ధైర్యం చేయలేకపోతున్నారు.

ఇల్లినాయిస్‌లోని ఒక విశ్వవిద్యాలయంలో గ్రాడ్యుయేట్ చేస్తున్న భారతీయ విద్యార్థి అర్జున్ మాట్లాడుతూ.. "నేను నా నెలవారీ ఖర్చుల కోసం ఒ కేఫ్‌లో పార్ట్ టైమ్ జాబ్ చేసేవాడిని. గంటకు 7 డాలర్లు సంపాదించేవాడిని. ఇలా ప్రతిరోజూ 6 గంటలు పనిచేస్తూ.. రోజుకు 42 డాలర్లు సంపాదించుకుంటాను. ఇది నా ఖర్చులకు బాగానే సరిపోతుంది. కానీ ఇమ్మిగ్రేషన్ అధికారులు అనధికారిక పనిపై కఠినంగా వ్యవహరిస్తున్నారని తెలిసనప్పటి నుంచి పని మానేశాను. నేను అమెరికాలో చదువుకోవడానికి సుమారు 43 లక్షల వరకు రుణాలు తీసుకున్నాను. నెలవారీ ఖర్చుల కోసం వీసా పోగొట్టుకుని జీవితం నాశనం చేసుకోవాడనికి నేను ఏమాత్రం ధైర్యం చేయలేకపోతున్నాను" అని చెప్పారు.