ఇంటికెళ్లిపోయిన మహా కుంభమేళా మోనాలిసా వైరల్ గర్ల్

మహా కుంభమేళాలో ఓవర్‌నైట్ సెన్సేషన్‌గా మారిన వైరల్ గర్ల్ మోనాలిసా ఇప్పుడు ఎక్కడ చూసినా సోషల్ మీడియాలో ఫోటోలు, వీడియోలు వైరల్ అవుతున్నాయి. మహా కుంభమేళాకు వచ్చే భక్తులు.. మోనాలిసాను చూసేందుకు, ఆమెతో ఫోటోలు దిగేందుకు, వీడియోలు తీసుకునేందుకు ఎగబడుతున్నారు. ఇంకా కొందరైతే ఆమె ఎక్కడికి వెళ్తే అక్కడికి వెళ్లి విసిగిస్తున్నారు. ఈ క్రమంలోనే ఆమెను రుద్రాక్షలు, పూసల దండలు అమ్ముకోకుండా అడ్డుపడుతున్నారు. దీంతో ఆమెను కాపాడుకునేందుకు మోనాలిసా కుటుంబ సభ్యులు తీవ్ర అవస్థలు పడాల్సి వస్తోంది. ఇలాంటి పరిస్థితుల్లో వారి వ్యాపారం సంగతి పక్కనపెడితే.. మోనాలిసాకు, ఆమె కుటుంబానికి రక్షణ లేకుండా పోయింది. దీంతో మోనాలిసాను.. ఆమె తండ్రి.. తమ స్వస్థలం అయిన మధ్యప్రదేశ్‌లోని ఇండోర్‌కు పంపించారు.

తాజాగా ఓ వీడియో విడుదల చేసిన మోనాలిసా భోంస్లే.. మహా కుంభమేళాలో తాను ఎంతో ఇబ్బంది పడినట్లు తెలిపింది. తన రక్షణ, తన కుటుంబం సేఫ్‌గా ఉండటం కోసం తాను తమ స్వస్థలం అయిన ఇండోర్ వెళ్లిపోతున్నట్లు తెలిపింది. ఒకవేళ వీలైతే మళ్లీ ప్రయాగ్‌రాజ్ మహా కుంభమేళాకు వచ్చే పుణ్యస్నానం వరకు వస్తానని వెల్లడించింది. ఈ సందర్భంగా తనకు మద్దతుగా నిలిచి.. ప్రేమను పంచుతున్న ప్రతీ ఒక్కరికి హృదయపూర్వకంగా ధన్యవాదాలు చెప్పింది.

మధ్యప్రదేశ్ ఇండోర్‌కు సమీపంలో ఉండే మహేశ్వర్ ప్రాంతానికి చెందిన మోనాలిసా భోంస్లే కుటుంబం.. ఉత్తర్‌ప్రదేశ్‌లోని ప్రయాగ్‌రాజ్‌లో జరుగుతున్న మహా కుంభమేళాలో పూసల దండలు, రుద్రాక్షలు అమ్ముకునేందుకు వచ్చింది. అయితే ఓ సోషల్ మీడియా ఇన్‌ఫ్లూయెన్సర్.. మోనాలిసాను కొన్ని ప్రశ్నలు అడుగుతూ ఉన్న వీడియోను సోషల్ మీడియాలో షేర్ చేయడంతో.. ఆమె ఓవర్‌నైట్ సెన్సేషన్‌గా మారిపోయింది.

ఆ వీడియో తెగ వైరల్ కావడంతో మిలియన్ల కొద్ది నెటిజన్ల దృష్టిని ఆమె ఆకర్షించింది. తేనెకళ్లు, డస్కీ స్కిన్, స్వచ్ఛమైన చిరునవ్వు, ఆమె ముఖకవళికలు నెటిజన్లకు నచ్చడంతో ఆమె వీడియోలు తెగ వైరల్ చేశారు. దీంతో మహా కుంభమేళాకు వెళ్లిన వారు.. మోనాలిసాను చూసేందుకు ఎగబడ్డారు. ఫోన్లు పట్టుకుని ఆమె వెంటే పరిగెత్తారు. ఫోటోలు, వీడియోలు, ఇంటర్వ్యూలు అంటూ సోషల్ మీడియా ఇన్‌ఫ్లూయెన్సర్లు, మీడియా సహా సాధారణ ప్రజలు.. మోనాలిసాను తీవ్ర వేధింపులకు గురి చేశారు. ఒకానొక దశలో ఆమె తనను తాను వారి బారినుంచి రక్షించుకునేందుకు ముఖానికి మాస్క్ పెట్టుకుని.. తన మొహం కనిపించకుండా వెళ్లింది. ఇక ఎప్పుడూ ఆమెను రక్షించేందుకు మోనాలిసా కుటుంబం కూడా తీవ్ర ఇబ్బందులు పడింది. దీంతో ఇలాగే ఉంటే పరిస్థితి మరింత దారుణంగా మారుతుందని భావించిన మోనాలిసా తండ్రి ఆమెను ఇండోర్ పంపించేశారు.