వాహనదారులకు మళ్లీ షాక్.. పెరిగిన డీజిల్ ధర రూ.2

కర్ణాటక రాష్ట్ర ప్రభుత్వం పిడుగు లాంటి వార్త చెప్పింది. డీజిల్‌పై ప్రస్తుతం విధిస్తున్న సేల్స్ ట్యాక్స్‌ను పెంచింది. కర్ణాటకలో అధికారంలో ఉన్న సిద్ధరామయ్య నేతృత్వంలోని కాంగ్రెస్ పార్టీ ప్రభుత్వం.. ఇటీవల రాష్ట్రంలో వరుసగా ఛార్జీల పెంపు నిర్ణయాలు తీసుకుంటోంది. దీంతో కన్నడవాసుల జేబులకు చిల్లు పడుతోంది. ఇప్పటికే ఆస్తి పన్ను పెంపు, విద్యుత్ సుంకాల పెంపు, పాల ధరల పెంపు.. బెంగళూరు నగరంలో చెత్త పన్ను విధింపు సహా అనేక నిర్ణయాలతో రోజురోజుకూ కర్ణాటక వాసులకు ఆర్థిక భారం పడుతోంది. తాజాగా డీజిల్ ధరలు పెంచుతూ సిద్ధరామయ్య సర్కార్ సంచలన నిర్ణయం తీసుకుంది. డీజిల్‌పై విధించే అమ్మకం పన్నును పెంచడంతో డీజిల్ ధర పెరిగింది. మరోవైపు.. పెట్రోల్ ధర స్థిరంగా ఉన్నట్లు అధికారులు తెలిపారు.

ఏప్రిల్ 1వ తేదీ నుంచి డీజిల్‌పై సేల్స్ ట్యాక్స్ పెంచుతున్నట్లు కర్ణాటక ప్రభుత్వం వెల్లడించింది. ఇప్పటివరకు డీజిల్‌పై అమ్మకం పన్ను 18.44 శాతం ఉండగా.. దాన్ని 21.17 శాతానికి పెంచుతున్నట్లు కర్ణాటక ప్రభుత్వం ప్రకటించింది. ఈ పెంపుతో లీటర్ డీజిల్ ధర రూ.2 పెరగనుంది. పెరిగిన ధరల ఆధారంగా కర్ణాటకలో లీటర్ డీజిల్ ధర రూ.91.02కు ఎగబాకింది.

అయితే 2021 నవంబర్ 4వ తేదీకి ముందు కర్ణాటకలో డీజిల్‌పై సేల్స్ ట్యాక్స్ 24 శాతం ఉండగా.. ఆ సమయంలో లీటర్ డీజిల్ ధర రూ.92.03 గా ఉండేది. కానీ సిద్ధరామయ్య నేతృత్వంలోని కాంగ్రెస్ పార్టీ అధికారంలోకి వచ్చిన తర్వాత 2024 జూన్‌లో సేల్స్ ట్యాక్స్‌ను 24 శాతం నుంచి.. 18.44 శాతానికి తగ్గించింది. దీంతో డీజిల్ ధర లీటర్‌కు రూ.92.03 నుంచి రూ.89.02కి తగ్గింది.

తాజాగా డీజిల్ ధర రూ.2 పెరిగినా.. కర్ణాటకకు పొరుగున ఉన్న రాష్ట్రాల కంటే తక్కువగానే ఉండటం గమనార్హం. మార్చి 31వ తేదీ నాటి వివరాల ప్రకారం తమిళనాడులోని హోసూరులో లీటర్ డీజిల్ ధర రూ.94.42 ఉండగా.. కేరళలోని కాసర్‌గోడ్‌లో రూ.95.66 ఉంది. అదే సమయంలో ఆంధ్రప్రదేశ్‌లోని అనంతపురంలో రూ.97.35 గా ఉండగా.. తెలంగాణలోని హైదరాబాద్‌లో రూ.95.70 ఉంది. మహారాష్ట్రలోని కాగల్‌లో లీటర్ డీజిల్ రూ.91.07 ఉంది.