సుధీర్ఘ పోరాటం..కలసి రాని యుద్దం: రష్యాకు కూడా నష్టమే

ఉక్రెయిన్ తో సాగుతున్న యుద్దంలో రష్యా కూడా తెలియకుండానే నష్టపోతోంది. ఉక్రెయిన్ రెండు మూడు రోజుల్లోనే లొంగిపోతుందని, రష్యా శక్తిసామర్థ్యాల ముందు నిలవడం కష్టమని మాస్కో దండయాత్ర ప్రారంభానికి ముందు ప్రతి ఒక్కరికీ ఉన్న అభిప్రాయం ఇదీ. అయితే, అందరి అంచనాలను, ఊహాగానాలను పటాపంచలు చేస్తూ మూడు వారాలుగా రష్యా భీకర దాడులను ఉక్రెయిన్ సైన్యం సమర్థంగా ఎదుర్కొంటోంది. కీలక నగరాలపై పట్టుకోసం ప్రయత్నిస్తున్న పుతిన్ సేనలను ముప్పుతిప్పలు పెట్టి మూడు చెరువుల నీళ్లు తాగిస్తోంది. ఈ క్రమంలో ఇప్పటివరకు 13,500 మంది రష్యా సైనికులను మట్టుబెట్టినట్లు ఉక్రెయిన్ ప్రకటించింది. అంతేకాదు, 404 ట్యాంకులు, 1279 సాయుధ వాహనాలను ధ్వంసం చేసినట్లు తెలిపింది. 81 విమానాలు, 95 హెలికాప్టర్లు, 9 యూఏవీలను నేలకూల్చినట్లు వివరించింది. వీటికి అదనంగా మూడు నౌకలు, 36 విమాన, క్షిపణి విధ్వంసక వ్యవస్థలను నాశనం చేశామని ఈ మేరకు ఫేస్‌బుక్ ద్వారా వివరాలను వెల్లడించింది. మరోవైపు, ఉక్రెయిన్ అధ్యక్షుడు వోలోడిమిర్ జెలెన్‌స్కీ సైతం యుద్ధంలో వందలాది రష్యన్ హెలికాప్టర్లు, ట్యాంకులు ధ్వంసమయ్యాయని సోమవారం రాత్రి ఓ వీడియోను విడుదల చేశారు. ఉక్రేనియన్ సాయుధ దళాలు ‘‘ఆక్రమణదారులను తరిమికొడతున్నాయి.. మనమంతా కలిసి విజయం సాధిస్తాం.. ఆక్రమణదారుని తరిమి కొట్టండి! కలిసి గెలుద్దాం!’’ అని జెలెన్‌స్కీ పిలుపునిచ్చారు. రష్యా అధ్యక్షుడు వ్లాదిమిర్ పుతిన్‌కు ఉక్రెయిన్‌లో యుద్ధంలో విజయం సాధించడానికి కేవలం పది రోజుల సమయం మాత్రమే ఉందని, రష్యా దళాలు కట్టుదిట్టం చేశాయని అమెరికా, రష్యా రక్షణ రంగ నిపుణులు పేర్కొన్నారు. గేమ్ రష్యాకు సమీపంలో ఉందని అన్నారు. అయితే, ఇప్పటి నుంచి 10 రోజులు ఉక్రెయిన్‌పై రష్యా దళాలు తమ దాడిని కొనసాగించలేవని అమెరికా ఆర్మీ రిటైర్డ్ జనరల్ బెన్ హోడ్జెస్ అంచనా వేశారు. నివేదికల ప్రకారం..రష్యన్ మిలిటరీకి సంబంధించి మూడు కీలక లోపాలను ఆయన ఎత్తిచూపారు. యుద్ధాన్ని కొనసాగించడానికి రష్యాకు సమయం, సిబ్బంది, మందుగుండు సామాగ్రి లేదు.. అంటే వారు (రష్యా) దాడిని కొనసాగించలేరు’’ అని వ్యాఖ్యానించారు. ఉక్రెయిన్ రాజధాని కీవ్ నగరంలో కర్ఫ్యూ విధిస్తున్నట్లు నగర మేయర్ విటాలి క్లిష్కో ప్రకటించారు. మంగళవారం రాత్రి 8 గంటల నుంచి ఆంక్షలు ప్రారంభమవుతాయని చెప్పారు. మార్చి 17 ఉదయం 7 గంటల వరకు కర్ఫ్యూ అమలులో ఉంటుందని తెలిపారు. బాంబు షెల్టర్లలోకి వెళ్లేందుకు మాత్రమే ప్రజలు బయటకు రావాలని మేయర్ స్పష్టం చేశారు. మరోవైపు, ఐరోపా సమాఖ్యకు చెందిన కీలక నేతలు ఉక్రెయిన్కు బయల్దేరారు. పోలెండ్ ప్రధాని మేటియస్ మోరెవియకి, ఉప ప్రధాని యరస్లో కాచిన్స్కీ, చెక్ రిపబ్లిక్ ప్రధాని పెటర్ ఫీలా, స్లొవేనియా ప్రధాని యానెస్ జేన్సా కీవ్‌కు చేరుకుని ఉక్రెయిన్ అధ్యక్షుడు వొలొడిమిర్ జెలెన్‌స్కీతో సమావేశం కానున్నారు.