బురఖాలో బైక్ స్టంట్స్,,,,ఇద్దరు యువకుల అరెస్ట్

యువతలో సోషల్ మీడియాలో పిచ్చి బాగా ముదిరిపోయింది. లైకులు, షేర్ల కోసం వెర్రివేషాలు వేస్తున్నారు. ఫాలోయర్స్ పెంచుకోవడానికి వింత వేశాలు వేస్తున్నారు. ప్రమాదకర స్టంట్స్ చేస్తూ ప్రాణాలు కూడా కోల్పోతున్నారు. ఇటీవల కాలంలో చాలా మంది యవత ఇలా సోషల్ మీడియాలో లైక్‌ల కోసం మితిమీరిన ఆగడాలతో ప్రాణాలు కోల్పోయారు. తాజాగా.. హైదరాబాద్ పాతబస్తీలోనూ కొందరు యువకులు సోషల్ మీడియాలో పాపులారిటీ కోసం పిచ్చి వేషాలు వేస్తూ రోడ్లపై ప్రమాదకర స్టంట్స్ చేశారు. రద్దీగా ఉన్న రోడ్లపై తోటి వాహనదారులకు ఇబ్బందులు కలిగిస్తూ రెచ్చిపోయారు.

ఓ గ్యాంగ్ బురఖా ధరించి బైక్‌పై ప్రమాదకర స్టంట్స్ చేసి ఆ వీడియోలను సోషల్ మీడియాలో పోస్ట్ చేశారు. యువకుడే అమ్మాయిలా బురఖా ధరించి విన్యాసాలు చేశాడు. స్టంట్స్ చేస్తున్న వీడియోలు ప్రస్తుతం సోషల్ మీడియాలో వైరల్‌గా మారాయి. ప్రమాదకర విన్యాసాలు చేస్తూ రోడ్లపై వెళ్లే వాహనదారులకు ఇబ్బందులు కలిగించారు. ఈ వీడియోలను షేర్ చేసిన కొందరు నెటిజన్లు.. ఇది తీవ్ర నేరమని ఇటువంటి వారిపై చర్యలు తీసుకోవాలని హైదరాబాద్ పోలీసులను ట్యాగ్ చేస్తూ వీడియోలను పోస్టు చేసారు. వీరిపై కఠిన చర్యలు తీసుకోవాలని డిమాండ్ చేశారు. తోటి వాహనదారులను ఇబ్బందులకు గురి చేసే హక్కు వారికి లేదని.. గత కొంత కాలంగా ఇటువంటి వారి ఆగడాలు ఎక్కువయ్యాయని కామెంట్లు పెడుతున్నారు.

వాహనదారులను భయభ్రాంతులకు గురిచేసిన వీడియోలు పోలీసులకు చేరాయి. దీంతో రంగంలోకి దిగిన ఐఎస్ సదన్ పోలీసులు.. వీడియోలో స్టంట్స్ చేసిన యువకులను అదుపులోకి తీసుకున్నారు. వారిపై కేసులు నమోదు చేసి బైకులను సీజ్ చేశారు. ప్రజలకు ఇబ్బంది కలిగేలా ఎవరు ప్రవర్తించినా కఠినంగా వ్యవహరిస్తామని పోలీసులు హెచ్చరించారు. కొత్త చట్టాలు అమల్లోకి వచ్చాయని తోటి వాహనదారులకు ఇబ్బందులు కలిగిలే ఎవరు వ్యవహరించిన స్ట్రిక్ట్ యాక్షన్ తీసుకుంటామన్నారు. తల్లిదండ్రులు కూడా పిల్లల ప్రవర్తనపై దృష్టి సారించాలని చెబుతున్నారు. వారు చిన్నతనంలోనే చెడు అలవాట్లకు, తిరుగుళ్లకు బానిసలు కాకుండా కంట్రోల్‌‌లో పెట్టాలని పోలీసులు అంటున్నారు.