హైదరాబాద్‌ను కుదిపేసిన కుండపోత..,మరో 5 రోజులు ఇదే పరిస్థితి

హైదరాబాద్ మహానగరాన్ని వరుణుడు కుదిపేస్తున్నాడు. సోమవారం(ఆగస్టు 19న) సాయంత్రం నుంచే మొదలైన భారీ వర్షం.. మంగళవారం ఉదయానికి జడివానగా మారింది. మేఘానికి చిల్లుపడిందా అన్నట్టుగా కుమ్మరించింది. దీంతో.. లోతట్టు ప్రాంతాలన్ని చెరువులుగా మారాయి. రాఖీ పండగకు వెళ్లిన నగరవాసులు తిరిగి ఉదయాన్నే హైదరాబాద్ చేరుకుంటున్న సమయంలో.. భారీ వర్షం కురియగా తీవ్ర ఇబ్బందులు ఎదుర్కున్నారు. వేకువజామున దంచికొచ్చిన వాన.. మళ్లీ సాయంత్రం కూడా సెకండ్ షిఫ్ట్ చేశాడు వరుణుడు.

సరిగ్గా ఆఫీసులు వదిలేసే సమయానికి మొదలైన వాన.. చాలాసేపటి వరకు వదలకుండా దంచికొడుతూనే ఉంది. కుండపోత వర్షం మరోసారి నగరాన్ని అతలాకుతలం చేసింది. మధ్యలో కాస్త గ్యాప్ ఇచ్చినా.. మళ్లీ దంచికొట్టింది. ఈసారి కాస్త గట్టిగానే కుమ్మరించటంతో.. రహదారులన్ని నదులను తలపించాయి. దీంతో.. భారీ ఎత్తున ట్రాఫిక్ జామ్ ఏర్పడింది. వర్షంలో తడుస్తూనే జనాలు.. ఇండ్లకు పయనమయ్యారు. ఫలితంగా రోడ్లపై కుప్పలు తెప్పలుగా ట్రాఫిక్ జామ్ అయ్యింది. కిలోమీటర్ల మేరకు ట్రాఫిక్ స్తంభించిపోవటంతో.. గంటల తరబడి రోడ్లపై వాహనదారులు ఇబ్బందులు పడాల్సివచ్చింది. ఇక.. ప్రధాన ఏరియాల్లో టాఫిక్ జామ్ గురించి ప్రత్యేకంగా చెప్పాల్సిన పని లేదు. ముఖ్యంగా.. ఐకియా సర్కిల్ నుంచి ఎప్పటిలాగే కిలో మీటర్ల మేర ట్రాఫిక్ జామ్ అయింది.

నగరవ్యాప్తంగా భారీ వర్షం కురియటంతో.. నగరవాసులు తీవ్ర ఇబ్బందులు ఎదుర్కొన్నారు. పలు ప్రాంతాల్లో వాహనాలు మునిగిపోగా.. లోతట్టు ప్రాంతాల్లో అయితే వరద నీటితో వాహనాలు కొట్టుకుపోయాయి. ఈ క్రమంలోనే జీహెచ్ఎంసీ‌తో పాటు డీఆర్ఎఫ్ సిబ్బంది అప్రమత్తమయ్యారు. నగరవాసులకు అధికారులు కీలక హెచ్చరికలు కూడా చేశారు. భారీ వర్షాల నేపథ్యంలో.. అక్కడక్కడా వర్షపు నీటిని తొలగించేందుకు మ్యాన్‌హోల్స్ తెరిచి ఉంటాయని.. వాటిని గమనించి రాకపోకలు సాగించాలని సూచించారు. ఇక పూడుకుపోయిన నాలాను పునరుద్ధరించే పనిలో డీఆర్ఎఫ్ సిబ్బంది నిమగ్నమయ్యారు.

మరోవైపు.. వాతావరణ శాఖ కీలక అప్డేట్ ఇచ్చింది. మరో ఐదు రోజుల పాటు ఇదే పరిస్థితి ఉంటుందని కీలక ప్రకటన చేశింది. దీంతో.. నగరవాసులు అప్రమత్తంగా ఉండాలని అధికారులు సూచిస్తున్నారు. అవసరం అయితే తప్ప.. ఎవరూ ఇళ్ల నుంచి బయటకు రావొద్ధంటూ ప్రకటించారు. విద్యా సంస్థలు కూడా పరిస్థితులను బట్టి.. విద్యార్థులకు సెలవులు ప్రకటించే యోచనలో ఉన్నాయి.