నేను రాజకీయాల్లోకి రావటానికి ప్రధాన కారణమదే.. మంత్రి తుమ్మల

మంత్రి తుమ్మల నాగేశ్వర్ రావు ఇంట్రెస్టింగ్ కామెంట్స్ చేశారు. ఖమ్మంలోని చెరుకూరి వారి తోటలో ఆదివారం (నవంబర్ 24న) నిర్వహించిన యాదవ బ్రాహ్మణ వైశ్య వన సమారాధనతో పాటు, వెలుగుమట్ల అర్బన్ పార్కులో నిర్వహించిన కమ్మవారి వన సమారాధన కార్యక్రమాల్లో మంత్రి తుమ్మల నాగేశ్వర రావు పాల్గొన్నారు. ఈ సందర్భంగా మాట్లాడిన తుమ్మల నాగేశ్వర రావు.. ప్రపంచవ్యాప్తంగా కమ్మవారికి తెలుగువారికి నందమూరు తారక రామారావు గుర్తింపు తీసుకొచ్చారని కొనియాడారు. నందమూరి తారక రామారావు దీవెనలతో తాను రాజకీయాల్లో ఉన్నానని తుమ్మల నాగేశ్వరరావు గుర్తు చేసుకున్నారు.

సెంటీ మీటర్ కూడా రోడ్డు లేని ఖమ్మం జిల్లాలో జాతీయ రహదారులు తీసుకొచ్చి ఖమ్మంను ప్రగతి బాటలు పట్టించినట్టు తుమ్మల నాగేశ్వర రావు గుర్తు చేశారు. కమ్మజాతి అన్నికులాలను అక్కున చేర్చుకొని ఆదర్శంగా ఉంటుందని చెప్పుకొచ్చారు. పోయేటపుడు బంగారం, వజ్రాలు, నగలు మనతో రావు అని.. మనలో ఉన్న మంచే కలకాలం నిలిచిపోతుందని తెలిపారు. దానగుణం కమ్మ వారికి ఆభరణమని మంత్రి చెప్పుకొచ్చారు. కాకతీయులు ముసునూరు కమ్మ రాజుల స్ఫూర్తి.. ముందు తరాలకు ఆదర్శమని వివరించారు.

వ్యవసాయం ప్రధానంగా ఉన్న కమ్మ జాతి.. అన్ని రంగాల్లో అభివృద్ధి చెందారని మంత్రి తుమ్మల చెప్పుకొచ్చారు. ప్రపంచీకరణ నేపథ్యంలో కమ్మవారు అమెరికాలోనూ రాణిస్తున్నారని తెలిపారు. తోటి కులాలను గౌరవిస్తూ లౌకిక భావనతో కమ్మకులం అందరికీ ఆదర్శంగా నిలుస్తోందని చెప్పుకొచ్చారు. ఈ క్రమంలోనే.. సీతారామ భక్తరామ దాసు ప్రాజెక్టుతో ఉమ్మడి ఖమ్మం జిల్లాను సస్యశ్యామలం చేస్తామని మంత్రి తుమ్మల నాగేశ్వరరావు ఉద్ఘాటించారు.

మరోవైపు.. సిటీ ఆఫ్ టెర్రస్ గార్డెనింగ్ ఫౌండర్ హర్కర శ్రీనివాస్ సరోజ ఆధ్వర్యంలో నిర్వహించిన సదస్సులోనూ మంత్రి తుమ్మల నాగేశ్వరరావు పాల్గొన్నారు. ఈ సందర్భంగా మంత్రి తుమ్మల మాట్లాడుతూ... మిద్దె తోటల్లో పురుగు మందులు లేని కూరగాయలను సాగు చేయాలని సూచించారు. మహిళలు వంటింటికే పరిమితం కాకుండా మిద్దె తోటల్లో కూరగాయల సాగుతో ఆ కుటుంబాలు ఆరోగ్యంగా ఉంటారని తెలిపారు. కల్తీ ఆహారం పురుగు మందుల అవశేషాలున్న కూరగాయలు తిని మనిషి కష్టార్జితం అంతా ఆస్పత్రి పాలవుతుందని చెప్పారు. టెర్రస్ గార్డెనింగ్ సామాజిక ఉద్యమంగా సాగాలని మంత్రి తుమ్మల నాగేశ్వరరావు వెల్లడించారు.